محتويات المقال
تطور مهارات الأطفال في السنين الأولى من عمرهم بيختلف طبيعته من طفل للتاني. لكن الفترة الأخيرة، وبعد قعدتنا في البيت وقت طويل، بدأنا نشوف أمهات كتير بتشتكي من تأخر الكلام عند الأطفال، وكتير بيبقوا محتارين هو أصلًا كده الطفل متأخر في النطق ولا عادي؟ وامتى أحتاج لاستشارة متخصص في علاج تأخر النطق عند الأطفال وازاي أساعد ابني على الكلام والنطق.
-
امتى أعرف إن طفلي متأخر في الكلام؟
أنا دايمًا بانصح الأم إنها تثق في إحساسها الداخلي لإنه غالبًا بيكون صادق، لكن برده أوقات قلقنا الزيادة بيصور لنا حاجات مش حقيقية أو بيكبّرها قدامنا. فعشان كده، لازم تعرفي العلامات اللي بتبين لك طفلك تقدمه في الكلام كويس ولا لأ.
- النطق عند الأطفال عند سن السنة:
بيبدأ يحاول يقلد الأصوات، كلمات قليلة زي (ماما، دادا)، يقدر يستجيب للأوامر البسيطة زي (سقف/تعالي)، وفي نهاية السنة ونص، بيكون عنده حصيلة كلمات في حدود عشر كلمات.
- النطق عن الأطفال عند سن سنتين:
الطفل مفروض يكون عنده حصيلة كلمات خمسين كلمة تقريبًا، بيقدر يكوّن جملة من كلمتين زي (أروح باي) / (أشرب مياه)، ويكون كمان بيفهم الأوامر والأسئلة البسيطة اللي بتتقال له وبيحاول يقلدها.
- النطق عند الأطفال عند سن 3 سنين:
يكون الطفل بيتكلم تقريبًا 200 كلمة أو أزيد، بيقدر يكوّن جملة من تلات كلمات، بيقدر يعبر عن نفسه أو يطلب الطلبات البسيطة. بيتفهم من اللي حواليه أو على الأقل، يكون الأب والأم قادرين يفسروا ويفهموا أغلب كلامه.
ممكن تشوفي هنا أسباب تأخر التسنين عند الأطفال
-
طيب إيه أسباب تأخر الكلام عند الأطفال؟
- بعض الأطفال اللي نموها العقلي والجسدي وتطورها سليم، ممكن يكون بسبب وجود مشاكل في الفم زي اللسان المربوط اللي أطفال كتير ببتولد بيه.
- لما بيكون فيه مشكلة في مناطق الدماغ المسؤولة عن الكلام، بيكون التنسيق بين اللسان والشفايف والفك صعب عشان الطفل يقدر يكوّن أصوات الكلام.
- مشاكل السمع كمان والتهابات الأذن من أكتر الأسباب اللي بتأخر الكلام عند الأطفال.
- اضطراب طيف التوحد.
- كتر التعرض للشاشات من سن صغير وقلة الكلام مع الطفل وخاصةً لو طفل وحيد.
أفعال صغيرة ممكن تطلع من الأطفال واحنا ما ناخدش بالنا منها. علشان كده، مهم إنك تشوفي الموضوع ده ألعاب جنسية عند الاطفال
-
علاج تأخر الكلام والنطق عند الأطفال: إزاي أساعد طفلي على الكلام والنطق؟
طبعًا أول حاجة بننصحك بيها هي إنك تلجأي للمتخصصين وتتطمني إن طفلك مش بيعاني من أي مشكلة وإنك تقدري تساعديه في البيت ونشجعيه علي الكلام من غير تدخل من طبيب أو أخصائي تخاطب. بعد ما تتطمني، تقدري تعملي الخطوات دي في البيت مع طفلك:
- تقليل وقت الشاشات بصورة كبيرة، ولو الطفل أقل من سنتين، يا ريت ما نعرضهوش لشاشات خالص. ولو مضطرين تكون حاجات تعليمية يتطلب منه فيها يردد الكلمات أو يعد الأرقام أو يقول الأوان. المهم إنه يكون بيتفاعل مش بيستقبل بس.
- زودي تواصلك مع طفلك، غنّي له وشجعيه يقلدك. وقت اللعب مع الطفل يكون تركيزك كله معاه، والعبي بأصوات تصويرية لصوت الحيوانات أو العربية أو غيرها وشجعيه يقلدك.
- اتكلمي معاه طول الوقت، حتى لو حاجة متخيلة إنه مش هيفهمها. شاوري له على كل حاجة بتعمليها وقولي اسمها، ومهم يكون كلامك واضح وهادي. ولما يطلب منك أي طلب ويشاور عليه أو يعيط، افضلي كرري في اسم الحاجة اللي عايزها.
- القراية مهمة جدًا للأطفال من أول ما يتولدوا. بتنمي مهاراتهم بصورة هايلة، ابدأي بالكتب الملونة اللي ملمسها يلفت نظر الطفل وصورها كبيرة وابدأي قولي الكلمات وشاوري علي الصور وكرري ده كله في نفس الكتب.
بالوقت وبالاستمرار في التواصل مع الطفل، وعدم تعرضه لشاشات وقت كبير، هيتكلم ومش هتبقي ملاحقة علي رغيه. المهم تتطمني من طبيبك إن مفيش مشكلة عضوية أو عقلية.
التعليق باستخدام حساب فيس بوك