محتويات المقال
أوقات كتير وانتي في العربية وسايقة، أو وانتي قاعدة قبل ما تنامي، مجهدة ومش قادرة تقري، بس في نفس الوقت، قاعدة نص ساعة كده فاضية قبل النوم، بيكون فيه رغبة حقيقية عندك إنك تتسلي بحاجة بس ما تضيعيش عليها وقتك، تستفيدي منها وانتي بتتسلي. هنا بييجي دور البث المسموع أو التدوين الصوتي (معنى بودكاست) أو البودكاست، حاجة تقول لك معلومة ممكن توفر بيها عليكي قراية كتب، وفي نفس الوقت، هتقدري تعمليها وانتي سايقة، بتطبخي، أو مفرهدة. في المقال ده، جمعت لك 10 بودكاست بالعربي في مجالات مختلفة ممكن تسلي بيهم نفسك.
بودكاست عربي
- الصحة في دقيقتين
- نَفَس
- علاقات 101
- جرعات إيجابية
- وفر طاقتك
- ألف ليلة وليلة
- ذاكرة اليوم
- تعلم اللغة الإنجليزية
- قصص قصيرة للأطفال
- سينما كاست
لو ولادك معاكي في العربية، اعرفي هنا 9 ألعاب مسلية ممكن تلعبيهم مع ولادك في العربية.
الصحة في دقيقتين
لو بتحبي تتابعي أخبار الصحة وخصوصًا في التطورات اليومية، فبودكاست “الصحة في دقيقتين” من العربية هو دليلك. البودكاست بدأ في فبراير اللي فات، وتقدري تسمعيه على ساوند كلاود، سبوتيفاي، آبل أو جوجل بودكاست. لينك الوصول للبودكاست.
نَفَس
لو بتكوني تعبانة من كل الأصوات اللي بتسمعيها، وطول الوقت ودانك بتتحايل عليكي تسكّتي ولادك وتقعدي في مكان هادي، فنَفَس هيساعدك عشان توصلي للهدف ده من خلال إسماعك أصوات غير أصوات البشر، أصوات مجردة من المعنى وصوت السكوت. لينك الوصول للبودكاست.
علاقات 101
ازاي نتعرف على نفسنا وعلى شريكنا؟ ازاي نحب نفسنا وشريكنا؟ الوعي بالنفس، الحياة، الحب، الزواج، دي المواضيع اللي شاغلة بال نوف باوزير مقدمة بودكاست علاقات 101، ودي الأسئلة اللي بتحاول تجاوبها في البودكاست. لينك الوصول للبودكاست.
جرعات إيجابية
لو تعبانة من الدنيا ومش شايفة إلا شكاوي في كل مكان، اسمعي بودكاست جرعات إيجابية اللي بيحاول يعرّفك على الحياة وجوانبها المشرقة ويديكي زي ما بيقول العنوان كده “جرعات إيجابية”. لينك الوصول للبودكاست.
وفّر طاقتك
البودكاست ده بيناقش أهم مهارات الذكاء العاطفي اللي بتأثر على شعورنا بالسعادة وتحقيق الذات وبناء العلاقات الطيبة، مع رولا الكيلاني. لينك الوصول للبودكاست.
ألف ليلة وليلة
لو بتحبي الحكايات والقصص، اسمعي هنا حكايات وقصص من ألف ليلة وليلة والسندباد وجحا وغيرهم كتير من الحكايات والقصص القديمة. لينك الوصول للبودكاست.
ذاكرة اليوم
فاكرة زمان لما كنا بنقرا في الجرنال أو نسمع في الراديو “في مثل هذا اليوم”؟ أهيه دي فقرة في مثل هذا اليوم بقى، اعرفي عن الأحداث اللي حصلت أو الناس البارزة اللي اتولدوا أو ماتوا في اليوم ده. لينك الوصول للبودكاست.
تعلم اللغة الإنجليزية
لو بقالك فترة بتدوّري على مكان تروحي تاخدي فيه كورس أو طريقة تطوّري بيها مهاراتك اللغوية، فممكن توفري على نفسك جهد التدوير وتسمعي بودكاست تعلم اللغة الإنجليزية مع السفارة الأمريكية في الأردن. لينك الوصول للبودكاست.
قصص قصيرة للأطفال
لو عايزة وقت الشاشات بتاع ولادك يكون مفيد، ممكن تخليهم يسمعوا فيه البودكاست ده عشان يسمعوا حواديت وقصص تفيدهم في سنهم. وممكن تتناقشي معاهم بعد القصة عن اللي فهموه أو استفادوه من القصة. لينك الوصول للبودكاست.
سينماكاست
لو ليكي في السينما وبتحبي تسمعي ريفيوهات عن أفلام قديمة وجديدة، اسمعي سينماكاست اللي مش بس بيعملوا ريفيوهات، دول كمان ساعات بيربطوا بين أكتر من عمل سواءً سينمائي أو سينما وكتاب. لينك الوصول للبودكاست.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك