المدة الطبيعية للحمل بتتراوح من 37 لـ 42 إسبوع، والحساب بيكون بالأسابيع مش بالشهور، لإن ده الأدق، ودي الطريقة اللي اتفق عليها الأطباء. وبيبدأ القياس من أول يوم في الحمل، وده بيتعرف من حساب تاريخ آخر دورة شهرية، وأغلب السيدات الحوامل بيتوقع لهم الولادة في الأسبوع الـ 40 للحمل، لكن إيه اللي ممكن يخلي فيه طول الحمل أو تأخر الولادة بعد الشهر التاسع أو عن الأسبوع الأربعين؟ ده اللي هتعرفيه في المقال ده:
-
إمتى نقول إن حصل تأخر الولادة؟
لما الحمل يوصل لـ 42 إسبوع وما يكونش لسه في أي أعراض للولادة الطبيعية، ودي بتحصل بنسبة 10% من السيدات الحوامل، ودي مش حالة خطيرة، لكن مهم جدًا يكون الطبيب متابع معاكي، لإن لو زاد الوقت أكتر من كده ممكن تتسبب في مضاعفات خطيرة توصل لوفاة الجنين لا قدر الله.
-
أسباب تأخر الولادة بعد الشهر التاسع
- الحساب الخاطئ: يعني ما يكونش في تأخر ولادة ولا حاجة، ويكون حساب أسابيع وأيام الحمل من الأول مش مزبوط، وده بنتجنبه إننا ما نعتمدش في الحساب على الدورة الشهرية لوحدها، لكن من تطور الجنين اللي بيبان في السونار بنعرف إلى حد كبير عمر الحمل.
- أسباب وراثية: فلو الأم والأخت أو الخالات والعمات، معروف عندهم حالة تأخر الولادة بعد الإسبوع التاسع، فده محتمل جدًا إنه يحصل معاكي.
- الحمل الأول: احتمالات تأخر الولادة في أول حمل أكبر بكتير من الحمل المتكرر.
- تأخر ولادة الأم: يعني لو الحامل نفسها اتولدت متأخر، فده بيزيد احتمالات ولادتها بعد الشهر التاسع.
واعرفي أكتر عن مراحل تطور الجنين والحمل: الشهر التاسع
-
إيه هي مضاعفات الولادة بعد الشهر التاسع؟
- ضخامة الجنين: وده بسبب إنه موجود في الرحم فترة أطول، وبالتالي وزنه وحجمه ونموه عامة بيكبر، وده بيسبب ولادة قيصرية أو ولادة طبيعية صعبة.
- وفاة الجنين: لكن الحمد لله ده بيحصل بنسبة قليلة جدًا لا تتعدى الـ 0.4 – 0.7%
- الإخراج في الرحم: وده بيحصل برضه بسبب طول المدة اللي بيقضيها الجنين في الرحم، فبيضطر إنه يخرج فضلاته، وبالتالي بيستشقها مع السائل الأمنيوسي، فبيسبب له مشاكل في الجهاز التنفسي بعد الولادة.
مع تمنياتنا ليكي ولجنينك برحلة حمل سهلة وممتعة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك