تمرينة السكوات من أهم وأشهر التمرينات إللي هتعمليها لما تبدأي تلعبي رياضة.. التمرين ده مفيد جدًا في شد عضلات البطن والأرداف والضهر والمؤخرة وكمان هيديكي رجلين مشدودة مع الوقت وهيقلل جدًا من ظهور السيلوليت.
طرق ووصفات طبيعية للتخلص من السيلوليت
ميزة التمرين ده إنه مش محتاج أوزان ولا أجهزة ولا محتاج تكوني في الجيم علشان تعمليه، هتقدري تعمليه في أي مكان، إن شالله في المكتب وإنتي في البريك.
إزاي تعملي تمارين السكوات Squat؟
1-هتقفي وتبصي لقدام وصدرك مرفوع وضهرك مشدود.
2-افتحي رجلك بعرض الكتفين أو أوسع شوية.
3-مدي إيديكي قدامك وهمّا مفرودين علشان تحافظي على التوازن
4-اتني ركبتك وابدأي انزلي لتحت وكإنك هتقعدي وزقي المقعدة لورا وإنتي باصة لقدام.
5-أهم حاجة فخدك يبقى موازي للأرض وركبك ما تعديش مشط رجلك.
6-ما ترفعيش كعب رجليكي من على الأرض وإنتي بتنزلي لتحت وما تخليش ركبك تقرب من بعضها.
7-ممكن تحطي كرسي وراكي يساعدك وساعتها هتنزلي وهتلمسي طرف الكرسي وترجعي تاني تقفي وهكذا.
ممكن تبدأي التمرين ده بعشر عدات ورا بعض وتفضلي تزودي بالتدريج لحد ما تتعودي ولما تحترفي التمرين ويبقى عادي بالنسبالك ممكن تعمليه بدامبلز كمان لزيادة القوة العضلية وزيادة كفاءة التمرين.
ودلوقتي ممكن تشوفي الأخطاء الشائعة إللي بنعملها في السكوات من الفيديو ده
التعليق باستخدام حساب فيس بوك