كل الأمهات بتيجي عليهم اللحظة اللي بيقولوا فيها: البيبي بيعيط وأنا مش عارفة السبب، واكل ونايم ومغير، والحقيقة إن البيبي بيكون عنده أسباب تانية للعياط غير الرضاعة والتغيير والنوم، وعلشان نسهل عليكي المهمة، هنقولك ازاي تفهمي إيه اللي مضايق طفلك من طريقة عياطه:
-
نوبات العياط الشديدة والطويلة:
ده في أغلب الأحيان بيكون وجع المغص، ولحسن الحظ في أدوية كتير دلوقتي بتساعد الرضع على التخلص من المغص وبيرتاحوا فعلا بعدها، بس لازم تستشيري طبيب طفلك في نوع الدوا وجرعته الأول، ويستحسن إنك تأمني نفسك وتسألي من أول يوم، لإن غالبًا نوبات المغص دي بتيجي بالليل.
-
العياط القصير التدريجي:
وده في الغالب بيكون تعبيرًا عن الجوع، وهتتأكدي لو أكلتيه وهدي بعدها، أما لو رفض الأكل والرضاعة، فممكن يكون محتاج مياه -لو هو في سن مسموح له من الطبيب شرب المياه- ومع الوقت هتلاقي نفسك عارفة مواعيد أكله وشربه، فتجهزي نفسك وتستعدي من قبل ما يعيط.
-
العياط على شكل صراخ:
وده بيكون بسبب ألم ما هو حاسس بيه، زي التسلخات، أو وجع في الودن، ومحتاجة تركزي جدًا في التفاصيل، لإن في حاجات خارجية بتسبب ألم للبيبي، زي هدوم معينة فيها حاجة بتشوك، أو شراب ماسك قوي على رجله، وكلها حاجات مش متوقعة بالنسبة لك، لكن مع الوقت هتعتادي على مراجعتها طول الوقت، ولو العياط استمر فإنتي محتاجة ترجعي للدكتور، لإن ممكن تكون في حاجة تانية بتوجعه لا قدر الله.
وفي أسباب تانية للعياط بصرف النظر عن طريقته، منها:
- الملل: آه والله زمبؤلك كده، تخيلي نفسك نايمة لمدة شهرين على ضهرك على السرير مش بتعملي أي حاجة، أكيد حاجة تزهق جدًا، علشان كده محتاجة تسلي طفلك بقصص مناسبة لسنه، وتتكلمي معاه وتلاعبيه، ولو مشغولة تقدري تخليه قريب منك في سترولر، أو باونسر، كمان تقدري تجيبي له لعب مناسبة وآمنة.
- محتاج لك: لو اتشغلتي عنه طول اليوم، هتلاقيه محتاج حضنك والقرب منك.
- الإزعاج الشديد: زي لو حضرتي فرح أو في تجمع ناس كبير انتي موجودة فيه، أغلب الأطفال مش بيقدروا يقعدوا في الجو ده.
- الحرّ والبرد: وده محتاج منك طول الوقت تكوني منتبهة لمدى مناسبة هدومه للجو، ومهم جدًا إنك ما تبالغيش في لبسه وخصوصًا في الشتاء.
ودي 10 نصائح للتغلب على نوبات بكاء الرضع
مع تمنياتنا ليكي ولطفلك بالسلامة والسعادة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك