محتويات المقال
الأمهات بعد الولادة بتكون دايمًا هرموناتها ملخبطة وبتمر بتجارب كتير صعبة في رحلة الأمومة اللي بتبتدي بحق وحقيقي مع أول يوم ولادة، تجربة الولادة اللي مش سهلة أبدًا سواء طبيعي ولا قيصري، مواطن مصري جديد زوّد العدد السكاني بيعيط ليل ونهار ومش عارفة تتفاهم معاه، وأخيرًا ودي ساعات بتكون من أسخف وأصعب التجارب التعليقات؛ التعليقات اللي كل أم لسه والدة جديد بتتعرض لها. هو أينعم الأم الجديدة بتبقى محتاجة الناس حواليها عشان تدعمها وتشيل عنها البيبي شوية وتديها خبراتها وكمان عشان ما تحسش إنها لوحدها، بس الدعم ده والزيارة دي ممكن تتحول لقنبلة مأساويات سببها جملة أو تعليق اتقالت للأم اللي لسه والدة دي وأشهرهم هنتكلم عليهم في الموضوع ده..
الوحاشة دي منين؟
يعني الولد ولا البنت لسه نازل ومش باين له ملامح لسه، ومش بعيد كمان يكون ما فتحش عينه أساسًا، وحد ييجي يسأل السؤال الفيلسوفي العنصري العميق ده؟ طيب ليه هااااه ليه؟ ده الواد لسه حتى بايش من الميه وفرهدة الولادة ما لحقش يريح ولا يبان.
أنا كنت باولد من هنا وأقف في المطبخ من هنا
ودي بتكون محاولات طنطية متعددة إنها تشجعنا على الحركة بعد نص ساعة لما نطلع من العمليات أو الولادة الطبيعي. بتكوني خلاص هتتجنني من الوجع وتيجي الجملة دي توجعك زي جرح القيصري بالظبط وبتصحبها: “ما تقومي تتحركي كده أومال أنا والدة 10 زي.. ” هي طنط أه بس نينجا!
شكلك عامل كده ليه؟
حاضر، الولادة الجاية هاعمل لوك شاكيرا وجينيفر لوبيز في حفلة السوبر بول وأنا لسه طالعة من الولادة.
انتي لسه شوفتي حاجة؟
كده أتوقع يا طنط إن اللي جاي أصعب فهاحمد ربنا على المرحلة اللي أنا فيها دي؟ طيب ليه كده طيب؟ في الوقت اللي بنستنى فيه كلمة زي ربنا معاكي وكله بيعدي، بوووووم نلاقي الوعد الجميل ده!
شدي حيلك عشان تجيبي الولد بقى
بنكون لسه ما فوقناش من البنج أساسًا ونسمع الجملة المشهورة دي وحتى لو خلفنا الولد هيقولوا بردو شدوا حيلكم عشان تجيبي البنت وحاجة آخر لايلو لايلو كده خالص.
أرجوكم ما تقولوش ولا جملة من دول للأمهات الجداد ولو على سبيل الهزار، عشان بيبقوا لسه ملخبطين وممكن ما يتقبلوش التعليق ده.. ودمتم مراعيين للمشاعر وحساسين.
التعليق باستخدام حساب فيس بوك