بنتي بتسألني عن الدورة الشهرية

ولادنا كل يوم بيكبروا وأسئلتهم بتكبر معاهم وقوة ملاحظتهم للي بيحصل حواليهم بتزيد كل يوم! وعلى حسب فضول وقوة ملاحظة كل طفل، بتبدأ الأسئلة اللي أوقات كتير بنشوفها أسئلة محرجة أو مش عارفين لها إجابة منطقية مناسبة لسنهم. فبنلجأ للحل السهل إما نشتتهم أو نقول أي كلام “مش حقيقي” بس المهم يسكتهم. ومن أهم المواضيع اللي بتتفتح من سن صغير هو السؤال عن البيريود (الدورة الشهرية) وسؤالهم “ماما مش صايمة ليه؟” وبالذات في عالم البنات لأن الكلام فيها بيبقى متداول أكتر بينهم وبيبقوا عندهم فضول امتى هابقى زي ماما. في المقال ده، هاقول لك أكتر أسئلة متوقعة من بنتك اللي سمعت عن البيريود وإجابتها بمنتهى البساطة.

عشان تكوين الجهاز التناسلي عند الولاد مختلف عن البنات، عشان البنت ربنا خلق عندها حاجة اسمها “الرحم” ده العضو المسؤول عن إنه يشيل البيبي في أمان جواه لما البنت بتكبر وتتجوز وتكون مستعدة لده. ودي معجزة من عند ربنا اختص بيها جسم البنات بس.

لما جسمك يتهيأ من جوا ومن برا إنه يوصل لمرحلة اسمها “البلوغ” وقتها أول مرة هتيجي لك البيريود وهتعرفي إنك كبرتي ووصلتي للبلوغ. ودي مرحلة جديدة بتنقلك من إنك طفلة لآنسة.

هنكون مستعدين بشنطة صغيرة معاكي دايمًا، فيها pads وملابس داخلية زيادة، وأي حاجة محتاجاها عشان تكوني مستعدة.

ومهم إنك تأكدي على بنتك إن دي حاجة مش عيب ولا تكسف ولا تحسس بالقرف. دي مجرد حاجة خاصة بس ولازم تكون فخورة بيها في جسمها.

خليكي حقيقية وما تحاوليش تجمّلي الموضوع واحكي لها عن مشاعرك وقتها بجد وعلى أي مخاوف حسيتي بيها واتعاملتي معاها ازاي.

البنت بتكون محتاجة تحس إن المجهول اللي هتدخل عليه ده شيء طبيعي وانتي كمان عديتي بنفس التحديات مش بتكلميها من برج عالي. وطبعًا ما تنسيش تحكي لها على الألم المتوقع تحس بيه وازاي بنتعامل معاه. وافتكري دايمًا إن مدام بنتك سألتك أي سؤال يخص جسمها أو أي سؤال في العموم يبقى هي مستعدة تسمع الإجابة.