كلنا كأمهات بنسمع كلمة: “بنتك كبرت وهتدخل المدرسة أهي” والكلمة دي على قد ما هي مفرحة، على قد ما هي بتحسسنا بالمسؤولية أكتر، لإن مرحلة المدرسة بتدي انطباع بإن الطفل كبر، حتى لو هو داخل الكي جي، بس خلاص مبقاش البيبي اللي قاعد معانا في البيت، أو بنوديه الحضانة يلعب، ومع إني تعبت جدًا على ما ألاقي لبنتي حضانة مناسبة، بس ده مايجييش حاجة جنب اختيار المدرسة، وفي المقال ده هحكيلك الحكاية كلها:
-
إيه الفرق بين اختيار الحضانة واختيار المدرسة؟
- أهم فرق على الإطلاق هو إمكانية التغيير، في الحضانة إنتي بتدفعي بالشهر، لو ماعجبتكيش، بتقدري تنقلي لطفلك بمنتهى السلاسة، أو على أسوأ الأحوال هتقعديه معاكي في البيت، لكن المدرسة صعب جدًا تحولي لاينك في نص السنة الدراسية، مش بس عشان قوانين المدارس، لكن عشان نفسية طفلك متتأثرش سلبًا.
- صحيح بعض الحضانات فيها مناهج دراسية، لكنها مش مؤثرة على مستقبل الطفل، ولو ما درسش حاجة خالص وقعد يلعب بس في الحضانة، برضه مش أزمة، لكن المدرسة مش كده، وخصوصًا دلوقتي، المناهج بقت بالعشرات، وفي منها معتمد وفيه منها سبوبة، ده غير إنك تعرفي إيه المنهج المناسب لطفلك.
- الميزانية برضه مؤثرة جدًا في القرار، ماينفعش تيجي في نص الدراسة في المدرسة وتقولي أنا مش هقدر أكمل الأقساط، لكن في الحضانة تقدري توقفي أو تشتركي بارت تايم.
- أمهات كتير في اختيارهم للحضانة، بيختاروا أقرب حضانة للبيت أو للشغل، لكن ده مش متوفر قوي في المدارس، ومش دايمًا أقرب مدرسة دي بتكون مناسبة.
ودي طريقة اختيار مدرسة مناسبة لطفلك
بس بعد ما تختاري المدرسة وتحسي إن خلاص هي دي المدرسة اللي طفلي هيكون فيها، هتييجي أكبر عقبة، وهي انترفيو المدرسة للطفل وللوالدين.
-
إيه هو انترفيو المدرسة للطفل؟
هو حاجة زي السر العسكري كده، بيتحكي عنه بس محدش عارفه بالزبط هو إيه، لإن المُدرسة بتاخد الطفل في مكان بعيد عن الأم وبتعمل معاه الإنترفيو، فإنتي وحظك بقى لو طفلك حكالك حصل إيه، أو ماحكاش، أو بدأ يخترع أساطير عن الإنترفيو.
بس اللي بيتقال عنه إنه الطفل بيتسأل عن الألوان والأرقام والحروف وشوية معلومات تانية، وفي بعض المدارس بتحب تشوف مهارات الطفل في الحركة وفي التعامل مع بقية الأطفال.
5 طرق تعرفي منهم المدرسة اللي عايزة تقدمي فيها كويسة ولا لأ
-
إيه هو انترفيو المدرسة للوالدين؟
- اللي حصل معايا هو كمية أسئلة رهيبة عن طريقة تعاملي المستقبلية مع المدرسة، في حال إن بنتي اتقبلت، ولو حصل مشكلة إزاي هحلها، وطريقة كتابة رسايلي للمدرسة في المشاكل، وده على قد ما هو كان مفاجئ بالنسبة لي، لكن كنت مقدراه جدًا، لإن المدارس بيشوفوا عجب عجاب من الأهالي.
- واتسألت برضه عن حالتي الاجتماعية، وعن مدى تواجد الأب في حياة بنته، وعن مؤهلاتي العلمية ومؤهلات الأب، وقالولي إن أي معلومات أو تواصل من المدرسة، هتوصل لإيميل الأب والأم.
- في بعض المدراس بتسأل عن النادي اللي مشتركين فيه، وفين بتقضوا أجازة الصيف، وأسئلة كتير عن المستوى المادي والاجتماعي للأهل، وكتير أهالي بيحسوا بنوع من العنصرية والازدراء بسبب الأسئلة دي، وأنا شايفة إن من حق الأهل يدخلوا طفلهم المدرسة اللي هما عاوزينها طالما مستواه الأكاديمي مناسب ومقبول، وهما معاهم الإمكانيات المادية اللي تخليهم يقدروا يدفعوا مصاريف المدرسة.
إيه السن المناسب لدخول الطفل المدرسة؟
-
مشاعري كأم وقت انترفيو المدرسة لبنتي:
كنت خايفة جدًا، مش بس خوف من الرفض، اللي هيكون معناه رحلة تدوير جديدة عن مدرسة تانية، لكن الخوف الأساسي خوف على نفسية بنتي، لو اتسألت سؤال ولقت نفسها مش عارفة ومحرجة، خوف من إن حد غريب واخدها في أوضة لوحدها بعيد عن مامتها وبيسألها، خوف إنها تتعرض لمشاعر الرفض في السن الصغير ده، خوف إنها تتعلق بالمدرسة وتتبسط، وأرجع أقولها لا مش هتدخليها.
على الرغم من كل الخوف ده لكن أهم حاجة أنا فخورة إني عملتها، إني ما ضغطتش على بنتي أبدًا، ولا خوفتها أو هددتها، ولا حسستها إنها داخلة امتحان، اتكلمت معاها بلطافة إن في مُدرسة لطيفة هتاخدك لوحدك عشان تركزي، وهتتكلم معاكي في الألوان والأرقام، فحاولي تتكلمي معاها، وأنا هكون مستنياكي برا، ومش همشي خالص ولا هسيبك، وأنا متأكدة إنك عارفة كل الحاجات اللي هتسألك فيها.
ولما جت المُدرسة اللي هتعمل لبنتي الانترفيو، خدت بنتي بالحضن وقولتها أنا مستنياكي هنا مش هتحرك غير لما تطلعي، وما قعدتش أكرر عليها معلومات الألوان والأرقام والحروف، علشان تحس إن هي أهم عندي من كل المعلومات دي.
وعلشان مشاعر الخوف والضغط دي كلها، أهالي كتير بيطالبوا بإلغاء الإنترفيو للأطفال، وتكتفي المدارس بالنظر لتصرفات الطفل وحركته وكلامه وهو في ظروف طبيعية بين أطفال في منطقة ألعاب المدرسة، أو وهو مع مامته، بدون الدخول في الموقف المرعب ده.
مع تمنياتي لكل الأمهات والأطفال بالتوفيق والنفسية السوية.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك