من الحاجات المؤرقة لنا كأمهات هي يا ترى ولادنا البيبيهات ماشيين بتقدم طبيعي مع اللي في سنهم في الكلام والمشي والحركة والتسنين، بنبقي مهتمين نتابع علطول تطورهم ومراقبين طبيعي ولا متأخرين. ومن أكتر التساؤلات اللي بتيجي في دماغنا “إمتى مفروض أطلب المساعدة وإمتى طفلي يعتبر متأخر عن اللي في عمره؟” عشان كده، في المقال ده، هنقول لك إمتى تعرفي إن طفلك بيعاني من تأخر الكلام أو المشي أو التسنين.
تأخر الكلام عند الأطفال
يا تري ابني\بنتي متاخر في الكلام؟
الحصيلة اللغوية والكلام بالذات من أكتر الحاجات اللي بتفرق من طفل للتاني وليها عوامل كتير زي ترتيب الطفل وسط أخواته لأن كل ما كان البيت فيه أطفال أكبر كل ما البيبي اتعلم منهم واتشجع يتكلم أسرع، وبتفرق كمان لو الأم بتتكلم مع الطفل كتير وبلغة واضحة وصح، ده بيحفز مخه على التخزين أكتر وعلى التجاوب معاها، وبيبدأ الطفل يتمتم بكلمات بسيطة في نهاية السنة الأولى والسنة التانية لحد ما يقدر يكون بعض الكلمات بوضوح في النص التاني من السنة التانية. ونقدر نعتبر الطفل متأخر في الكلام لو كانت حصيلته اللغوية أقل من عشر كلمات في سن سنة ونص لـ سنة و 8 شهور، أو أقل من 50 كلمة في سن 21 شهر إلى سنتين ونص.
تأخر التسنين عند الأطفال
يا تري ابني\بنتي متأخر في التسنين؟
التسنين بيبدأ للطفل من عمر ست شهور لحد عمر سنة وشهرين، وبتختلف من طفل للتاني على حسب طبيعته وطبيعة سماكة اللثة عنده، وفي الطبيعي الأسنان الأمامية السفلية بتظهر في الفم قبل العلوية. ونقدر نعتبر الطفل متأخر في التسنين ومحتاج تدخل من طبيب الأسنان لو أتم السنة ونص ولسه مفيش ولا سنة ظهرت في بقه. وأحب أقول لك من تجربتي كأم إن الطفل كل ما يتأخر في التسنين وتبدأ أسنانه في الظهور متأخر، كل ما كانت أعراض التسنين أقل وقوة تحمل الطفل أكبر.
تأخر المشي عند الأطفال
يا ترى ابني\بنتي متأخر في المشي؟
بيبدأ الطفل يحاول في المشي بداية من سن 7 شهور لحد سن سنة وشهرين تقريبًا وقت محاولاته للسند على الكنب أو اللي حواليه، وطول ما البيبي بدأ يحاول يمشي قبل ما يتم سنة ونص، فيبقى كده في الإطار الطبيعي. طبعًا مع مراعاة الفروق الفردية بين الأطفال، والبيئة المحيطة بالطفل ممكن تكون بتشجعه على المشي أو لا، أو على حسب تكوين الطفل لو جريء أو بيحسب كل خطوة وبيخاف على نفسه.
عشان كده، مفيش سن معين يبقى المفروض البيبي يمشي فيه، لكن لو بعد ما يتم سنة ونص، ما حاولش يمشي ولا يتسند على الأشياء حواليه خالص. وقتها هيكون متأخر في المشي وهتكوني محتاجة تستشيري طبيب عشان تتأكدي إن مفيش حاجة عضوية تمنعه.
التعليق باستخدام حساب فيس بوك