بيوصل بينا التفكير في النحافة والخوف من السمنة لعمل كتير من الرجيمات القاسية، وللخوف من الأكل. بس هل فكرتي إن فيه أشخاص حوالينا بيعانوا لأسباب كتير من خوف من الأكل؟ الخوف ده بيكون في شكل اضطرابات الأكل النفسية الخطيرة بنوعين مختلفين ما بين شره وانهيار على الأكل وبعدين تعمد القيء عشان يتخلصوا منه، وده اضطراب اسمه “بوليميا نرفوزا” وما بين فقدان عصبى للشهية تمامًا وعدم الأكل إلا في سعرات معدومة ونحافة مفرطة، وده برضه اضطراب بنفس الخطورة اسمه “أنوريكسيا نرفوزا”.
بيعيش حوالينا أشخاص كتير عندهم الاضطرابات النفسية دي، وانتي ما تعرفيش أو شايفة بس مش واخدة بالك إن الموضوع خطير ومحتاج تدخل طبي نفسي ومساعدة من الأهل وخصوصًا لو السبب كان تراكمي نفسي. هتسأليني وهاعرف ازاي؟
لو انتي على السوشال ميديا، اعرفي من هنا حسابات ترفع وعيك النفسي
مرض بوليميا (النهم العصبى) / اضطراب الأكل القهري
قالوا عنه “مرض السيدات الراقيات” عشان أصيبت بيه الأميرة ديانا وسيدة كندا الأولى صوفي. هو نوع من الاضطراب العاطفي وبيطلع على شكل نوبات أكل بشراهة لكل أنواع الطعام، لكن بعدها بيتخلص الشخص من الأكل ده بإنه يتقيأ أو يستخدم ملينات، ودايمًا بياكل بكميات كبيرة في السر، وبيستخبى من أهله ويرجّع عشان بيخاف على وزنه.
هتعرفيه ازاي؟!
- بيجبر نفسه على الترجيع عشان يتخلص من الأكل الكتير.
- بياخد ملينات كتير عشان يدخل في حالة إسهال شديدة تخليه يتخلص من الأكل اللي في معدته.
- بيدخل في حالة من تأنيب الضمير، فبيضطر يعمل رجيم قاسي أو يصوم عن الأكل تمامًا، وبعدين يرجع تاني في نفس الحالة.
ليه بيوصل للحالة دي؟
زى ما قلنا، هو اضطراب عاطفي سلوكي أو عدم شعور بالأمان أو فقدان الثقة بالذات، وممكن يكون الشخص ده بيتعرض للإهانة، والأهم الخوف من التنمر بسبب زيادة الوزن والخوف من اكتساب وزن زيادة مع فكرة إن أصلًا الشخص ده خايف ومضطرب وبيلجأ للأكل كمصدر للأمان، وبعدين يتخلص من الأكل عشان خايف من زيادة وزنه. وبيفضل فى الدايرة دي. وده ممكن يوصل الشخص لحالة اكتئاب شديد بالتدريج.
مرض أنوريكسيا (فقدان الشهية العصبي)
زي البوليميا، المصابين بأنوريكسيا هم أشخاص يملكون صورة مش صحية عن جسمهم وعقلهم اللاواعى رافض شكل جسمهم ودايمًا خايفين من الأكل. لكن عكس البوليميا، دول بياكلوا سعرات معدومة، ومهما بلغوا من النحافة بيعتقدوا إن وزنهم زايد، وإن الناس شايفاهم مليانين، وبيفضلوا يجوّعوا نفسهم لحد الموت أحيانًا.
هتعرفيه ازاي؟
- نحيف جدًا ودايمًا خايف ياكل وبيقول مبررات كتير فى المناسبات عشان ما ياكلش.
- لديهم حالة هزال شديد وشعر متساقط. ولو بنت، هيبقى عندها لغبطة شديدة في الدورة الشهرية .
- بيرفض كل الخروجات ودايمًا لابسين لبس واسع اعتقادًا إن كده هيخبي جسمه.
ليه بيوصل للحالة دى؟!
هم عادةً أشخاص بيعانوا من التوتر والقلق المزمن تجاه المثالية في كل شىء، وما عندهمش ثقة في النفس وبيترجموا ده بإنهم يسيطروا على الشعور بالجوع فبيحسوا بانتصار فى الامتناع عن الأكل. ومنهم اللي اتعرض للتنمر مثلًا في سن صغيرة على وزنه الزائد، وخصوصًا البنات في سن المراهقة (وهم الأكثر إصابة)، فبيحرموا نفسهم من الأكل للوصول إلى النحافة. وبرضه بيشتركوا مع مريض البوليميا في التقيؤ المستمر. ومع زيادة الحالة، بيدخل الشخص في حالة عزلة شديدة وضعف وهزال وبرضه هيدخل مع الوقت في حالة اكتئاب شديد.
هل الأطفال ممكن يصابوا بالاكتئاب زي الكبار؟ اعرفي من هنا
بعد ما فهمنا الحالتين وإنهم أمراض نفسية خطيرة لكن مستخبية، ونهايتها الاكتئاب الحاد والعلاقات الاجتماعية السيئة، هنعمل إيه؟
علاج اضطرابات الأكل النفسية
أول حاجة، بلاش تستهيني بأي شخص بيمر بحالة من دول، ولازم تتكلمي معاه وتطمنيه، وبعدين تعرضيه على أخصائي نفسي للمساعدة والعلاج الطبي، ومش هننسى الدعم الأسري. بلاش ننسى كمان إنها أمراض نفسية سببها الخوف وعدم الأمان الاجتماعي أو التنمر في الصغر على شكل الجسم أو علاقة سيئة مع المجتمع كان نتيجتها علاقة سيئة بالأكل. الأخصائي النفسي هيقدر يساعد المرضى مع دعم الأسرة والأصدقاء في تصحيح مفاهيم التغذية والعلاقة بالأكل مع لعب رياضة بسيطة والأكل وسط لمة الأصدقاء والعيلة وحب الذات.
التعليق باستخدام حساب فيس بوك