محتويات المقال
“مولود وفي بقه معلقة دهب” المثل اللي اتحول حقيقة على أرض الواقع.. بس المعلقة إتبدلت بالتتينة والببرونة والدهب اتبدل بالألماظ وغيرهم من مستلزمات الأطفال اللي بتتباع بأسعار خرافية في متناول إيد الوليد بن طلال يعني حاجات تبذير أوفر بصراحة بصوت ليلي في فيلم طير إنت وهي مضايقة على الفلوس اللي رماها بهيج وهو عامل خليجي والفلوس دي كان ممكن تجوز شارع بحاله..
وفي المقال ده هنعرفك على أغلى أنواع مستلزمات أطفال حول العالم.
أغلى تتينة في العالم
فيه شركة أسبانية اسمها Suommo عملت تتينة سعرها 2.5 مليون دولار مصنوعة من الدهب عيار 18 قيراط وكمان مرصعة بالألماظ ومعاها سلسلة عشان لو الطفل شالها من بقه متضيعش.. يا بلاش! اعطيني ست حبات.
أغلى ببرونة في العالم
نفس الشركة الأسبانية بردو قررت إنها تعمل ببرونة من الدهب الأبيض والألماظ سعرها حوالي ربع مليون دولار سعة 200 مللي ومعمولة على شكل العروسة الروسي Russian Babushka Doll وكمان ليها أحجام مختلفة عشان تناسب الطفل في مراحل عمره المختلفة.. لازم بقى ندور على نوع لبن مناسب يناسب فخامة اللبرونة عشان اللبن العادي مش هيليق بيها زي لبن مستخرج من معزة سينييه عايشة في سويسرا يعني حاجة في الرينج ده بصوت محمد هنيدي في فيلم وش إجرام.
أغلى سرير في العالم
نفس الشركة بردو قررت إنها تعمل أغلى سرير من الدهب اسمه Dodo Bassinet معمول من الدهب قيراط 24 والمرتبة معمولة قطن البيرو والخيوط الذهبية.. بردو مش عارفين السبب الحقيقي ورا كمية الدهب اللي بتستخدمها الشركة دي بس أكيد الناس بتجبهم لعيالها عشان يشيلولهم الدهب ده للزمن.
عربية أطفال Silver Cross Balmoral
الماركة دي مشهورة بأسعارها العالية في عربيات الأطفال وفيه إصدار حصري من الأنواع دي بأسم Rose Gold Balmoral سعرها حوالي 40 ألف دولار يعني حاجة كده في ميزانية عربيات نجيب ساويرس.
كرسي الأكل ماركة سواروفسكي
الكرسي ده مش بيتباع في المحلات أو على الموقع، الكرسي ده بيتعمل مخصوص وسعره حوالي 15 ألف دولار والكرسي ده بيكون مرصع بالاف من كريستالات سواروفسكي.. لا تعليق حقيقي لا تعليق بصوت سومة العاشق.
مخدة Eiderdown Heirloom Silk Pillow
المخدة مصنوعة من 410 خيط حرير متاخد من أعشاش الطيور في آيسلندا من عند البربئ اللي هناك وسعرها حوالي 3000 دولار عشان ولادك يرجعوا عليها براحتهم وإنتي مرتاحة انهم هيرجعوا على حاجة أورجانيك.
التعليق باستخدام حساب فيس بوك