“ما احنا اتضربنا وطلعنا زي الفل” جملة تاريخية عقيمة بتتوارث عبر الأجيال لمؤيدين استخدام الضرب في تربية الأطفال. وقتها أول رد بيخطر في بالي الحقيقة هو “إيه تعريف زي الفل بالنسبة لك؟” ما نقدرش نلوم على الأجيال السابقة من الأهالي اللي كانوا بيستخدموا الضرب في التربية لأن يمكن ما كانش عندهم الوعي الكفاية ولا سهولة الوصول للمعلومات ولا مصادر علوم التربية اللي موجودة في كل مكان دلوقتي. لكن اللوم كله هيكون على أب وأم بيربوا في زماننا ده. بيربوا في وقت التحديات فيه زادت ولكن زاد معاها انتشار العلم والوعي، واللي بضغطة زرار تقدر تقرأ وتعرف إن الضرب ده ممكن يكون أسوأ وأكبر غلطة بتعملها في تربيتك لولادك! تعالوا نعرف تأثير الضرب على الأطفال.
طرق عقاب الأطفال الصحية حسب كل سن
تأثير الضرب على الأطفال
-
طريقة استجابة مخ الطفل:
في دراسة حديثة اتعملت في جامعة هارفارد على 147 طفل جزء منهم اتعرض للضرب في سنوات حياته الأولي وجزء لا. بينت النتايج باستخدام الرنين المغناطيسي على المخ، إن حصل تغيير في استجابة دماغ الأطفال اللي اتعرضوا للضرب وزيادة في نشاط الجزء المسؤول عن تنظيم الانفعالات والتحذير من التهديد، لدرجة بعض الأطفال بينت عندهم نشاط في الدماغ مشابه لاستجابة الدماغ للتهديد والمواقف الشبيهة بالاعتداء الجنسي! فأنت متخيل إيه مستوى التهديد والخوف والتوتر اللي ممكن تكون بتعرض له طفل بتضربه عشان متخيل إنك كده بتربيه وهيكون أحسن و”زي الفل”؟
-
عدواني صغير:
طبعًا حدث ولا حرج بإن الطفل اللي بيتضرب أول حاجة بيعملها للأضعف منه وأسهل طريقة للتواصل بالنسبة له هي الضرب. غير إن الطفل اللي بيتضرب بيكبر جواه طاقة غضب ورغبة في الانتقام بتخلّي سلوكه عصبي وعنيف وعنيد مع كل اللي حواليه.
-
مريض نفسي كبير:
بيكبر الطفل اللي بيتضرب وسط دايرة من القلق والخوف وإحساسه بالضعف وقلة الحيلة. ودي كلها مشاعر سلبية فتفضل تتفعل على مدار السنين وتأثر على كل جوانب حياته، هو بيتضرب عشان يسمع الكلام من وجهة نظر الكبار بس كطفل كل اللي بيتخزن في دماغه إنه بيتضرب عشان الكبار دول ناس مؤذية، عشان دايرة أمانه ده مخيفة ومالهاش علاقة بالأمان.
-
الثقة في النفس:
الضرب بيفقد الطفل تقديره لنفسه وبيخليه ضعيف خايف يتصرف أو يقول رأيه أحسن يتضرب. والمشاعر ده بتقلل من الذكاء الاجتماعي للطفل وتخليه يفقد الثقة في نفسه وبالتالي كمان بيكون مراهق سهل الانقياد ورا أي حد.
-
صورته عن نفسه:
“أنا باتضرب عشان أنا مش محبوب” / “بيضربوني عشان أنا وحش” وطبعًا يا سلام لو الضرب ده مُطعّم بشوية تهزيء وشتيمة يأكدوا أكتر للطفل إنه مايستاهلش. رسايل سلبية بتفضل توصل للطفل اللي بيتضرب تخليه هو شايف نفسه مش كفاية. مهزوز وحاسس إنه لازم يعمل حاجة عشان يكون قد توقعات الكبار. وبالتالي صورته عن نفسه دايمًا هتكون سلبية ومستنية تأكيد إيجابي من اللي حواليه.
وأخيرًا لو بتضربوا عيالكم، أرجوكم وقّفوا فورًا لإن حتى لو مقتنعين إن الضرب بيحقق لكم نتيجة سريعة في سلوكيات الطفل، فده حل مؤقت على المدي القصير، ولكن في المقابل احنا بندمر ولادنا على المدى البعيد. افتكروا دايمًا إنكم مصدر الأمان لولادكم في الدنيا دي فما تخلوش دايرة الأمان دي تتحول لدايرة خوف ورعب منكم!
التعليق باستخدام حساب فيس بوك