فترة المراهقة زي ما بيقولوا كده هي مرحلة الوحش في تربية ولادنا، فترة بنقضيها واحنا حاطين إيدينا على قلبنا وبندعي ربنا تعدي بسلام ومن غير خساير. لأن الطفل، في الأغلب، بيكون فيها بيكتشف نفسه من جديد، وبيحاول يثبت نفسه وشخصيته بطرق مختلفة أوقات بتكون صح وأوقات بتكون غلط.
من التحديات اللي بتقابل الأهالي مع ولادهم فترة المراهقة هي التغيير في طبيعة اللبس، ومن التغييرات اللي بتقلق الأهالي أوقات بنشوف إن بنت تميل فجأة للبس اللي شكله ولادي أو رجالي، والولد يميل إنه يهتم بتفاصيله الجمالية وزي ما بنقول كده، الحنتفة الزايدة عن اللازم في الشعر واللبس والاهتمام بالبشرة.
وأول حاجة بتيجي في بال أمهات كتير، لما بيلاحظوا كده، هي إنهم بيقلقوا على الهوية الجنسية لولادهم، وبيخافوا أحسن يكونوا بيعانوا من اضطراب في الهوية الجنسية ومحتاجين تدخل. بس اللي عايزة أطمنكم بيه إن اضطراب الهوية الجنسية محتاج يكون ظاهر على الطفل أكتر من علامة عشان نطلب مساعدة متخصص مش بس إنه يكون بيحب يلبس لبس الجنس المعاكس.
إيه علامات اضطراب الهوية الجنسية للمراهق؟
- بيقولوا إنهم كانوا يتمنوا يكونوا الجنس المعاكس ليهم.
- بيبينوا زعلهم وإحباطهم لما بيظهر عليهم علامات البلوغ الخاصة بجنسهم.
- بيطلبوا من أصحابهم أو أهلهم يندهوا عليهم بأسامي أو ضماير الجنس المعاكس
- بيفضّلوا قعدة وكلام الجنس المعاكس طول الوقت، وبينفروا من كل حاجة تخص جنسهم الأصلي
- مع كل اللي فات، بيظهر كمان على المراهق علامات اكتئاب او قلق
- في بعض الحالات، بيلجأ المراهق لإيذاء نفسه
وطبعًا في الحالة دي، بتحتاجي لاستشارة طبيب نفسي متخصص للتدخل. والعلاج بيكون نفسي وأوقات بيصاحبه علاج هرموني.
عشان كده، مهم نفهم إن رغبة بناتنا وولادنا المراهقين مش لازم يكون ليها علاقة مباشرة بالهوية الجنسية، ولكن كمان ممكن يكون ليها خلفية نفسية منها إن الطفل اتربي في بيت فيه نموذج الراجل والبيت مشوهين، أو الأم بتتعرض للعنف من الأب، فبالتالي الطفل ممكن يكون رافض من جواه جنس معين وعايز يبقى عكسه أو حتى إن ده يكون تمرد طبيعي في فترة المراهقة ومحاولة لإثبات نفسه أو لفت النظر.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك