زمان حصل قصادي موقف في المدرسة، كان فيه ولد وبنت بيضايقوا بعض، فالولد فجاة قال للبنت قصاد كل اللي واقفين: “انتي أصلًا عندك شعر كتير في رجلك وشبه الولاد”، كنا وقتها صغيرين وأنا شخصيًا ما كنتش فاهمة غير إن البنت صاحبتنا مشيت وقعت تعيط وغابت كام يوم وما رضيتش تتكلم معانا في الموضوع بعد كده، وبعدها بأسبوع ما بقاش فيه شعر في جسمها.
موقف زي ده ممكن أي بنت على بداية البلوغ تتعرض له وتتعرض للسخرية أو المضايقة في المدرسة أو النادي أو أي مكان بتروحه بسبب تغيير طبيعي جيني في جسمها، وطبعًا من أكتر الحاجات اللي بتأثر نفسيًا على الطفل وتأثر على ثقته في نفسه هي التريقة على حاجة في شكله مالوش يد فيها ويحس إن مالهاش حل.
عشان كده واجبنا كأهالي هو الدعم لولادنا في أي وكل وقت باللي ولادنا محتاجينه، في الوقت المناسب ليهم، مش الوقت اللي مفروض يتعمل فيه، يعني ما استناش على إزالة الشعر وأسيب بنتي تعاني من التنمر والسخرية عشان في عرف عيلتنا مثلًا دي حاجة عيب إنها تحصل دلوقتي أو إن بنتي تعرفها أصلًا \ أو أؤجل لأسباب تانية سمعتها من بعض الأمهات وهي “أصل الشعر هيزيد أو هيتقل أو خطر إنه يتشال دلوقتي”، فالحل هنا إنك تتأكدي من طبيب مختص على اللي مخوفك وعلى أحسن طريقة أمان سواءً (تشقير أو كريمات إزالة الشعر أو استخدام المكنة أو السويت أو حتي الليزر لو سنها يسمح) عشان تقدري تدعمي بنتك صح ويصحح لك معلومات لو كانت غلط.
نصائح للتعامل مع بنتك ذات شعر الجسم الغزير
بس قبل كل ده، فيه شوية نصائح مهمة تعمليهم مع بنتك عشان ثقتها في النفس قبل إزالة الشعر:
- اتكلمي معاها في فرق اختلاف أشكال وألوان الناس عن بعض وإن ده طبيعي وإن اللي شايفه غريب وبيتريئ عليه هو اللي عنده المشكلة.
- اتفقي معاها على رد مناسب ودرّبيها عليه ازاي ترد لما تتعرض للتنمر بسبب الشعر اللي في جسمها.
- أكّدي عليها إنك هتدعميها وتساعديها في التصرف اللي يريحها لو عايزة تشيل الشعر ده بس علشان هي تكون مبسوطة ومرتاحة مش عشان الناس.
- اتكلمي معاها إنها جميلة في كل حالاتها، وإن ده شيء طبيعي، بيحصل لكل الناس بدرجات متفاوتة مش عيب فيها وساعديها تفضل دايمًا تحب شكل جسمها.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك