محتويات المقال
الفترة اللي فاتت كتير مننا كان بيعاني من الزهق والملل والتوتر بسبب قعدتنا في البيوت وظروف الحظر وقلة الخروج والنزول، والطريقة الوحيدة اللي كنا بنرفّه بيها عن نفسنا ونخرّج فيها التوتر والقلق اللي بنعاني منه كانت هي الأكل. لخبطة الأكل دي وقلة الحركة كانت السبب في زيادة وزني كام كيلو كده أثروا جدًا على مظهري وضايقوني نفسيًا جدًا. وقررت إني لازم أتغلّب على المشكلة دي، وابدأ حملة لتقليل كميات أكلي، وكمان تبديل الطريقة والأكلات غير الصحية باختيارات صحية أكتر، مش بس عشان أنزّل في الوزن لكن كمان عشان أحس إني باكل أكل بيفيد جسمي وصحتي تكون أفضل.
بدأت المسيرة برحلة للسوبر ماركت أدوّر عن منتجات تكون صحية أكتر، وفي نفس الوقت، تفتح النفس على الأكل وتفتح لي كمان أفكار واختيارات لتكوين وجبات صحية ولذيذة في نفس الوقت، ودي أهم المنتجات اللي حبيتها وساعدتني في رحلة فقدان وزن فترة الحظر وتغيير نمط الحياة غير الصحي.
أكلات الرجيم: منتجات مساعدة
- الأجبان قليلة الدسم
- الخضراوات والفاكهة
- البهارات الأعشاب
- الزبادي اليوناني
- الشوفان
- صدور الفراخ واللحم المفروم قليل الدسم
- توست القمح الكامل والتورتيلا
- الرز البني والبرغل والفريك
1. الأجبان قليلة الدسم
المصدر eatthis
الأجبان عنصر مهم جدًا لمد الجسم بالبروتين والكالسيوم، وبتكون أساسية في قايمة مشتروات أكلات الرجيم. أكتر الجبن اللي باستهلكها هي الجبنة القريش والفيتا قليلة الدسم والريكوتا وكمان اللبنة قليلة الدسم. الأجبان دايمًا بتقدم لي اختيارات متنوعة لوجبة الفطار أو العشا، وكمان باحب أضيف منها على السلطات عشان تساعدني على الشبع وتدي للسلطة بُعد تاني من الطعم والفايدة زي مثلًا السلطة اليوناني تعتبر عشوة أو فطار مشبع ولذيذ جدًا مع الخضراوات المتنوعة والطماطم والزيتون الأسود والزعتر الطازة. أما الجبنة الريكوتا، باخلطها مع الفواكه والعسل الأبيض وبتكون غموس مسكر لذيذ جدًا لما باحتاج آكل سكريات بس بطريقة صحية ومفيدة.
2. الخضراوات والفواكه بأنواعها
المصدر mentalfloss
من أهم العناصر الأساسية في أي غذاء متوازن هي الفواكه والخضراوات. ولما بنكون عاملين دايت أو بنحاول نقلل في السعرات الحرارية، بتكون الخضراوات والفواكه أساسية في يومنا. من أهم فوايد وجود الخضراوات والفواكه في تلاجتك:
- هتاكليها كسناك بين الوجبات والألياف الموجودة فيها هتساعدك على الشبع.
- هتشجعك دايمًا تعملي سلطات متنوعة وتبدعي فيها، وممكن تمزجي بين الخضار والفاكهة في السلطة بتاعتك.
- الفواكه ممكن تغنيكي عن احتياجك للسكريات والسكر الطبيعي الموجود فيها مش هيضر جسمك زي السكر الأبيض.
- تقدري تاخدي الفواكه على الفطار مع بان كيك صحي أو مع الزبادي والشوفان لفطار متكامل وصحي جدًا.
- الفواكه والخضراوات هتمد جسمك بالفيتامينات والمعادن اللي هيحتاجها، وده هيساعدك تحافظي على مظهرك صحي ونضر دايمًا.
3. البهارات المتنوعة والأعشاب العطرية الطازة
المصدر foodal
دايمًا الشكوى المتكررة اللي كلنا بنشتكيها من الدايت هي إن الأكلات مملة ومالهاش طعم، وإن بيوحشنا مذاق الأكل المحبش اللي بناكله من بره. بس الحقيقة الكلام ده مش صح خالص. بشوية حاجات بسيطة، تقدري تدي طعم رائع لأكلك الصحي زي مثلًا الأعشاب الطازة والبهارات المتنوعة اللي ممكن تغير طعم الأكلة تمامًا وتنقلها في حتة تانية. يعني مثلًا الجبنة قليلة الدسم أو القريش، لو ضيفتي لها نعناع طازة ورشة من بودرة التوم والبابريكا، هيغيروا طعمها تمامًا. صدور الفراخ المشوية، أو الستيك، لو كل مرة ضيفتي لها نوع أعشاب مختلف، وتبلتيها بتوابل مختلفة، هتفرق معاكي في طعمها وهتحسي بالتنوع والتغيير. حتى الخضار السوتيه اللي كتير بيزهقوا منه. نوّعي في طريقته باستخدام التوابل والأعشاب المختلفة. أكيد هتحبيه أكتر.
4. الزبادي اليوناني
المصدر eatthismuch
الزبادي اليوناني من الحاجات اللي بقيت ما اقدرش استغنى عنها على طول، مش بس وانا بحاول أخس. أكتر حاجة بتميزه إنه كريمي جدًا، وده لإن نسبة السوائل فيه أقل من الزبادي العادي، وكمان نسبة البروتين فيه أعلى من الزبادي العادي. الاستخدامات المتنوعة للزبادي اليوناني:
- رائع على الفطار مع الشوفان والفواكه.
- تقدري تاخديه كسناك بين الوجبات لإنه بيساعد على الشبع.
- تقدري تستخدميه في عمل دريسينج كريمي للسلطات كبديل للمايونيز.
- تقدري تضيفيه لأي نوع فواكه بتحبيه لعمل سموزي كريمي وصحي.
- تقدري تستخدميه لعمل صوصات جانبية صحية مع الفراخ أو اللحوم المشوية.
5. الشوفان
المصدر healthline
الشوفان غني بالكربوهيدرات والألياف، وبيحتوي على نسبة عالية من البروتين والدهون مقارنة بمعظم الحبوب التانية، وكمان غني جدًا بالفيتامينات والمعادن، يعني كله فوايد مهولة. الشوفان على الفطار دايمًا بيسموه فطار الأبطال، لإنه بيمد الجسم بعناصر كتير قوي محتاجها عشان يبدأ اليوم بصحة ونشاط. الشوفان بيدخل في وصفات صحية كتير قوي بكل صورة، سواءً رقائق الشوفان نفسها أو دقيق الشوفان اللي بقى متوفر جدًا في الأسواق، زي البان كيك والمخبوزات المتنوعة والكيك أو المافن الصحي وكمان الشوربات.
6. صدور الفراخ واللحمة المفرومة قليلة الدسم
المصدر calories-info
البروتين عنصر مهم جدًا في أي نظام غذائي، وأكتر البروتينات اللي باستهلكها هي صدور الفراخ واللحمة المفرومة قليلة الدسم. والنوعين دول بالذات بافضّلهم لإنهم الأسهل في التعامل معاهم، وبيفتحوا الباب لوصفات كتير متنوعة وسهلة وسريعة في تحضيرها. صدور الفراخ بتليق مع أغلب الوصفات، وبتستوي بسرعة جدًا وبنقدر نقدمها مع السلطات لوجبة متكاملة. أما اللحمة المفرومة قليلة الدهون ممكن نعمل منها البرجر والأنواع المختلفة من الكفتة، أو نضيفها متعصجة للخضار المطبوخ، بتكون أسهل وأسرع من مكعبات اللحمة التقليدية.
7. توست القمح الكامل وخبز التورتيلا بالقمح الكامل
المصدر sunshine
الحقيقة إن السعرات الحرارية واحدة لتوست القمح الكامل أو التورتيلا المصنوعة من القمح الكامل، ومثيلتها المصنوعة من الدقيق الأبيض، لكن أكتر حاجة بتميز مخبوزات القمح الكامل إن نسبة الألياف فيها عالية، فبتساعد على الشبع لفترة أطول بكتير ودي ميزة مهمة جدًا.
خبز التورتيلا كمان بيفتح أفكار كتير قوي لوجبات مميزة ومش مملة زي رولات الفاهيتا المكسيكية مثلًا، أو رولات الأومليت مع صدور الرومي المدخن على الفطار أو العشا. وتقدري كمان تحمصي شرايح منها في الفرن وتستخدميها للتغميس مع بيوريه الحمص أو الأفوكادو.
8. الرز البني والبرغل والفريك
simplyscratch
أنا واحدة من الناس بيبقى صعب قوي عليا أستغنى عن الرز على وجبة الغدا، حتى لو بكميات قليلة، بس لازم يكون موجود. والحقيقة التلات بدايل دول بقوا دايمًا موجودين في بيتي. الرز البني والأبيض الاتنين فيهم نسبة عالية من الكربوهيدرات. لكن الرز البني هو حبة كاملة والحبوب الكاملة بوجه عام بتكون فوايدها لجسمنا وصحتنا أكتر بكتير. زي إنها بتقلل الكوليسترول ومخاطر الإصابة بالسكتات الدماغية وأمراض القلب والسكر. ده غير نسبة الألياف العالية اللي بتساعدنا على الشبع.
بالتالي لو أكلتي تلات معالق من الرز البني أو الفريك أو البرغل الخشن هتشبعي أكتر بكتير من لو أكلتي نفس الكمية من الرز الأبيض. أما بالنسبة للسعرات الحرارية، فالرز البني سعراته الحرارية أعلى بنسبة بسيطة جدًا من الرز الأبيض. لكن في النهاية، الفايدة أعلى بكتير، وهتاكلي كمية أقل بكتير، وهتحسي بالشبع لفترات أطول. التلات عناصر دول بيطبخوا بنفس طريقة الرز الأبيض، لكنهم بياخدوا وقت أطول في السوا خصوصًا الرز البني. تقدري كمان تضيفي كمية منهم للسلاطات بتاعتك عشان تكوني وجبة متكاملة تشبعك لأطول فترة ممكنة. ده غير طبعًا طعمهم المميز.
التعليق باستخدام حساب فيس بوك