دليلك لعمل أشهر تتبيلات اللحوم والفراخ والأسماك

التتبيلات من العناصر اللي بتفرق بشكل كبير جدًا في النتيجة النهائية للأكلة، وخاصةً مع المشويات، حتى المطاعم المشهورة هتلاقي إن كتير منها بيكتسب شهرته بسبب تتبيلته المميزة ومكوناتها السرية. بالرغم إن إسلوب الطهي في النهاية واحد عند أغلب مطاعم المشويات، لكن الفرق دايمًا بييجي من التتبيلة. الشعوب العربية بوجه عام بيحبوا الأكل يكون متبل ومتحيق زي ما بيقولوا، غير الأجانب اللي بيكتفوا بشوية ملح وفلفل وإضافات بسيطة من الأعشاب، أما المطابخ العربية، فمشهورة جدًا بالبهارات والتوابل اللي بتميز أكلها.

 

أهم حاجة إن أي بهارات هنستخدمها تكون طازة وريحتها ظاهرة وقوية ومش متغيرة لأي سبب من الأسباب، زي سوء التخزين مثلًا أو إنها تكون قديمة وبقالها مده طويلة مخزونة. البهارات بتقل ريحتها وطعمها مع الوقت. عشان كده، بانصحك دايمًا تشتري البهارات بكميات بسيطة تكفي استعمالك لمدة ما تزيدش عن شهر عشان تفضل طازة ومحتفظة بريحتها وطعمها. جودة البهارات وطزاجتها هتفرق جدًا في النتيجة النهائية لأي تتبيلة هتتضاف ليها.

 

في المقال ده، هنديكي دليل وافي وكافي لعمل مجموعة متنوعة من التتبيلات للحوم والفراخ والأسماك، مش بس للمشويات ولكن لأكلات تانية كتير مشهورة، هتعمل كل الفرق في أكلك وتخليكي دايمًا مميزة وسط عيلتك وصحابك.

 

 

1. خلطة تتبيل المشويات الشرقية (تصلح للفراخ واللحم المشوي)

 

التتبيله لفرخه كاملة متوسطة الحجم أو 1 كيلو من اللحمة

• ½ كوب من مياه البصل (لعمل ميه البصل، ابشري 2 بصلة كبيرة ورشي عليها رشة من الملح وصفيها في المصفاة)
• 1/2 كوب من عصير العنب أو التوت غير المحلى (بيساعد على تطرية نسيج اللحوم)
• 2 ثمرة طماطم مبشورة
• 3 فصوص توم مفرومين ناعم
• 1/4 كوب عصير ليمون
• 1 معلقة صغيرة بشر ليمون
• 2 معلقة صغيرة زعتر ناشف أو طازة لو متوفر
• ملح وفلفل أسود حسب الرغبة
• 2 معلقة صغيرة بهارات عربية (سبع بهارات)
• 1/4 معلقة صغيرة جوزة الطيب مطحونة
• 1/4 معلقة صغيرة حبهان مطحون
• 1/2 معلقة صغيرة شطة اختياري
• 1 معلقة صغيرة عسل أبيض
• 3 معلقة كبيرة زيت نباتي

الطريقة

• اخلطي كل مكونات التتبيلة وضيفي عليها الملح والفلفل، ودوقي طعمها قبل ما تضيفيها للحوم أو الفراخ النية وظبطي الملح والفلفل.
• انقعي الفرخة الكاملة بعد ما تعملي فيها شقوق بسكينة حامية عشان التتبيلة تتغلغل جوه النسيج بتاعها، أو قطع اللحمة اللي هتشويها، أقل حاجة ساعتين والأفضل النقع ليلة كاملة عشان تحصلي على نتيجة ممتازة.

 

 

2. خلطة تتبيل الفاهيتا (تصلح للفراخ واللحمة والجمبري)

الخلطة دي بنسميها بهارات الفاهيتا تقدري تعمليها بكل سهولة وتخزنيها عندك في برطمان وتستخدميها كل ما تعملي فاهيتا.

مقادير بهارات الفاهيتا المكسيكية

• 3 معالق كبيره بابريكا حلوة
• 2 معلقة كبيرة بودرة توم
• 2 معلقة كبيرة بودرة بصل
• 1 معلقة كبيرة كزبرة جافm
• ½ معلقة كبيرة كمون
• ½ معلقة كبيرة زعتر
• 1 معلقة صغيرة شطة
• 1 معلقة صغيرة سكر بني
• 1 معلقة صغيرة ملح ليمون

طريقة عمل بهارات الفاهيتا

• اخلطي كل البهارات مع بعضها كويس، تقدري تحمصي الكمون والكزبرة والبابريكا في طاسة على نار هادية لطعم أقوى.
• احفظيها في برطمان محكم الغلق واستخدميها كل ما تعملي فاهيتا.
• تقدري تضاعفي الكمية لو حابة تعملي كمية أكبر من خلطة البهارات.

لمقادير تتبيل الفاهيتا

هتضيفي لكل نص كيلو من الفراخ أو اللحمة أو الجمبري

• 1 معلقة كبيرة من بهارات الفاهيتا
• الملح والفلفل
• 2 معلقة كبيرة من الزيت النباتي
• 1 معلقة كبيرة من عصير الليمون

الطريقة

• تبلي اللحمة أو الفراخ أو الجمبري بالتتبيلة لمدة لا تقل عن ساعتين لليلة كاملة.
• اشويها مع شرايح البصل والفلفل الألوان.

 

 

3. تتبيلة للسمك أو الجمبري المشوي

المقادير لكيلو من السمك أو الجمبري

• 5 فصوص توم مفرومين ناعم
• 1 معلقة صغيرة جنزبيل طازة مهروس
• 2 معلقة صغيرة كمون
• 3 معلقة كبيرة زيت زيتون
• 1 معلقة كبيرة مستردة
• 1 معلقة صغيرة كركم
• 1 معلقة صغيرة بابريكا
• 1 معلقة كبيرة فلفل حار مفروم ناعم (اختياري)
• 1/4 كوب كزبرة خضرا مفرومة
• 3 معلقة كبيرة عصير ليمون
• ملح وفلفل حسب الرغبة

الطريقة

• اخلطي كل مكونات التتبيلة وتبلي بيها السمك أو الجمبري للشوي أو القلي.
• الأسماك والجمبري ما بتحتاجش مدة طويلة للتتبيل يكفي جدًا نص ساعة لساعة مش أكتر.
• لو هتستخدمي التتبيلة لعمل السمك المقلي، استغني عن زيت الزيتون.

 

 

4. تتبيلة ستيك اللحم المشوي

التتبيلة تصلح لـ4 قطع من ستيك الريب آي(rib eye) أو الإنتركوت سُمك 2 سم

المقادير

• 4 معلقة كبيرة من الصويا صوص
• 1 معلقة كبيرة من خل العنب الأحمر
• ملح وفلفل أسود مجروش خشن (راعي ملوحة الصويا صوص عند إضافة الملح)
• 3 معلقة صغيرة من بودرة التوم
• زيت زيتون
• زعتر أو روزماري طازة

الطريقة

• اخلطي كل مكونات التتبيلة وتبلي بيها قطع الستيك من كل الجهات.
• اشوي الستيك على البوتجاز أو على شواية الفحم أو بالفرن.

 

 

5. تتبيلة الشيش طاووك اللبناني

المقادير تكفي لعمل كيلو من صدور أو أوراك الدجاج حسب الرغبة

• 2 كوب زبادي
• 1 معلقة كبيرة صلصة طماطم
• 1 معلقة كبيرة توم مفروم
• 1/4 كوب زيت زيتون
• 2 معلقة صغيرة زعتر ناشف
• ملح وفلفل أسود

الطريقة

• اخلطي كل مكونات التتبيلة، وتبلي بيها الفراخ لمدة ما تقلش عن ساعتين، ويفضل ليلة كاملة.
• اشوي الشيش طاووك بعد وضعه في أسياخ خشبية على الفحم أو في الفرن أو على البوتجاز.

 

 

6. تتبيلة هندية للفراخ والأسماك والجمبري

التتبيلة دي حلوة قوي لعمل أي وصفة بالكاري

مقادير خلطة البهارات الهنديه

• 2 معلقة كبيرة كركم
• 2 معلقة كبيرة كاري
• 1 معلقة كبيرة حبهان مطحون
• 1 معلقة كبيرة جنزبيل مطحون
• 2 معلقة صغيرة قرفة مطحونة
• 2 معلقة صغيرة كزبرة ناشفة
• 1 معلقة صغيرة جاراماسالا
• 1 معلقة كبيرة بودرة بصل
• 1 معلقة كبيرة بودرة توم

الطريقة

• حمصي البهارات كلها في طاسة بدون أي مادة دهنية على نار هادية لحد ما تظهر ريحتها العطرية.
• احتفظي بخلطة البهارات دي في برطمان محكم الغلق.
• تقدري تستخدمي من خلطة البهارات الهنديه في تتبيل الفراخ أو الجمبري أو السمك عشان تعملي أحلى طبق كاري وتضيفي معاها شوية من التوم والجنزبيل الطازة المفرومين.
• تقدري كمان تضيفي منها للرز البسمتي عشان مذاق هندي مميز.

 

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك