ابني بقى عنده 4 سنين، بتسأل “ها؟ مش هتخلفي تاني؟” أكتر ما كنت بتسأل أول الجواز “ها؟ مفيش حاجة؟” والحقيقة إن أنا مش بحب أقول لحد في وشه مالكش دعوة، أو ده سؤال خاص ما تسألوش، مع إن ده اقتناعي، بس أغلب اللي بيسألوا بيكونوا بداعي الحب والحرص عليا أنا وابني، فمش بحب أحرجهم، وغالبًا بارد عليهم بـ “ربنا يسهل” و”دعواتكم”.
تجربتي: تجارب وقصص أمهات راحة بالي مع الغربة
بس اللي خلاني أكتب المقال ده إني لقيت بوست حلو جدًا على الفيسبوك عن أم كاتبة تجربتها في خلفة 6 أطفال، وبتتكلم قد إيه هي سعيدة ومبسوطة وعارفة تعمل توازن بين أسرتها وشغلها وأولوياتها، قلبي دق وأنا بقرأ البوست ودمعت، مع إن قرار الاكتفاء بطفل واحد ده قراري بكامل إرادتي وما عنديش أي موانع صحية مثلًا.
أكيد كل أم نفسها تعمل أسرة كبيرة، وتملا بيتها أولاد وبنات، وحلمها الولاد دول يكبروا قدام عنيها وتفرح بيهم وتشوف أحفادهم ماليين عليها الدنيا، بس مش كل الأحلام بسهولة تتحقق.
الخلفة من الحاجات اللي ما ينفعش نرجع فيها في حياتنا، يعني الأهل المتعبين بيجي وقت ونفترق عنهم، الزواج الفاشل فيه طلاق، لكن الأولاد خلاص مادام جبناهم على الدنيا، مهما ندمنا على القرار ده في أي وقت صعب فمفيش منه هروب.
حد هيسأل وليه نحتاج نهرب أو نندم؟
مهما قرأنا البوستات من نوعية “أنا باصحي ابني لما بينام عشان بيوحشني”، بس دي مش الحقيقة طول الوقت، الأمهات بيتعبوا وبيرهقوا وبينهاروا، سواء عندهم طفل واحد أو أكتر، صحيح إن لمسة أو حضن من أطفالنا لنا بيهون علينا كتير من متاعب الأمومة، بس احنا كستات مش أمهات بس، الأمومة جزء كبير في حياتنا، بس مش كل حاجة. فيه مننا اللي ابنة لأهل كبار مرضى بتراعيهم، وفيه اللي زوجة لزوج مسافر أو طباعه صعبة وبتدادي فيه طول الوقت، وفيه الأرملة والمطلقة.
ماما من غير دراما: أنا دايمًا حاسة بالذنب
ومش كلنا إمكانياتنا زي بعض، فيه اللي نفسيتها مرهفة وضعيفة جدًا، وفيه اللي بتستحمل مهما حصل وبتعرف تعدي المواقف الصعبة، وفيه الأم اللي عندها أوفر ثينكنج مدمرها، وفيه اللي بتعاني جسديًا، وفيه .. وفيه …
كل المتغيرات دي بتصب في الأمومة بالتأكيد وبتأثر عليها، ده غير اختلاف الأولويات، فمثلًا فيه أم عندها حلم في حياتها مش هتقدر تضحي بيه حتى لو عشان غريزة الأمومة، وفيه اللي غاية أحلامها إنها تجيب أولاد كتير وبتلاقي في ده متعتها، ومش هتيجي في يوم من الأيام تقول لهم أنا ضحيت وضيعت عمري عشانكم.
قصتي مع الكتاب السحري.. ازاي أعدت اكتشاف علاقتي بابني
فممكن جدًا الأم تقرر تخلف طفل، وبعد ما ييجي وتختبر أمومتها معاه، تلاقي نفسها مش قادرة تجيب له أخوات، فوق طاقتها اللي هي أدرى بيها، أكيد هي مش حابة إن ابنها يكون وحيد، ولا مستمتعة وهي بتسمع منه كل شوية كلمة أنا عاوز حد يكون أخويا يا مامي، بس في الآخر هي أدرى بإمكانياتها.
ولما بنقول إمكانيات، في ناس بتفتكر إنها بس إمكانيات مادية، ويبدأوا يقولوا نصايح زي: مش لازم يعني تدخلوا مدارس انترناشونال، أو العيل هييجي برزقه، وغيرها وغيرها من الكلمات، بس لا في إمكانيات تانية أهم بكتير من الماديات، زي القدرة على التربية والرعاية.
ومهم هنا إننا كلنا نعرف إن العبرة مش بالعدد، مش معنى إني جبت 5 أولاد يبقى بالضرورة أكون أم مثالية أو أحسن من الأم اللي جابت اتنين أو اكتفت بواحد، لإني ممكن أكون باضرب عيالي كل يوم علشان تعبت منهم وعاوزاهم يناموا.
إحنا عارفين إنك تعبانة! بلاها سوبر وومان
أنا طول الوقت كنت بافكر إن كفاية كده، ولازم أبدأ أفكر في الطفل التاني، لحد ما جات الكورونا، وعرفت أنا ازاي باخاف كل يوم على ابني، وباترعب لو لمس حاجة، وباتخيل لو لا قدر الله اتصاب بالكورونا ودخل المستشفى، ومع حوادث التنمر والتحرش والخطف وكل المآسي اللي بتحصل حوالينا، في الوقت ده تحديدًا حسيت إني ظلمته لما جبته على الدنيا الصعبة دي، وقررت إني مش هاجيب كمان إنسان يواجه الحياة اللي بقينا احنا نفسنا الكبار بنعافر فيها كل يوم علشان نعرف نعدي.
أنا مش أنانية، ولا عندي أحلام على حساب حياة طفلي، ولا عاوزه ارتاح وما أجربش الحمل والولادة تاني، ولا أنا أم مش مسؤولة علشان أمشي مع الترند وخلاص، أنا من كتر خوفي وحبي في ابني اللي جاي، مش هاخليه ييجي.
وابني الأول والوحيد، هاحاول أعوضه على قد ما أقدر، بأصحاب وقرايب، وبعلاقتي أنا وباباه معاه، أكيد مش هخليه يدفع تمن قراري.
فأرجوكم ما تحكموش على حد، وما تدخلوش في قرارات حد، ولا تخلوا مقاييسكم ظاهرية، في ألف حاجة وحاجة إنتو مش عارفينها، ومش معنى إنها مش ظاهرة لكم تبقى مش موجودة.
دمتم حنينين على قلوب بعض.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك