السوشيال ميديا بقت حاجة مهمة جدًا في حياتنا ودي حاجة ما نقدرش ننكرها مش بس عشان بتسهل التواصل بين الناس لكن كمان بقت بتأثر في حياتنا بشكل كبير وبتوجهنا. ومؤخرًا ظهر مصطلح Foodies وهمّا إللي بيحبوا يدونوا عن الطعام، وممكن يبقوا بلوجر أكل مصريين أو أجانب. الفووديز فيه منهم اللي بيحب الطبخ وبيعرف يطبخ كويس جدًا وبعضهم بيكون دارس فنون الطهي ومحترف وبيقدم وصفات متنوعة بانتظام. وفيه منهم اللي بيحب الأكل بشكل عام وبيحب يجرب مطاعم ومذاقات جديدة ويشارك التجارب دي مع الناس برغم إنه ممكن يكون ما بيعرفش يطبخ بس بيقدّر الأكلة الحلوة وبيعرف يقيّمها صح.
في الآخر، كلهم ناس اجتمعوا على حب الأكل بكل أنواعه وأشكاله وطرق طبخه. وعشان كتير مننا كأمهات لهم اهتمامات مطبخية وبيحبوا دايمًا يتابعوا الفووديز والستوريز بتاعتهم على إنستاجرام ومغامراتهم سواء في المطبخ بيطبخوا أو في المطاعم بياكلوا أو شيفات محترفين عندهم برامج تليفزيونية بيورونا كواليس البرامج ويعيّشونا معاهم في تفاصيلها، هنستعرض معاكي النهاردة مجموعة من أهم الفووديز اللي متابعتهم حقيقي هتفيدك وتمتّعك في وقت واحد.
عمرو حلمي
بلوجر أكل مصريين
- مقدم برامج ترفيهية طهوية على قنوات أبو ظبي وفتافيت، ذواقة وناقد طعام وشيف محترف. متابعته هتسبب لك سعادة وهتديكي طاقة إيجابية مش طبيعية وخصوصًا مع عشقه وشغفه بالقهوة بكل تفاصيلها من أول نوع القهوة لحد الكوبايات المميزة المبهجة اللي بيشرب فيها.
- بيحب يشارك متابعيه التفاصيل الصغيرة في حياته اللي بتسبب له السعادة زي فنجان القهوة الصباحي وأفكاره المفتكسة في تقديمها وزي عشقه للديكور وتنسيق البيت ورحلات الشوبينج اللي بيقوم بيها مع أصحابه وهو بيجهز ركن جديد في بيته المميز جدًا. ده غير حبه للأكل الإيطالي ومغامراته في مدن إيطالية كتير درس وعاش فيها واتعلم منها كتير. وصفاته دايمًا مميزة وفيها شخصيته وبساطته ومتابعته فعلًا هتخليكي في موود رايق وجميل.
- https://www.instagram.com/amrhelmyfoodcritic/
- https://www.facebook.com/amrhelmyfood
محمد صلاح
بلوجر أكل مصريين
- أو زي ما بيسمّوه “ملاك اللحمة” وده لأنه عاشق للحمة بكل أنواعها وأشكالها وطرق طبخها ومحترف في طبخها وابتكار أطباق عصرية جدًا باللحمة. ولأنه شيف معتمد وكان عضو لجنة تحكيم برنامج مسابقات للطهي، اشتهر جدًا بكورساته الممتعة اللي بيديها في مجال طهي اللحمة. بيحب دايمًا يشارك متابعيه معلومات مفيدة جدًا عن قطعات اللحوم المختلفة وتتبيلاتها وطرق طهيها.
- هو الحقيقة كمان عاشق للأكلة الحلوة بكل أنواعها ودايمًا يشارك مغامراته في المطاعم المعروف منها والمستخبي في نواحي مصر. متابعته هتخليكي تحبي اللحمة حتى لو مش بتحبيها.
- https://www.instagram.com/m.salah_977/
- https://www.facebook.com/thebloggerchef/
هنا ازاي تبتدي مشروع أكل من البيت خطوة بخطوة مع الشيف سمر كمال
سالي فؤاد
بلوجر أكل مصريين
- طبعًا غنية عن التعريف، خبيرة تغذية ومقدمة برنامج “سفرة سالي” اللي بتقدم فيه وصفات متنوعة وأفكار لوصفات صحية كتير تناسب كل الأعمار والحالات المختلفة. ولأنها خبيرة تغذية، بتقدم وصفات لمرضى الحساسية بأنواعها المختلفة زي حساسية الجلوتين مثلًا والوصفات الخالية من الجلوتين وبتقدّم أنظمة غذائية صحية ناجحة جدَا كتير جربوها ونجحوا في الوصول لأهدافهم ودايمًا بتشجع متابعيها على اتباع التغذية الصحية وإنهم يخلوها أسلوب حياة. سر نجاحها بساطتها وسهولة شرحها ومصداقية وصفاتها اللي دايمًا ناجحة بشهادة كل متابعينها.
- https://www.instagram.com/sally_fou2ad/
- https://www.facebook.com/SallyFou2ad/
مراد مكرم أو الأكيل
بلوجر أكل مصريين
- ببرنامجه المتميز جدًا، يعتبر هو أول من قدّم برنامج لتقييم المطاعم في مصر. من المطاعم الفخمة جدًا للمطاعم اللي قعدتها في الشارع، مفيش مطعم عدى من تحت إيده، بيعيّشك معاه التجربة كاملة من أول شكل المنيو، للديكور، لفكرة تأسيس ونشأة المطعم حتى الأسعار. وفقرة التذوق اللي بنبقى قاعدين قدامها عايشين معاه جوه كل لقمة بياكلها.
- بيحاول دايمًا يجتهد ويدي رأيه بشكل حيادي في المذاقات اللي بيدوقها، وبينقل التجربة للمشاهد عشان يختار اللي يعجبه في النهاية. حقيقي برنامجه ممتع وبقى مرجعية ناس كتير لما تحب تزور مكان معين بتتفرج على الحلقة.
- https://www.instagram.com/mourad_makram/
- https://www.facebook.com/elakeel/
غادة التلي
أفضل بلوجر أكل
- شيف غادة التلّي شيف أردنية مصرية ومقدمة برنامج “زعفران وفانيلا” على قناة سي بي سي سفرة. وكمان مؤلفة لمجموعة من كتب الطهي الناجحة جدًا. محبينها ومتابعينها ما لهمش حصر. ذوقها وشغلها بيتكلموا عنها: فنانة وخبيرة مش بس في الوصفات المالحة، لكن كمان خبيرة في فنون تزيين الكيك والحلويات بكل أنواعها وأشكالها.
- بتحب تشارك متابعيها لحظات من دروس تعليم فنون تزيين الكيك في مدرستها اللي هي واحدة من أشهر مدارس تزيين الكيك في الأردن وكمان بتشارك لحظاتها الحلوة في حياتها مع أسرتها ونجاحاتهم. ده غير إنها واجهة لكتير من أشهر الشركات المنتجة لمنتجات مطبخية. متابعتك ليها ولشغلها هتثريكي جدًا وهتتعلمي منها كتير.
- https://www.instagram.com/ghadaeltally/
- https://www.facebook.com/ghadaeltallyofficial/
سارة نشأت Sarah’s kitchen
Bolggers أكل مصريين
- شيف معتمدة وأم لطفلين. شعارها اللي دايمًا تؤمن بيه إن الطبخ لكل الناس وإن أي حد يقدر يطوّر من نفسه في المطبخ ويطبخ أكلات لذيذة لو عنده الحب والشغف.
- عاشقة للفراخ وكل منتجاتها من أول وصفات البيض المبتكرة اللذيذة لحد وصفات الفراخ الروستو في الفرن بالزبدة والأعشاب. بتحب تطبخ الأكلات المصرية البيتي اللي بتتعمل كل يوم في البيت المصري وبتضيف لها لمساتها. والدتها لها عامل كبير في حبها للمطبخ وكتير بتحب تشارك وصفات والدتها الأصلية اللذيذة.
- سر نجاحها وحب الناس لها في بساطتها وبساطة وصفاتها ومصداقيتها لأنها تشبه كل ست وأم مصرية بتطبخ لعيلتها بحب. متابعتك لها هتساعدك جدًا لو كنتي عروسة جديدة أو بتشوفي إن الطبخ مهمة صعبة هي هتسهلها عليكي وهتحببك في دخول المطبخ.
- https://www.instagram.com/sarah_nashaat_5/
سارة الرفاعي kitchen keys
Bolggers أكل مصريين
- تعتبر من أوائل الناس في مصر اللي عملت لها food blog أو مدونة طعام خاصة بيها. عندها عدد كبير جدًا من الوصفات منها المصري التقليدي ومنها وصفات عالمية ووصفات مبتكرة من مقبلات وسلطات وأطباق رئيسية. أهم ما يميزها هي دقتها في شرح الوصفات بكل ما فيها من تفاصيل خطوة بخطوة هتديكي كل الأسرار اللي تخليكي تطبخي صح جدًا. متابعتك لها هتخلي عندك مكتبة كبيرة من الوصفات الناجحة الدقيقة جدًا.
- https://www.instagram.com/kitchen_keys/
- https://kitchenkeys.net/
تسبيح cleobuttera
Bolggers أكل مصريين
- أشهر فوود بلوجر في مصر في مجال الحلويات. لو هاحكي عن جمال وصفاتها والحلويات اللي بتقدمها بإتقان وفن، مش هاوفّي حقها. الموقع بتاعها يعتبر مرجعية لأي وصفة حلويات محيراكي. أكيد هتلاقي لها وصفة عندها! لازم هتجوعي جدًا وانتِ بتتفرجي على صورها الرائعة للحلويات اللي بتقدمها لأنها كمان فنانة في تصوير الحلويات. لازم تتابعي ابتكاراتها في حلويات رمضان. كل سنة بيكون لها وصفات للحلويات الشرقية الرمضانية بطرق مبتكرة جدًا. متابعتك لها هتمتع حواسك كلها وهتثريكي جدًا في عمل الحلويات.
- https://www.instagram.com/cleobuttera/
- https://cleobuttera.com/
- https://www.facebook.com/cleobuttera/
هاديل مجدي Itsbumbledee
مدونيين أكل مصريين
- مصورة وفوود ستايليست محترفة. لها أسلوبها الخاص في تصوير الأكل. ما بتشاركش وصفات وطرق طبخ أكلات لكن بتشارك طرق ونصايح كتير عن تصوير الأكل بشكل احترافي.
- بتعشق تصوير الحلويات، وكمان الأكلات المصرية المتنوعة بتصورها بأسلوب متميز جدًا. وكل موسم عندها له مجموعة من الصور؛ في الصيف صور مبهجة جدًا للآيس كريم بأنواعه، وفي الشتا صور دافية لمشروبات شتوية وحلويات متنوعة وألوان دافية وجريئة.
- متابعتك لها هتثريكي جدًا لو بتحبي تصوير الأكل وهتستفيدي كتير من كل النصايح اللي بتقدمها في تصوير وستايلينج الصور.
- https://www.instagram.com/itsbumbledee/
- https://www.facebook.com/itsbumbledeee
آسيا عثمان Assia Othman
بلوجرز أكل مصريين
- شيف آسيا عثمان مغربية ومصرية الجنسية. بتعتز جدا بأصولها المغربية من خلال وصفاتها الرائعة اللي بتقدمها من المطبخ المغربي، وكمان عاشقة للمطبخ المصري بكل وصفاته. من أقوى وأشطر الفوود بلوجرز الموجودين على الساحة. متميزة جدًا في وصفاتها وتطويرها لوصفات الأكل التقليدية لوصفات أكتر عصرية. هي كمان مصورة وفوود ستايليست محترفة ومؤلفة مجموعة كبيرة من كتب الطهي.
- عاشقة لكل ماهو vintage في الأدوات والأطباق. وكل ما يسمى بالـprops في عالم تصوير الطعام وده بيخلي شغلها مميز جدًا. دايمًا بتشارك متابعيها وصفاتها في صورة فيديوهات مميزة جدًا لأنها بتهتم بكل تفصيلة فيها. شخصية رائعة مبهجة ومحبة للحياة وللأكل بكل أشكاله.
- متابعتك لها هتثريكي جدًا في الطبخ سواء مصري أو مغربي وهتتعرفي معاها على عالمها من الوصفات المميزة والغير تقليدية بس بمكونات عربية أصيلة.
- https://www.instagram.com/assiakitchen/
- https://www.facebook.com/assia.othman2
What’s your Reaction?
2 تعليقان
انا من متابعين محمد صلاح .. رائع الصراحة
بصراحة انا دخلت هنا بالصدفة ولقيت محتوي قيم تحياتي لكي