أنا شيماء الجمال، خسرت 40 كيلوجرام من وزني وبدوّن معاكم تجربتي على هاشتاج #من_الكرش_للكيرفي وبكتب لكم هنا مقالات عن الأكل الصحي والرياضة واللايف ستايل الصحي.

كتير من الناس لما بتسمع إنه الأصح إننا نشيل العيش الأبيض والمكرونة والحلويات من نظامنا اليومي مش بيبقوا عارفين ياكلوا إيه أو يشبعوا إزاي.. الفكرة إننا نوجد بدايل صحية أكتر للأكلات الغير صحية لإنه لما نعمل كدة سعراتنا هتقل من غير مجهود كبير وبالتالي هنخس أسرع وكمان هتنتجنب أعراض التحسس والإنتفاخ والنهم إللي عندنا..

تعالوا نستعرض البدايل الصحية للأطعمة الغير صحية

بديل العيش:

ابتديت بالعيش لإنه أكتر سبب لزيادة الوزن لأسباب كتير منها احتواؤه على الدقيق الأبيض ومشتقاته والسكر.. بديل العيش الطبيعي عيش مصنوع من القمح الكامل.. عيش بني، وناكله بكمية قليلة والافضل عيش مخبوز بدقيق الشوفان أو دقيق جوز الهند واللوز والسيلينيوم.

بديل المكرونة البيضاء:

تاني سبب لزيادة الوزن.. المكرونة البيضا علشان الدقيق الأبيض ومشتقاته مكون أساسي فيها وطريقة صناعتها إلي بتخليها عالية جدا في السعرات ولما بناكلها بنجوع بسرعة لإنها بترفع السكر في الدم والبديل ليها القليل من المكرونة البني او مكرونة الشوفان ويفضل منعها نهائيًا لإنها طعام بلا فايدة حقيقية تذكر.

بديل الرز العادي بالشعرية:

المشكلة في الرز حاجتين.. إنه الرز الأبيض يعتبر من النشويات البسيطة، فيه سعرات حرارية مش قليلة وبيرفع الإنسولين في الدم وبيجوع بسرعة لما بناكله والحاجة التانية طريقة طبخنا ليه بالزيت والتشويح والشعرية والشوربة.. سعرات في الليمون.. بديل الرز المصري العادي:  رز بسمتي مسلوق في مية وملح قليل أو رز بني طبعًا أحسن كتير أو شوية فريك مسلوق بمية وملح..

وكمان ممكن نجرب البرغل والكينوا المسلوقين.

بديل شوربة اللسان عصفور والشعرية:

المشكلة مش في الشوربة.. المشكلة في الشعرية واللسان عصفور لإنهم في الآخر مكرونة.. البديل شوربة سادة او شوربة خضار أو شوربة طماطم أو شوربه فراخ  وكل ده طبعا من غير دقيق يا إما نبقى ما عملناش حاجة..  وبالمناسبة.. شوربة العدش كلها نشويات.. نشرب منها قليل قوي على نفسنا وتعتبر وجبة مستقة ومش المفروض ناكل معاها عيش أو شعرية.

بديل السكر :

بديل السكر  للمضطرين إللي بيكروهوا طعم المشروبات من غير سكر هو معلقة أو اتنين سكر دايت في اليوم.  لكن السكر الأبيض  وسكر الفاكهة (إللي في برطمانات) كله سكر عادي في الآخر سعراته عالية.

بديل الحلويات الغير صحية:

طبعا السينابون والبريوش والكيكات والباتيهات والكرواسونات الحبيبة إلي قلبي كلها رجس من عمل الشيطان.. مليانة سكر وأحد أهم أسباب النهم الغذائي وفشل أي دايت والبديل ليها زبادي مع ثمرة فاكة، أو زبادي مثلج بيتي بالنكهات، أو شوفان باللبن والمكسرات وشوية زبيب أو كيك بيتي بدقيق الشوفان والمكسرات بسكر قليل قوي او بزبيب.. أو شريحة توست عليها زبدة فول سوداني ومعلقة مربى  بيتي.

بديل العصير:

بديل العصير ثمرة معصورة (بكل اليافها) وعليها مية بدون سكر أو مية فوارة مع نعناع ومعلقة سكر دايت أو –للأسف- واحدة سفن دايت عند الضرورة وده مش ترويج للسفن دايت كمشروب صحي، لكنه أنسب لحد بيعمل دايت من كباية عصير 600 سعر.

بديل الفرابتشينو والقهوة المليانة سعرات:

حد فيكم ممكن يتخيل إنه القهوة ممكن تكون مبوظة الدايت خالص.. سواء القهوة إللي مليانة كريمة وآيسكريم وسكر ونكهات كلها سكر أو القهوة 3 في 1 أو أو

القهوة الصح.. نجيب البن ونحط ليه مية وبق لبن (علشان كتر اللبن مش أحسن حاجة علشان فيه سكر خفي) ومعاهم معلقة سكر دايت لو بنحتاج..  وممكن نعمله ساقع بنفس الطريقة في البيت.

بديل الجبن المطبوخة:

الجبن السايحة إللي في البرطمانات نو.. نو and big no  البديل جبنة قليل الملح أو جبنة قريش أو جبن ماعز أو شيدر لايت أو موزاريلا لايت وبكميات محسوبة.

بديل الطبيخ:

بديل الطبيخ إللي مليان سمنة وصلصة طماطم وبصل محمر وشوربة،  الخضار السوتيه المعمول عالبخار أو متشوح في ملقة زبدة وشوية مية. ومفيش مانع في سلطانية طبيخ كل فترة على نفسنا.. بس مش كل يوم طبيخ ورز وشوربة شعرية!

بديل الميلك شيك:

الميلك شيك الجاهز مليان نكهات صناعية وكريمة وآيس كريم وسكر.. البديل:  مكس من الزبادي العادي أو اليوناني و3 فراولات ومعلقة سكر دايت وجوز هند ورشة بودرة فانيليا وعالخلاط   أو نفس الخلطة بالكاكاو  أو الموز.

بديل الكيك العادي:

الكيك الجاهز مليان دقيق وسكر ودهون.. البديل كيك بيتي معمول بالشوفان والمكسرات والزبيب أو البلح وبيطلع تحفة.

بديل الكورن فليكس والموسلي:

الكورن فليكس والموسلي حتى إللي مكتوب عليه إنه دايت مليان دقيق وسكر.. البديل شوفان حبة كاملة 3-5 معالق كبار.

بديل المربي الجاهزة:

مربي بيتي من الفاكهة والقليل من السكر أو سكر ستيفيا.

بديل زبدة الفول السوداني الجاهزة:

زبدة فول سوداني معمولة  في البيت في الخلاط : فول سوداني وزيت زيتون او زبدة قليل وبق مية ومعلقتين عسل ورشة ملح.

بديل الشيكولاتة العادية:

شيكولاة دارك 70 في المية فما فوق (يفضل 90)  أو بروتين بار قليل جدًا في النشويات والسكريات وده مش كل يوم بناكله.

بديل القهوة 3 في 1:

قهوة عادية عليها مية وبقين لبن معمولة في البيت.. الكريمر إللي في القهوة مليان دهون وسعرات.

بديل الشيبسي والبطاطس المحمرة:

بطاطس صوابع او شيبسي منقوعة في مية بملخ وخل تتصفى كويس وتتدهن من فوق زيت زيتون ونحطها على ورقة زبدة وتدخل الفرن.

بديل المايونيز والصوصات الجاهزة:

صوص مكون من الزبادي اليوناني ونحط عليه زيت زيتون وتوابل ورشة جبنة مبشورة ورشة توم.

ودلوقتي مستنية تعليقاتكم وأسئلتكم على الكلام ده في التعليقات..