محتويات المقال
اللولب من ءأمن وأفضل وسائل منع الحمل، وزي ما كلمناكي في مقال سابق عن أنواع اللولب، النهارده، هنكمل كلامنا عن اللولب ونقول لك، لو انتي قررتي تحملي وانتي بتستخدمي اللولب، تعملي إيه بعد ما تشيليه.
أولًا: امتى تشيلي اللولب؟
اللولب ممكن يتشال في أي وقت. ببساطة، اللولب هو وسيلة منع الحمل للست اللي عارفة إنها هتحتاج تخلف قدام لكن مش خلال الـ7-10 سنين اللي جاية. عملية إزالة اللولب بتاخد دقايق، والجسم من بعدها بيكون جاهز للتخصيب. وده معناه إنك مش محتاجة تستني الدورة الشهرية عشان تحاولي تحملي.
ثانيًا: امتى هتحملي؟
زي ما قلنا، الجسم بيكون مستعد للحمل أول ما بتشيلي اللولب من الرحم، حتى لو كان اللولب الهرموني هو المستخدم مش النحاسي. السبب هنا إن اللولب الهرموني بيكون تأثيره موضعي أكتر مش عام على الجسم كله، وعليه فالوقت مش بيكون طويل قبل استرداد الجسم استعداده للحمل.
إيه بقى متوسط الوقت اللي بتاخده الست عشان تحمل بعد إزالة اللولب؟
- لو سنك أقل من 35، فيه فرصة 20% للحمل نفس الشهر، 60% في خلال 6 شهور، و90% في خلال سنة.
- لو سنك أكتر من 34، فالفرصة بتكون 10% أول شهر وبتزيد 10% كل شهر بعد الإزالة.
- لو سنك أكتر من 40 سنة، فالفرصة بتنزل لـ5% كل شهر.
هل ممكن يحصل مشاكل في الحمل بعد إزالة اللولب؟
د. زاهر ميرهي، طبيب النساء والتوليد وخبير التخصيب في مركز نيو هوب للخصوبة، بيقول إن مشكلة الحمل خارج الرحم بتكون نادرة بعد إزالة اللولب، لكن لو حصل حمل في وجود اللولب، فنسبة الخطر كبيرة جدًا إن يحصل حمل برا الرحم.
أنا شلت اللولب وما حملتش!
ليه ممكن بعد إزالة اللولب ما يحصلش حمل؟ ده بيكون راجع لأسباب مالهاش علاقة بوجود اللولب أصلًا. في دراسة اتعملت في 2018 ومنشورة في Biomed Central المجلة الأكاديمية الطبية، أثبت الباحثين إن أيًا كانت مدة استخدام اللولب، فاستخدامه ما بيأثرش على القدرة على التخصيب بعد إزالته، ولا حتى تأخير التخصيب.
الدراسة اللي اتعملت على ما يقرب من 15 ألف ست لاقت إن 83% من الستات دي حملت في خلال 12 شهر (أو أقل). هنا نقدر نسأل عن مشاكل تانية مالهاش علاقة بوجود أو إزالة اللولب، زي مثلًا عدم انتظام الدورة الشهرية، عدم انتظام التبويض، أو وجود التهابات. تابعي مع طبيب النسا المتابع ليكي، واسأليه.
نتمنى لك حمل صحي وسعيد.
التعليق باستخدام حساب فيس بوك