محتويات المقال
” بنتي بتلمس المنطقة الحساسة ولسه ما كملتش 3 سنين. بتنام على المخدة وتعمل حركات غريبة ومهما زعقت وفهّمتها إن كدة غلط، مش بتوقّف اللي بتعمله. ” أو ” طفلي يظهر عورته ” أو ” أسباب حك الطفل لعضوه ”
أي أم في الموقف دا غالبًا بتبقى حاسة بالقلق أو التوتر أو الإحراج من اللي بنتها أو ابنها بيعمله. الطفل في مراحل نموه المختلفة بيعدي بمرحلة استكشاف لجسمه. في أول سنتين، بيتعلم الطفل المشي والجري ويبدأ يكتشف الألوان، والأشكال، والأماكن، واكتشاف جسمه واحدة من المحطات الطبيعية لنموه.
البنت بتبدأ باكتشاف صوابعها ورجلها وودانها مثلًا وكمان أعضائها التناسلية. بس لما الطفلة بتوصل في رحلة اكتشافها للمنطقة الحساسة اللي بتكون في صورة اللمس أو الاحتكاك مع إيدها أو أي حاجة تانية زي مخدة أو طرف الكنبة أو السرير أو حتى الأرض أو عن طريق ضم عضلات الفخدين وقبضها وبسطها كذا مرة. في الوقت ده، الطفلة بتكون مركزة جدًا مع اللي بتعمله ووشها بيحمّر وبيعرّق وبعدها بتهدى أو بتنام. وقتها بيبدأ القلق من الأهل والسؤال: نعمل إيه يوقف البنات عن لمس جسمهم؟
أكتر سن بنشوف فيه ده من سنتين لأربع سنين. الموضوع ده أكتر في البنات عن الأولاد علشان كدة المقال ده علشان الأمهات إللي عندهم بنات والدراسات بتقول إن نسبة كبيرة منهم بتقف من 5 لـ 6 سنين. في المقال ده، هنقول لك عن أسباب لمس البنات للمنطقة الحساسة وممارستها للإشباع الذاتي وإزاي نقدر نعالجه.
هنا كمان ممكن تشوفي إمتى وإزاي أتكلم مع بنتي عن الدورة الشهرية
بنتي بتلمس المنطقة الحساسة باستمرار .. إيه الأسباب؟
- الاستكشاف: ودا من أهم الأسباب وأكترها انتشارًا زي ما قلنا. جزء طبيعي في نمو الطفل هو استكشاف كل حاجة حواليه وكل حاجة في جسمه، يلمسها، يشمها، يشد رجله يحطها في بقه.
- التقليد: إن الطفل يكون شاف مشهد وبيقلده، وده ممكن يحصل لو الأب والأم ما راعوش الاحتياطات الكفاية لسرية العلاقة بينهم أو التلفزيون وكتير من أفلام الكارتون بتحط مشاهد غير مقبولة. كمان إتاحة الإنترنت للطفل بلا رقيب بتخلي من السهل يشوف أي حاجة. في الفترة الأخيرة خاصة ظهرت فيديوهات لأشخاص حقيقيين بيقلدوا شخصيات كارتونية وبيدخلوا فيها سلوكيات كتير مش مناسبة تمامًا للأطفال.
- بعض الأطفال بتلجأ له كنوع من أنواع تفريغ التوتر والتهدئة أو لفت الانتباه. بعدها بيحسوا براحة فبيكرروا الموضوع.
- الاعتداء: ودا أخطر سبب، إن يكون فيه شخص اعتدى على الطفلة بإنه يكون عمل معاها كده أو حتى عمل قدامها. وفي كل الأحوال ده اسمه اعتداء جنسي.
- الالتهابات مش من الأسباب. ممكن الالتهابات تعمل حكة أو حرقان يخلي البنت عايزة تهرش ومن هنا تبدأ تاخد بالها من إنها تلمس نفسها أكتر.
إيه سبب تكرار الطفل للعادة دي بعد ما يكتشفها؟
- السبب الأساسي بيكون لأنه بيستمتع بدا وبيحس بالراحة.
- التهدئة الذاتية في حالات القلق والتوتر واضطراب النوم.
- الإحساس بعدم اهتمام الآخرين ومحاولة لفت انتباهم. لأنه لما عملها أول مرة استكشاف، كل اللي حواليه اتخضوا وجريوا وانتبهوا له فاكتشف إن دي طريقة فعّالة يكون بيها مركز اهتمام.
طيب مفروض نعمل إيه ونتصرف إزاي في الموقف ده؟
- أهم وأول حاجة نهدا ونبقى عارفين إن استكشاف الطفل لجسمه حاجة طبيعية ونتجنب ردود الأفعال القوية اللي هتخلي الطفل يتمسك أكتر بالعادة.
- التشتيت هو الحل، التشتيت عن الفعل مع إهمال الفعل نفسه زي إنك تنادي على الطفل وتطلبي منه يساعدك في حاجة. يجيب لك حاجة، تخلي إيدهم مشغولة معظم الوقت: كورة، بازل، صلصال، مكعبات. خليه هو كمان مشغول معظم الوقت. المهم ما تسيبيهوش فاضي أو زهقان أو إيده فاضية.
- تسمية الأعضاء التناسلية بأسماء واضحة عشان واحنا بنعلمه أو لو الطفل اشتكى لأي سبب نبقى فاهمين هو يقصد إيه بالظبط.
- قضي وقت معاهم أكتر. الوقت الخاص مهم جدًا وشاركيهم وقت يومي واحضنيهم كتير.
- لازم وقت الشاشات يكون محدد وتحت رقابة ومتابعة مننا.
أخيرًا بننصحك بطلب المساعدة من أخصائي نفسي للأطفال لو لاحظتي العلامات دي على بنتك أو ابنك:
- الطفل بيكرر ده بصفة مستمرة، وما بطلش بعد أكتر من شهر من المحاولات اللي نصحناكي بيها.
- بدأ يعمل دا لحد تاني أو بيطلب من حد يعمل له كدة.
- بيعمل دا بطريقة عنيفة أو ممكن تكون مؤذية.
- لو انتم كأب وأم مش قادرين تتعاملوا مع الموضوع بدون عصبية ومتوترين ومش عارفين تتصرفوا.
- وأخيرًا لو شاكين إن طفلكم شاف مشهد جنسي أو اتعرض لاعتداء جنسي.
1 comment
انا بنتي بتلمس كل جسمها مش تناسليه بس وكلمتها كذا مره براحه وابتديت ان ازعقلها لان بقت بتكررها كتير جداااا هي سنتين لسه