محتويات المقال
برامج الطبخ ما بقيتش بس وصفة وشيف وخلاص اتطورت بشكل كبير وبقى فيها محتوى ترفيهي وعلمي وأحيانًا تاريخي كمان والنهاردا اختارنا لك أربع برامج طبخ محتواها مفيد جدًا لينا كأمهات وكل واحد فيهم هتطلعي منه بمعلومات وأفكار تساعدك في حياتك كأم بشكل كبير.
Jamie’s Quick and Easy Food
جيمي أوليفر من الشيفات المعروفين جدًا ولهم شعبية كبيرة، وعنده سلاسل متنوعة من البرامج بيكون لكل واحد فيهم محور معين بتدور حواليه الوصفات من أبرز البرامج دي Quick and Easy Food بيقدم فيها وصفات بتتكون من خمس مكونات أساسية بس وباقي مكوناتها بتكون حاجات موجودة في كل بيت زي الملح والفلفل وزيت الزيتون والخل. والبرنامج دا مفيد جدًا لينا كأمهات لأن الأم بتكون دايمًا مستعجلة وعايزة وصفات سريعة ومكوناتها قليلة عشان كمان لما تنزل تشتري مكوناتها ما تاخدش وقت كبير. دا غير إنه بيختار دايمًا مكونات بتعزز المذاق للأكلة بشكل كبير لأنهم بس خمس مكونات فكل مكون لازم يكون بيقوم بدوره فالأكلة على أكمل وجه.
Chopped
برامج مسابقات الطبخ كتيرة جدًا ومتنوعة ولها عشاقها لأن بيكون فيها عنصر التشويق اللي بتخلقه فكرة المنافسة بين المتسابقين والبرنامج دا هو منافسة ومسابقة وتصفية بين مجموعة شيفات في فئات عمرية مختلفة منها مسابقات بين أطفال ومراهقين كمان. بس احنا كأمهات نقدر نطلع منه بفايدة هايلة لأنه من قواعد المسابقة إنهم بيقدموا للمنافسين سلة مقفولة فيها مكونات ما يعرفوهاش والمكونات دي ساعات بتكون حاجات مطبوخة قبل كدا أو معلبات أو مكونات طازة، وساعات ما بيكونش لها أي علاقة ببعضها. وبالرغم من كدا، المتسابقين بيعرفوا يوظفوها ويعملوا منها أطباق متكاملة ودا هيفيدنا كأمهات في استغلال المكونات الموجودة عندنا في البيت أيًا كانت وكمان إعادة تدوير المكونات المطبوخة قبل كدا وإزاي نزود عليها مكونات أو نطبخها بطريقة جديدة ترجع لها الحياه وتطلع لنا أكلة جديدة عظيمة.
Kids Baking Championship
من اسمه هو برنامج مسابقات في الخبز والحلويات بين الأطفال. البرنامج مناسب جدًا إنك تتفرجي عليه مع ولادك خصوصًا لو بيحبوا الطبخ. هتحسي إنكم عايزين تدخلوا المطبخ سوا وتخبزوا كيك وتملوا البيت روايح جميلة ودفا وحب.
الأطفال بيستمتعوا جدًا وبيثبتوا أد إيه هم مبدعين وإبداعهم ما لوش حدود. تجربة الطبخ بتخليهم يتعلموا مهارات كتير ويكون عندهم حس فني وذوق جميل وبيكتسبوا كمان ثقة في النفس ومهارات في التعاون والشغل جوا فريق كل واحد فيه بيقوم بدور وفي الآخر بيكملوا بعض.
البرنامج مسلي جدًا وهتقضوا معاه وقت حلو قوي ومفيد وهتتعلمي من الأخطاء اللي بيقع فيها الأطفال حاجات كتير قوي عن الكيك والخبز وممكن تاخدي أفكار كتير لتورتة عيد ميلاد ولادك كمان وتعملوها سوا.
Gordon Ramsey’s Home Cooking 
شيف جوردن رامزي شيف إنجليزي له شهرة واسعة في مجال الطهي الاحترافي ومعروف عنه إنه حازم وشديد جدًا في شغله بالرغم من كدا. فالبرنامج ده بيقدم الوجه الآخر له كأب بيطبخ في بيته مع ولاده وبناته ومراته اللي بيشاركوه في إعداد الوصفات وبيقدم في كل حلقة وصفة فطار وغدا وعشا بيكون لهم علاقة بموضوع الحلقة.
الوصفات في منها كتير حاجات بسيطة وسهلة وتناسب الأطفال زي البانكيك والفراخ المقرمشة على طريقته ومشاركته مع عيلته في الطبخ بيدي جو أسري جميل جدًا للحلقات خاصة في نهاية الحلقة لما بيوّضبوا السفرة وياكلوا سوا كأسرة ويقولوا تعليقاتهم على الأكل.
شيف جوردن في البرنامج دا بيعمل وصفات منزلية تقدر أي أم تعملها لولادها لكن بيعملها باحترافية رهيبة هتتعلمي منه كتير قوي لو ركزتي واتبعتي نصايحه هتطبخي لولادك زي المحترفين.
في النهاية، نحب نقول لك إن كل البرامج دي لها حلقات كتير على YouTube يعني تقدري بسهولة تتفرجي عليها مع ولادك وتختاري منها الوصفات اللي تناسبك وتناسب ذوقنا في الأكل كمصريين وتكون مكوناته متوفرة في الأسواق وتجربيه وتستمتعي به. غيري في أسلوبك في الطبخ واتعرفي على مذاقات جديدة واستمتعي. الطبخ مش هيكون عبء عليكي لو كنتي منظمة وذكية في اختياراتك والتغيير مطلوب من وقت للتاني.
التعليق باستخدام حساب فيس بوك