لغة الأوامر مع الأطفال ” خلص أكلك \ البس بيجامتك \ سرحي شعرك \ اعمل الواجب”، وغيرها وغيرها كتيير قوي من الأوامر اللي بنفضل نقولها طول اليوم للولاد، على أمل يعني إنه هييجي يوم ونشوفهم بيسمعوا الكلام.
طيب خلونا الأول نعرف إيه هي لغة الأوامر مع الأطفال وتأثيرها عليهم، إن صيغة فعل الأمر عمال على بطال بتخلق مقاومة عند الطفل وعند البني آدم عمومًا يعني، مفيش حد بيحب يسمع أوامر طول الوقت وبينفذها عادي هو كده ربنا خلق مخنا بالشكل ده ولازم نحترم الطريقة اللي بيشتغل بيها.
طيب يبقى ما نربيش بقى العيال مدام مش هنقول لهم أوامر! الإجابة لا طبعًا لأننا هنقول برضه بس هنغيّر طريقة كلامنا من أمر لواحدة من أدوات التربية الإيجابية اللي جاية دلوقتي، عشان ما نوصلش لمرحلة صراع القوى اللي بنوصل لها مع ولادنا ومين كلامه هيمشي فينا.
-
طريقة الاختيارات المحدودة .. بديلة الأوامر مع الأطفال
“هتلبس البيجامة ولا تغسل سنانك؟”
“هتعمل هووم وورك العربي ولا العلوم الأول؟”
قدمي للطفل اختيارين أو تلاتة بالكتير. المهم إنك تكوني موافقة عليهم، ولو اختار إختيار تالت بكل حب وحزم، وضحي له إن ده مش متاح دلوقتي وعيدي عليه الاختيارين، بحيث يوصل للطفل إنه حقه يختار ويرتب اللي هيعمله زي ما هو عايز وفي نفس الوقت اختياره محدود في مسؤوليات لازم يخلصها.
بدائل الأوامر مع الأطفال – المصدر: positive discipline
-
الأسئلة الفضولية
“وراك إيه دلوقتي مفروض تعمله؟”
“بتعملي إيه بعد ما بتغسلي سنانك؟”
أداة الأسئلة الفضولية بتحسس الطفل إن هو القائد وإنه سيد قراره بدل ما طول اليوم نوجهه مفروض يعمل إيه وبالتالي تعاونه معانا بيكون أسهل.
بدايل للأوامر مع الأطفال – المصدر: positive discipline
- كلمتين وبس
“مذاكرة العربي”
“غسيل سنانك”
وده بقى من الأدوات اللي ممكن نستخدمها بالذات الأيام اللي جايبين آخرنا فيها ومش شايفين قدامنا كأمهات ومش قادرين نفكر لا في اختيارات ولا أسئلة فضولية ولا عندنا حاجة نقدمها، وفي نفس الوقت هنكون متابعين الطفل ومش فوق دماغه بالأوامر.
بدايل للأوامر – المصدر: positive discipline
-
الروتين
وده بقى سحر الأدوات بتاعنا واللي بيريح الطفل ويريحنا من مناهدة كتير سوا، الروتين اليومي المكتوب واللي متعلق قصاد الطفل واللي المهام فيه مترتبة بإيد الطفل وبمزاجه وبمساعدتنا طبعًا، ده بتخلّي الطفل أولًا عارف هو وراه إيه ومتوقع يومه ازاي، وشايف قدامه إمتى البريك أو وقت الشاشات فمش محتاج يزن كتير عليهم. وفي نفس الوقت، الأم مش طالعة الشرير في رواية أحدهم اللي بتفكر الطفل كل شوية باللي وراه.
بدايل للأوامر – المصدر: positive discipline
-
طريقة اللذاذة والهزار
“اللي هيخلص الواجب بتاعه هيتقطع زغازيغ”
“مين هيسبقني ويغسل سنانه قبلي. يا رب محدش”
الهزار في العموم وده تنفع للسن الصغير شوية اللي بيجي معاهم شكل الجري والأغاني والزغزغة، وفي نفس الوقت هي من ألذ وأخف الأدوات اللي بتساعدنا الجو بيننا وبين الولاد يبقى لطيف وفي نفس الوقت يخلصوا اللي وراهم.
بدائل الأوامر مع الأطفال – المصدر: positive discipline
أهم حاجة بقى وأنتم بتجربوا تستخدموا الأدوات دي هي إنكم تفتكروا إننا آه نفسنا ولادنا يسمعوا الكلام، ويخلّصوا اللي وراهم علطول بس مش ده الهدف الأساسي بتاعنا. فكروا في أهدافكم طويلة المدى وإننا بنعد بني آدم للمستقبل مش لدلوقتي، فخلوا نفسكم طويل وأدوا لنفسكم ولولادكم فرصة للتدريب عشان تشوفوا نتيجة الأدوات دي في علاقتكم وتعاونكم معاهم.
التعليق باستخدام حساب فيس بوك