مشكلة جديدة من المشاكل اللي أمهات كتير عندهم أطفال دارجة أو toddlers بيواجهوها وهي إن البنت او الابن بيحبوا يقلعوا لبسهم بعد ما نلبسهم على طول ويقعدوا من غيره وغالبًا بيطلعوا يجروا ويستمتعوا باللحظة واحنا نبقى هنتجنن تعالوا نعرف الأول السبب.
ليه الـ toddlers بيحبوا يقلعوا لبسهم؟
مهم نعرف إن الموضوع ده طبيعي ومنتشر من بعد سن السنتين عشان ما نتخضش ويكون رد فعلنا قوي. والسبب بيكون أوقات اكتسابهم لمهارة جديدة: فجأة اكتشفوا إنهم بيعرفوا يفكوا الزراير أو يفتحوا السوستة ويقلعوا الجاكيت، فبالنسبة لهم ده اكتشاف ممتع ومسلي جدًا.
لكن أوقات تانية بيكون نوع من أنواع لفت الانتباه أو إنه لقى رد فعل جامد من الأب أو الأم سواءً بالضحك مثلًا أو زعيق، فقرر إنه يلفت نظرهم بعد كده بالتصرف ده، أوقات تانية بقى بيكون الطفل مش مرتاح في اللبس أو حران وما بيصدق يعرف يشيل اللبس من على جسمه.
مصدر الصورة: parents – طفل دارج
يا ترى هتعملي إيه لما الحضانات تفتح
ازاي نقدر نشجعهم يبطلوا يقلعوا هدومهم في أي زمان ومكان من غير ما نزعق ونتخانق؟
- نوفر بديل مناسب:
زي إننا ندي للطفل عروسة لعبة أو teddy bear يلبسه ويقلعه ويمارس المهارة اللي اكتسبها ورغبته في الاكتشاف بس عن طريق اللعب.
- اختيارك للبس:
اتاكدي إن اللبس بتاعهم مريح ليهم ومش بيحرر أو بيضايقهم وهم بيلعبوا ويجروا. ولو لسه بيقلعوا لبسهم ومستمرين، ممكن تبدأي تختاري لهم لبس صعب فكه زي السالوبيت القطعة الواحدة أو هدوم بتتقفل من الضهر.
- اسمحي لهم يختاروا يلبسوا إيه:
من الحاجات المفيدة للأطفال من سن صغير على المدي البعيد والقصير هي إنهم يحسوا إن رأيهم مسموع وبيتاخد بيه، واللي في حالة النهارده هتخلي الطفل مبسوط ومتحمس لاختياره للبس فما يقلعهوش.
- التشتيت:
طبعًا كلنا عارفين التشتيت بينفعنا في مواقف كتير واحنا بنتعامل مع الـ toddlers، فممكن تجربي بعد وقت اللبس على طول إنك تاخدي بنتك وتقومي تلاعبيها بسرعة وتجري وراها، تقوموا ترقصوا مع بعض، أو حتى تديلها لعبة في إيديها بتحبها فتشغلها وتشتت عقلها عن التركيز في إنها مستنياكي تخلصي تلبيسها عشان تقلع.
- اسمحي بوقت محدد كل يوم تقعد فيه من غير لبس:
ده من الحلول اللي ممكن تلجئي لها في الآخر لو الحلول التانية ما نفعتش واللي الأخصائية النفسية “فينيسا لابونت” مؤلفة كتاب Discipline without Damage بتنصح بيه، وهو إنك تحددي قوانين وقت معين ومكان معين بس هو اللي تقدر تقعد فيه من غير لبسها عشان تشبعي حب الإكتشاف اللي عندها، مع التأكيد طبعًا علي الأماكن اللي لازم تتغطي في الجسم وهي اللي المايوه بيغطيها.
اقري هنا عن ألعاب ممكن تجربيها مع طفلك الدارج
وفي النهاية بقى أهم حاجة في كل الخطوات دي هي إنك تراقبي رد فعلك وما يكونش زايد لا بضحك وهزار، ولا بزعيق وعقاب، كل ما كنتي هادية وحازمة وردود أفعالك معتدلة على تصرفات الـ toddlers، كل ما كان التعامل معاهم أسهل.
التعليق باستخدام حساب فيس بوك