محتويات المقال
فيروس كورونا هو أهم حاجة شاغلانا كلنا دلوقتي وفي ناس كتير بقى عندها هلع ورعب منه لأنه لسه جديد والطب لسه ما وصلش لمعلومات أكيدة عنه ولا الأدوية اللي بتعالجه. وإذا ده حال كل البشر عمومًا، فالحامل هتكون مهتمة أكتر بكل ما يخص فيروس كورونا وأعراضه وتأثيره على الجنين وعلاقته بالولادة والرضاعة الطبيعية، علشان كده في المقال ده جمعنا لك كل الأسئلة اللي تهمك عن مرض كورونا COVID-19 وإجاباتها اللي نشرتها الكلية الملكية لأطباء التوليد وأمراض النساء والكلية الملكية للقابلات والكلية الملكية لطب الأطفال وصحة الطفل في انجلترا واسكتلندا، علشان تفضلي مطمنة على صحتك وصحة جنينك وتعرفي تتصرفي في حالة الطوارئ.
إيه تأثير فيروس كورونا على الحامل؟
زي ما كلنا عارفين إن الفيروس ده جديد، فتأثيره الحقيقي على الحوامل لسه مش واضح لحد دلوقتي، بس ممكن تظهر أعراض زي أعراض الإنفلونزا الخفيفة أو المتوسطة، لكن لو بتعاني من ضعف المناعة، ممكن تظهر أعراض حادة زي الالتهاب الرئوي. ولحسن الحظ ما اتسجلتش حالات وفيات بسبب فيروس كورونا بين النساء الحوامل في الوقت الحالي، لكن ده لا يعني إنك تهملي في الأخد بالاحتياطات.
لو الحامل أصيبت بفيروس كورونا، إيه تأثير ده على الجنين؟
مفيش أي دليل طبي بيقول إن ممكن يحصل إجهاض أو إن الفيروس بالتأكيد هيتنقل للجنين أو يسبب له تشوهات إذا كانت الحامل مصابة بمرض كورونا بالفعل. وكل الحالات الولادة المبكرة اللي حصلت في الصين ما كانش واضح إن سببها هو فيروس كورونا.
إزاي أقدر أقلل خطر إصابتي بفيروس كورونا؟
أهم حاجة ممكن تعمليها هو غسيل إيدك كويس وبانتظام بمجرد عودتك من الأماكن العامة أو استخدام محلول إيثيلي 70% وتجنب الأماكن الزحمة والنزول من البيت للضرورة بس.
هاسافر وأنا حامل، أعمل إيه؟
لو كنتِ في بلدك، فالتزمي بالنصائح اللي بتقدمها وزارة الصحة، ولو هتولدي برا بلدك، اتأكدي من الإجراءات الصحية المناسبة لكِ ولطفلك في البلد اللي هتولدي فيه.
أعمل إيه لو حسيت إني عندي مرض كورونا؟
لو كنتِ حامل وحرارتك مرتفعة وكحة جديدة مستمرة، فاعزلي نفسك في البيت لمدة 7 أيام، واتصلي بدكتورك أو المستشفى اللي هتولدي فيها وبلغيهم بالأعراض اللي عندك وإنك حاسة إنها فيروس كورونا. لو ما اتحسنتيش خلال الـ 7 أيام أو حالتك زادت سوء أو خفتي تولدي خلال فترة وجودك في البيت، فلازم تبلغي دكتورك بأقصى سرعة.
إزاي هاعمل فحص فيروس كورونا؟
هيتم فحص الأشخاص اللي بيعانوا من أعراض شديدة ومحتاجين دخول المستشفى. فلو كنتِ محتاجه لده، هيتم فحصك زي الفحص العادي لكل الأشخاص وبيتم أخد مسحات من الفم والأنف.
أعمل إيه لو اتأكدت من إصابتي بفيروس كورونا؟
لو نتيجة فحصك إيجابية، فلازم تبلغي دكتور النساء والتوليد اللي متابع حملك، علشان لو عندك أعراض خفيفة هيتم عزلك ذاتيًا في بيتك. ولو الأعراض حادة، هيتم علاجك في المستشفى.
أعمل إيه لو الدكتور طلب من أعزل نفسي؟
لازم تلتزمي بإجراءات العزل اللي هي:
- ما تروحيش شغلك أو الأماكن العامة أو تركبي مواصلات.
- خليكي في بيتك واعتذري لضيوفك (ما تستقبليش حد).
- حافظي على تهوية البيت وافتحي الشبابيك على قد ما تقدري.
- اعزلي نفسك عن بقية أفراد الأسرة قدر الإمكان، وما تستخدميش المناشف (الفوط) والأواني الخاصة بيهم.
- اطلبي من الناس اللي حواليكي يقوموا بالمهمات الخارجية بدون ما يختلطوا بيكي.
- مارسي الرياضة عن طريق الإنترنت علشان تحافظي على نشاطك.
لو كنت في العزل الذاتي، هل أقدر أروح مواعيد المتابعة الطبية للحمل؟
لازم تقولي لدكتورك الأول قبل ما تروحي، وغالبًا هيؤجل الموعد لكن إذا كانت حالتك طارئة، هيرتب لكِ ترتيبات خاصة زي إنه تروحي له في عيادة مختلفة أو في وقت ما فيهوش مرضى غيرك.
إزاي هتتم رعايتي بعد ما أتعافى من الإصابة من فيروس كورونا؟
هيتم فحصك بالموجات فوق الصوتية بعد 14 يوم من التعافي علشان تتأكدي من صحة جنينك، بس ما تقلقيش ولادتك مش هتتأثر بمرضك السابق بكورونا.
هل تؤثر العزلة الذاتية على كيفية الولادة؟
لحد دلوقتي مفيش كلام طبي واضح إن الولادة الطبيعية ولا القيصرية أحسن إذا كانت الحامل مصابة بفيروس كورونا. لكن في حالة إنك عندك أعراض شديدة في جهازك التنفسي، فممكن دكتورك ينصحك بالولادة القيصرية.
أعمل إيه لو جالي الطلق وأنا في فترة العزل الذاتي؟
في الحالة دي، تتصلي بدكتورك فورًا تبلغيه، وهو هيطبق التوصيات العامة لدخولك المستشفى اللي هي:
- هيتم توصيلك للمستشفى في وسيلة نقل خاصة قدر الإمكان.
- هيقابلوكي عند مدخل غرفة العمليات بقناع وجه طبي مناسب وهتفضلي لابساه لحد ما يتم عزلك في غرفة خاصة.
- هيتم عمل اختبار فيروس كورونا.
- زوجك أو والدتك هيقدروا يفضلوا معاكي طول الوقت لكن هيتمنع دخول الزوار ليكي.
هل سيتم اختبار طفلي لفيروس كورونا؟
طبعًا، علشان يتأكدوا من عدم إصابته بفيروس كورونا خاصةً إذا كنتِ مصابة بالمرض في فترة حملك.
هاقدر أرضّع طفلي لو كنت مصابة بفيروس كورونا؟
لحد دلوقتي مفيش دليل طبي بيقول إن العدوى بتتنقل من حليب الأم للطفل. علشان كده الأطباء بينصحوا بالرضاعة الطبيعية لأن فوائدها أهم من الخوف على إصابة الطفل بفيروس كورونا. لكن الخطر الرئيسي في الرضاعة الطبيعية هو الاتصال بينك وبين طفلك وقرب وشكم من بعض. علشان كده لازم تتناقشي في موضوع الرضاعة الطبيعية مع دكتورك ودكتور الأطفال. لو اخترتِ إنك ترضعي طفلك صناعي، فلازم تتبعي إرشادات التعقيم بشكل صارم.
ولو اخترتِ الرضاعة الطبيعية، فلازم تاخدي بالاحتياطات دي:
- اغسلي إيديكي كويس جدًا قبل لمس طفلك أو الببرونات او مضخة الثدي.
- تجنبي العطس والكحة على طفلك وقت الرضاعة.
- البسي الكمامة وقت الرضاعة على قد ما تقدري.
- التزمي بوصفات تعقيم مضخة الثدي حرفيًا بعد كل استخدام.
مع أطيب تمنياتنا لكِ ولطفلك بالسلامة والصحة.
1 comment
[…] تأثير فيروس كورونا على الحامل والمرضع […]