محتويات المقال
الحظر و الكورونا كانوا من أسباب إني أقعد في البيت فترة أطول من العادي. وبما إني بحب الحركة، لقيت إن الفترة دي فرصة إني أعيد ترتيب البيت وأعمل عملية فرز واتخلص من الزيادات وأنظّم اللي محتاجة له. كان أول جزء بدأت فيه هو بلكونة صغيرة وقررت أعمل إعادة تدوير للحاجات الموجودة فيها.
البلكونة – قبل التعديل

أفكار للديكور – البلكونة قبل التعديل
إعادة التدوير فيه منها ثلاث أنواع: الأول، والثانوي، وبعد الثانوي.
- الأول: مش بتعمل أي تغيير في طبيعة المادة أو المنتج وبيفضل زي ما هو، بيعاد استخدامه فقط.
- الثانوي: إني مش باعمل معالجة كيميائية، بس باغير في استخدام الحاجة.
- أما ما بعد الثانوي هو بيتم معالجة المنتج إما بطريقة كيميائية أو حرارة عشان تصنع منه منتجات جديدة.
وبناءً على ده، تعتبر البلكونة من النوع الثانوي. استخدمت الأشياء بشكل مختلف بدون معالجة كيميائية أو حرارة. البلكونة في البيوت المصرية في أوقات مش قليلة بتكون مهملة ومكان لتخزين الحاجات القديمة اللي في الأغلب مش هنستخدمها ومستخسرين نرميها فبنكوّمها في البلكونة لغاية لما نقرر هنعمل بيها إيه.
مراحل تحول البلكونة

أفكار ديكورات – مراحل تحول البلكونة
أنا وأمي ركننا كذا حاجة فيها، وبعد ما توفت أمي بردو، عملت زيها لإني ما كنتش عارفة أتصرف في الحاجات، فخزنت حاجات فيها، منها سجاجيد قديمة وسرير قديم بكل أجزاؤه، وشوية حاجات. بالنسبة لإعادة تدوير الأثاث، أعتقد فيه اتجاه عام له دلوقتي، بسبب غلو الأسعار وإن جودة الأثاث أحيانًا في القطع القديمة بتكون أعلى من الأثاث الجديد، والأثاث الجديد عالي الجودة غالي. من هنا فكرة إعادة تدوير الأثاث فكرة مناسبة للظروف الاقتصادية اللي بيمر بيها العالم كله.
طيب ازاي أعمل إعاده تدوير للأثاث؟!
فيه نقطتين مهمين جدًا:
- هل هاستخدم القطعة على نفس حالتها، سواءً من حيث التشطيب أو الألوان؟
- هل هاغير في وظيفة القطعة واستخدامها بشكل مختلف تمامًا؟
بالنسبة للنقطة الأولى، فيه أكتر من اتجاه. البعض بيغيّر معالم الحاجة تمامًا فبيغير التشطيب، أو ممكن يخلّي نوعية التشطيب ثابتة ويغيّر لون القطعة فقط. ده في الأغلب لو هنستخدم نفس القطعة بنفس وظيفتها. كمان لمّا بيكون شخص مش عايز يغيّر بشكل كامل هيكتفي بعمل تغيير بسيط وهو لون القطعة.
النقطة التانية هي تغيير وظيفة القطعة. هنا أنا باشوف الوظيفة والمكان اللي هتتحط فيه القطعة الجديدة. فلو في مكانها بس هنستخدمها استخدام مختلف، ده بيتيح لي فرصة تغيير التشطيب أو الألوان. أما إذا كانت هتتحط في مكان جديد، فمحتاحة أشوف طبيعة المكان وهل نحطها بنفس الاستخدام ولا هغيره؟
يعني إيه الكلام ده بقى؟؟ ??
مثال:
أنا هاستخدم دولاب قديم صغير في إني أعمل منه ركن القهوة، لكن في مكان خارجي. هنا هاشوف هل نوعية التشطيب الأساسية لو سبتها على حالها تتناسب مع الجو الخارجي؟ ولّا هاكون محتاجى أعمل لها معالجة تناسب تقلبات الجو؟ وهكذا. بادرس الموضوع من كذا جهة.
بالنسبة لي، كان عندي سرير صغير وكنت حابّة أعمل ركنة في جنب من جوانب البلكونة، فقررت أستخدمه وأعمل دكة. جبت النجار وخليته يقصّر جوانب السرير، وعمل عرضها ٦٠ سم عشان تكون مريحة زي أي كنبة. أخدت جزء من المتبقي وجبت سلاسل معدن ومسامير حرف إس (بتتباع عند الموّان) وعملت منه رف جانبي في مستوى اللي هيقعد على الدكة عشان أقدر أحط عليه صينية أو اللاب توب لو حبيت أشتغل.
أخدت مُلَل السرير المتبقية وعملت بيها أرفف علوية مختلفة الارتفاع. ثبتت كل رف عن طريق اتنين زوايا مقاس ١٠سم من عند الموان. كل زاوية فيها ٤ مسامير: اتنين بيتم تثبيتهم في الخشب واتنين في الحائط لتثبيت الرف في الحيطة بشكل كويس.
أما بالنسبة لأرضيه السحارة، فثبتها في الجنب جهة الشارع عشان تقلل من الشمس ويبقى فيه خصوصية. كده أنا خلصت مرحلة إعادة التدوير لأجزاء السرير.
أما اللمسات الفنية والحركات?، عملتها باستخدام حاجات كانت موجودة بالفعل في البيت ومركونة ومتخزنة، مش بتشوف النور، كأنها حزينة. مج على صينية على قطعة قماش من ستارة قديمة مع زينة كنت عملتها من فترة، وبدأت أوزّع الحاجات على الأرفف.
العنصر الأخير اللي باعتبره روح المكان وما ينفعش تكون البلكونة خالية منه هو الزرع ???

أفكار ديكور – البلكونة بعد لما خلصت
استخدمت نبات البوتس ودفانبخيا وسنجونيوم أو بيسموها “رجل البطة”. الثلاثة نباتات ظل، تخليهم في بلكونة في جزء ظل إلى حد ما، تاخد ضوء الشمس غير المباشر، والري مرة كل تلات أو أربع أيام على حسب احتياج التربة. عمومًا البوتس بيستحمل وبيعيش.
تكلفة الموضوع ده تقريبًا في حدود ٦٠٠ جنيه ما بين مصنعية النجار، وأدوات من الموان في حدود ٢٥٠ج، والزرع في حدود ٣٠٠ج يعني كله على بعض ما يزيدش عن ألف جنيه كتير. قدرت أعمل ركنة جميلة أقدر أطلع أشرب الشاي فيها الصبح بدري أو بالليل بعد ستة مساءً أو اشتغل، وتسمح لو جاتلي صديقة إننا نطلع نشرب القهوة سوا في الهواء الطلق.

أفكار ديكورات بلكونة – شكل البلكونة بالليل
أتمنى كلنا نقدر نعمل ده ونحوّل البلكونة من مكان مهمَل لمكان مبهج نقضي فيه وقت زي زمان ساعة العصاري ونشرب فيها الشاي مع حبايبنا.
1 comment
افكار راىعه