بسبوسة دايت، الكلمتين شكلهم مش لايق مع بعض، بجانب إن فيه ابتعاد حقيقي عن الواقع، خصوصًا إن بسبوسة يعني سكر وسمنة وقشطة وحاجة آخر سعرات حرارية! بس على الرغم من كده، لإن الحرمان وحش جدًا، خصوصًا إن صينية البسبوسة لها هيبة كده وهي بأطراف محمرة والمكسرات والعسل عليها، فهنحاول معاكي نعمل بسبوسة دايت فكرتها تقليل كمية الدهون المستخدمة وبدائل صحية للسكر، وكمان لأصحاب كيتو دايت دقيق جوز الهند رفيق دربكم هتقدروا تعملوا منه بسبوسة دايت بس طبعًا محسوبة من كميات الأكل المسموحة في اليوم.
بسبوسة دايت
المقادير
– 3 ملاعق زيت نباتي
– علبة حليب مركز محلى (خالي الدسم)
– معلقة صغيرة بيكنج بودر
– كوبايتين ونص من السميد الخشن
– نص كوباية لبن زبادي
– كوباية مياه
– نص كوباية سكر للشربات
– كوباية مياه للشربات
– معلقة صغيرة عصير ليمون للشربات
– معلقة كبيرة نشا الذرة للشربات
– معلقة كبيرة من ماء الورد للشربات (اختياري)
طريقة عمل بسبوسة دايت
- ادهني الصينية بالطحينة صينية مقاس 28 سم.
- اخلطي الزيت النباتي مع الحليب المكثف والبيكينغ باودر، كويس جدًا. وبعد كده، ضيفي السميد، واللبن الزبادي، والمياه وقلبيهم كلهم مع بعض لحد ما يمتزجوا تمامًا.
- صبي الخليط ده في الصينية في فرن درجة حرارته 190 لمدة 35 دقيقة، أو لحد ما وشها يكون دهبي أو زي ما بنقول وشها إحمَر.
- لما تخرجيها اسقيها بالشربات بس لازم يكون بارد، لازم واحد من الاتنين يكون بارد: ما ينفعش البسبوسة والشربات الاتنين يكونوا سخونين أو باردين.
- طريقة تحضير الشربات: ضيفي السكر والمياه في حلة، لما يغلي لمدة 8 دقايق على نار هادية، دوّبي النشا في نص كوباية مياه وضفيهم على السكر اللي بيغلي وبعد كده عصير الليمون، ومياة الورد لو بتحبيها وتاخد غلوة واحدة وكدة يكون جاهز.
هنا ممكن تشوفي بالفيديو: طريقة عمل شربات الحلويات
بسبوسة كيتو
المقادير
-
بيضة واحدة
-
رشة ملح
-
ملعقة فانيليا
-
2 ملعقة كبيرة محلي مسموح للكيتو زي مثلا استيفيا
-
كوباية جوز الهند
-
كوباية دقيق لوز
-
2 ملعقة كبيرة قشطة
-
2 ملعقة كبيرة سمنة طبيعية او زبدة
-
ملعقة بيكنج باودر
-
حبات لوز للتزيين
طريقة عمل البسبوسة كيتو
- أول حاجة نحمّي الفرن على درجة ١٨٠ من الأسفل.
- نخفق البيض وبعد كده نضيف رشة ملح وفانيليا والسكر المسموح ونخلطهم كويس.
- بعد كده، نضيف جوز الهند ودقيق اللوز والزبدة والقشطة ونخلطهم كويس.
- وأخيرًا هنضيف بيكنج باودر ونخلطهم لحد ما نحصل على عجينة لينة نصبها في صنية كيك أو بايريكس ونزيّنها بحبات اللوز.
- ندخلها الفرن لحد ما تحمر وبعد كده نقدمها مع القشطة المحلى بسكر مسموح وبألف هنا.
أظن بعد الوصفتين دول أفضل قرار تاخديه دلوقتي إنك تعملي صينية بسبوسة تطفي بيها نار الشوق ليها بدون أي إحساس بالذنب، وعلى فكرة أنا جربت البسبوسة الكيتو وحقيقي طعمها حلو، جربيها على ضمانتي. أما لو قررتي تتنازلي عن الدايت، اعملي الوصفة دي من البسبوسة الرهيبة.
التعليق باستخدام حساب فيس بوك