أسباب كتير ممكن تدفع الأم الحامل إنها تاخد دواء فيه كورتيزون لكن بيفضل جواها قلق بخصوص تأثير الكورتيزون على الحمل وعلى البيبي كمان. لذلك جمعنا لك كل المعلومات اللي ممكن تحتاجيها عن الكورتيزون وتأثيره خلال فترة الحمل في المقال ده.
تأثير الكورتيزون على الحمل
بدايةً لازم نعرف إن استخدام الكورتيزون أثناء الحمل مفروض ما يحصلش إلا إذا كانت الفايدة الطبية المنتظرة منه أكبر من المخاطر اللي بيشكلها على الجنين. وعمومًا المخاطر بتتقاس بالاستخدام، هل هو طويل أو قصير الأمد؟ فلو كان مجرد استخدام بسيط قبل الولادة للوقاية من متلازمة ضيق التنفس “حقنة الرئة” فهي مش بتمثل خطر على البيبي، بالعكس هي بتساعده.
- التهابات المفاصل الروماتويدية
- اضطرابات الدم
- التهاب الأمعاء
- اضطرابات جهاز المناعة
- ردود الفعل التحسسية
- بعض الأمراض الجلدية
- بعض أنواع السرطان
أما لو الأم مصابة بمرض معين يستلزم إنها تاخد الكورتيزون لوقت طويل زي:
فلازم يكون في متابعة مع الطبيب المختص، عشان يحدد الجرعة والوقت ومدى الحاجة للكورتيزون من عدمها.
أضرار الكورتيزون على الحمل
أهم نقطة وقبل أي كلام لأي أم بتستخدم الكورتيزون أثناء الحمل إنها ما توقفهوش فجأة. يعني لو بتاخدي كورتيزون واكتشفتي إنك حامل، فبنحذرك من إنك توقفيه فجأة. أولًا لأن الخطر بيكون ضئيل جدًا على البيبي. وثانيًا لإن الفايدة اللي بتعود عليكي كأم أكبر من الأضرار اللي هتحصل لما توقفيه فجأة.
الاستخدام طويل الأمد خلال فترة الحمل للكورتيزون ممكن يكون سبب في المشاكل الطبية التالية. لكن قبل ما تقرأي نحب نقول لك إنك الموقع الرسمي للمعلومات حوالين الكورتيزون بتطمنك وبتقول لك إن المضاعفات مع الأطفال حديثي الولادة بتكون قليلة جدًا (المقال في المصادر). ومع ذلك اللي هنذكره دلوقتي كانت بعض الملاحظات، يعني حصلت لكن بنسب:
- تأخر النمو داخل الرحم
- انخفاض الوزن عند الولادة للأمهات اللي أخدوا جرعات عالية من الكورتيزون أو “الكورتيكوستيرويدات”.
- كبت قشرة الغدة الكظرية عند الطفل المولود
- تقلص الرحم وزيادة السوائل عند الأم
- انخفاض في المشيمة
إيه الحل؟
لازم تعرفي إن الكورتيزون أنواع وأشكال، منها أنواع آمنة ومناسبة مع الحمل، انتقالها من خلال المشيمة منخفض، ومنها أنواع غير آمنة، لذلك الطبيب هو الأقدر على اتخاذ القرار.
في النهاية، حابّين نقول لك ما تبقيش قاسية مع نفسك، وما تحكميش على نوعية الأدوية اللي تاخديها بناءً على معلوماتك الشخصية. ارجعي دايمًا للطبيب لأنه أكتر شخص قادر يحدد فعلًا احتياجاتك بناء على حالتك الصحية.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك