محتويات المقال
“مرة وأنا ماشية في المول لقيت أم مستهترة وسايبة ابنها مرمي على الأرض وعمال يعيط وهي بتتفرج عليه”، كام مرة قرأنا بوستات بدايتها زي الجملة دي على السوشال ميديا، وخاصةً على جروبات الأمهات؟ واللي غالبًا التعليقات فيها بتقلب بخناقة بين المشاركات، بسبب اختلاف الآراء ما بين ناس بتقول “انتي حكمتي عليها انها مستهترة ومتعرفيش ظروفها إيه” وما بين ناس تانية بتقول “آدي آخرة التربية الإيجابية واللي بيجيلنا منها، وده استهتار ما تقوم تحضنه ولا تشده ولا تتصرف بدل ما هو مرمي على الأرض كده”.
امبارح انتشر بوست لبنت بتقول نفس المعنى وإنها لما بتشوف طفل عامل إزعاج في مكان، والأم والأب مش بيعملوله حاجة ومش بيسكتوه بتكون عاوزه ترجم الأهل دول، واتهاجمت جدًا من الأمهات ومسحت البوست ونزلت بوست تاني توضح قصدها، فاتهاجمت تاني، بس وأنا بقرأ التعليقات لقيت بنات أو ستات لسة مش أمهات بيقولوا إنهم مش هيسيبوا أطفالهم يعملوا كده أبدًا، بس اللي لفت نظري فئة من الأمهات بيتباهوا بتربيتهم لأطفالهم، وإن حركية الطفل مش عذر، فواحدة تقول “أنا ابني كان حركي بس كنت بصرف طاقته طول الوقت في الحدائق ومش بروح بيه أماكن مش مناسبة له علشان ما أزعجش الناس”، وأم تانية بتقول” مفيش حاجة اسمها نوبة غضب، دي شماعة الأمهات بيقولوها علشان يغطوا على قلة تربيتهم لولادهم”. (طبعًا الكلام أنا ناقله معناه مش ناقلاه بالنص)
وبما إني أم كل مولات مصر اتفرجت عليا وأنا قاعده عالأرض مش عارفة اتصرف في وقت نوبة الغضب، وياما رجعت بيتي وأنا حجابي متشقلب بعد ما كنت نازلة بيه متهندم ومزبوط، ده غير الأيام اللي رواد ستاربكس اتحسبنوا عليا فيها (مشيها اتحسبنوا)، هقولكم تجربتي مع نوبات الغضب، بهدوء وبدون ما نكون فريقين متشنجين، وكل همنا إننا ندافع عن نفسنا ونطلع اللي قدامنا غلطان:
في حاجة اسمها نوبات غضب ولا هي من اختراع الأمهات؟
برأيي ده أهم سؤال، لأن في مصطلحات كتير دلوقتي بقت مغلوطة وأي حد بيقول أي حاجة.
آه في حاجة علمية وطبية ونفسية اسمها نوبات الغضب، واسمها ” Tantrums”.
تجربتي: أنا مش هخلف غير طفل واحد بس.. أنا مش أنانية
إيه هي نوبات الغضب؟
هي نوبات مفاجئة من التصرفات الحادة اللي بتصدرعن الطفل بدون أي تخطيط مسبق، بيعبر فيها عن شعوره بالغضب أو الإحباط تجاه حاجة معينة، غالبًا الأم مش بتكون فاهماها.
شكلها إيه نوبات الغضب؟
على حسب كل طفل وكل موقف، ومعروفة طبعًا كل ما كنتي في مكان أو مع ناس حريصة على برستيجك فيه، فأعراض نوبات الغضب بتزيد:
- البكاء.
- تشنج الجسم.
- الركل بالقدمين.
- حبس الأنفاس.
- الزن المستمر.
- ضرب شخص ما أو قرصه، حتى لو كان غريب.
- الصراخ.
- تقويس الظهر.
- الوقوع أو الاستلقاء على الأرض.
- البدء بتكسير بعض الأشياء الموجودة حواليه.
نوبات الغضب
ليه بتحصل نوبات الغضب؟
- شعور الطفل بالإحباط بسبب عجزه عن التعبير بشكل واضح عن رغباته واحتياجاته، خصوصًا إن قدرة الطفل على التعبير عن طريق الكلمات بتكون محدودة في سنوات عمره الأولى.
- وجود الطفل في مكان هو مش عارف يتأقلم فيه.
- وضع ضوابط وقيود على تصرفات الطفل، أو على العكس منح الطفل الحرية الكاملة.
- حاجة الطفل للتعبيرعن استقلاليته، ورغبته في التصرف بحرية.
- رغبة الطفل في جذب الانتباه إليه لاختبار القيود والتعليمات اللي اتفرضت عليه من الكبار اللي حواليه.
- قيام شخص ما بأخذ غرض من يد الطفل أو حرمانه من غرض يحبه.
- وجود الطفل في مرحلة انتقالية من اليوم، زي فترة ما بعد الحضانة، أو ما بعد النوم مباشرة.
- شعور الطفل بحاجات تانية زي: الملل، والتعب، والجوع، وفرط النشاط، والقلق، والانزعاج، والتوتر.
نوبات الغضب بتيجي في سن كام للأطفال؟
من سنة لـ 4 سنين، لأن دي الفترة اللي فيها نمو شخصية الطفل، وعدم مقدرته على التعبير بشكل واضح وسلس، وبتكون لسا قدرته على التأقلم على الأماكن الجديدة أقل.
الأم تعمل إيه لو طفلها جاتله نوبة غضب؟
- الهدوء التام، دي أهم نصيحة للأم، لأن اي توتر أو عصبية من الأم هيزيد من سوء الموقف ومش هيحله، مهما كان حواليها تعليقات ضاغطة.
- تشوف إيه سبب نوبة الغضب، وتحله بقدر الإمكان، بدون ما تستجيب لكل رغبات الطفل، فمثلا لو السبب هو الجوع أوالعطش أوقلة النوم لازم تلبي له احتياجه ده، لكن لو سببها مثلًا إن الآيس كريم وقع على الأرض، فتبدأ تتكلم معاه، وإنها زعلانة برضه علشان الآيس كريم وقع.
- عدم الضرب أو التعنيف الجسدي نهائيًا.
- تبعد عنه أي حاجات مؤذية لو رماها أو استعملها في نوبة الغضب، أو مثلا لو على سلم تشيله وتبعده عن السلم وهكذا..
هل ممكن نوبة الغضب تقف فورًا؟
لا..مادام بدأت مش هتقف غير لما تاخد من دقيقتين لحد 15 دقيقة، أو بمعنى أصح لحد ما الناس كلها تتفرج عليكي إنتي وطفلك ويكتبوا عنك بوستات.
نوبات الغضب دايمًا طبيعية؟
- لو زادت معدلات نوبات الغضب عن الطبيعي، أو اتحولت لسلوك عدواني أو اتقلبت لاضطرابات سلوك واضطرابات نوم، في الحالة دي لازم ترجعي لطبيب أطفال فورًا.
- لو عرض انقطاع النفس حصل مرات كتير، برضه لازم ترجعي لطبيب الأطفال، وهو اللي هيقولك إذا كان ده طبيعي، ولا لاقدر الله دلالة على مشاكل صحية تانية.
نوبات الغضب
ده الكلام العلمي عن نوبات الغضب، علشان كده عزيزتي الأم أنا قلبي معاكي، ماتحرجيش أبدًا من نظرة الناس ليكي، متاخديش أي تعليقات بطريقة شخصية على نفسك، إنتي أدرى واحدة بظروفك وظروف ابنك، ولو دخلتي مكان تشربي فيه قهوة وطفلك فاجئك بنوبة غضب، مش معنى كده إنك مجرمة في حق المفكرين والكتّاب وعظماء البشرية اللي عاوزين يشربوا قهوة في هدوء، ولا لما ابنك يمسح المول بهدومه، تبقي إنتي كده أم مستهترة “ومادام مش قد الخلفة بتخلفوا ليه”، هوّني على نفسك، وصدقيني فترة وهتعدي، وطفلك هيكبر وهيعرف يعبر عن احتياجاته بكل سهولة.
نصايح تخفف عليكي الموقف:
- أمّني احتياجات طفلك قبل ما تخرجي من البيت قدر الإمكان، يعني أكليه وشربيه وغيري له ونيميه، صحيح ممكن في الآخر المحلات تقفل وإنتي لسا مخرجتيش، بس معلش.
- اختاري أماكن فيها مساحات للأطفال، مثلا كافيه فيه كيدز آيريا.
- لو ابنك بيروح حضانة، اخرجي أماكن الكبار في وقت الحضانة، المولات، المحلات، السوبر ماركت، أحسن ليكي وله، لأن أغلب الأطفال بيزهقوا جدًا من الأماكن دي.
- لو مضطرة تخرجي مكان مش مناسب للطفل، خدي معاكي لعب وتلوين وحاجات يقضي فيها وقته، هتلاقي نفسك خارجة بشنطة سفر، بس أهون من المواقف اللي بالي بالك.
- لو قدرتي حد يخرج معاكي وطفلك بيحبه، ممكن ينقذك شوية.
- تجاهلي تعليقات الناس، في الواقع أو على السوشال ميديا.
- اتعلمي عن التربية أكتر، اسألي الاستشاريين وخدي نصايحهم بجدية.
- حاولي تحمي الناس اللي حواليكي من نوبة غضب طفلك، يعني لو إنتي حاسة إنه هيرمي حاجة حد، أو هيبوظ حاجة لحد، خديه برا المكان ده لحد ما تخلص النوبة دي، لأن الناس برضه مالهمش ذنب في نوبات غضب أطفالنا.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر:
التعليق باستخدام حساب فيس بوك