على قد ما البيبي التاني بيبقى مصدر سعادة ورزق وروح جديدة للبيت، على قد ما بيبقى مصدر قلق وتوتر وتهديد للأخ الكبير، وده اللي مطلوب مننا احنا الكبار نتفهمه ونستوعبه، ونقدّر مشاعر الطفل اللي كان مصدر اهتمام للكل وفجأة بقى فيه دخيل بيشاركه الاهتمام ده، ويمكن كمان بياخد الاهتمام أكتر منه بشويتين.
تجربتي – تهيئة الطفل الأول لاستقبال المولود الجديد
التفرقة بين الأبناء: لو بتفرقي في المعاملة بين ولادك ومش حاسه
أهم النصائح لتهيئة الطفل الأول لاستقبال المولود الجديد
في شوية tricks بسيطة من تجربتي الشخصية اللي عملتها مع ابني الكبير، ساعدتنا جدًا الحمد لله نعدي الفترة الأولى من ولادة ابني الصغير بسلام من غير إصابات، ومن غير ما ندخل في مرحلة الغيرة الزيادة أو سوء السلوك عشان يلفت النظر ليه والكلام ده:
- أول مرحلة بتبدأ قبل ولادة الطفل التاني بفترة، لازم الأب يكون ليه دور كبير جدًا في حياة البنت أو الابن الأكبر، ويقضي معاه وقت كافي ويقرب منه ويساعده في حاجات كتير من اللي الأم كانت بتعملها عشان يهيأه إنه هيكون الأقرب الفترة الأولى بعد ولادة البيبي، وما يكونش انسحاب الأم مفاجيء بالنسبة له بعد الولادة، فيربطه على طول بإنه اتركن على الرف بسبب البيبي الجديد.
- نشارك الطفل الأكبر في كل حاجة تخص البيبي من قبل ما يجي، اختيار لبسه، سريره، لعبه، حتي اسمه (أنا عن نفسي ابني الكبير هو اللي اختار اسم اخوه الصغير)، المهم يحس إنه الشريك الأكبر في الحدث السعيد ده.
- قبل الولادة، ننزل نشتري هدايا بسيطة كده، و مع كل ضيف قريب مننا ييجي نديهاله، ونطلب منه يبارك للطفل الكبير إنه بقى أخ كبير مع عبارات زي: “ما شاء الله عليك، أنا اتمنى يكون عندي أخ كبير زيك، مبروك إنك بقيت أخ كبير، أنا واثقة إنك هتكون أخ كبير هايل”.
تجربتي – تهيئة الطفل الأول لاستقبال المولود الجديد
- يوم الولادة بقى: يفضل إن الطفل الكبير ما يشوفش الأم وهي في وجع الولادة ولا بعد الخروج من العمليات على طول (عشان ميربطش في مخه إن البيبي جه بهدل أمي بالشكل ده ليه)، فممكن نسيبه في مكان هو متعود يكون موجود فيه من غير مامته و باباه، مع ناس بيبتبسط ويرتاح معاهم مش مع ناس أول مرة يكون معاهم لوحده من غيركم، وفي نفس الوقت نبقى مفهمينه اليوم هيمشي إزاي، وهيحصل إيه بصورة بسيطة مناسبة للسن بتاعه.
- ننبه طبعا على أصحابنا و قرايبنا مينبهروش بالبيبي و يفضلوا طول القعدة يتكلموا عنه، بالعكس نفضل نتكلم مع الأخ الكبير و نباركله و نحسسه إن الليله ليلته.
- الأم تحاول تشركه معاها على أد ما تقدر، و في الأول هتلاقيه بيقلد البيبي في حاجات كتير و يحط البيبرونة في بقه ولو بينام في أوضته هيبقى عايز يرجع ينام معاكي تاني، وممكن كمان أوقات بيحصل انتكاسة في موضوع التويلت، كل ده طبيعي، و نحاول نقابله بهدوء without panic.
- لو هنعمل عقيقة أو سبوع للبيبي مفيش مانع نعمله تورته و نكتب عليها big brother or big sister و نطلب من أصحابنا يباركوله على المكانة الجديدة الجميلة اللي بقى فيها.
- لو حصل وضرب البيبي بلاش نزعقلهم و نفزعهم، أنا عارفة أكيد غصب عننا بنتخض، بس معلش ده متوقع وولادنا نفوس بشرية من حقهم يحسوا بالغيرة، وإحنا دورنا نعلمهم ازاي يعبروا صح عن مشاعرهم.
- الأب الأب الأب، دورك مهم جدًا في الوقت ده، اهتمامك بابنك الكبير و إنك تديله وقت كبير ليه هو بس، هيساعد كتير في مرور الفترة الأولي بسلام.
وأخيرًا ما تنسوش الوقت الخاص لولادكم بجميع أعمارهم، بالنسبة لي ده حل سحري لمشاكل كتير و يطمنهم إنهم لسه مهمين وموجودين ومتشافين.
التعليق باستخدام حساب فيس بوك