محتويات المقال
أغلب البيوت المصرية عندها كراكيب في أماكن محددة في البيت، زي تحت السرير، وفوق الدولاب لو في مكان، وركن في البلكونة، وفي الحالات دي غالبًا بتكون دواليب الأوض والمطبخ مليانة حاجات وزحمة وصعبة الاستعمال، ورغم إن “الروبابيكيا” كان موجود في مصر من زمان، إلا إننا كنا بنحتاجه للحاجات الكبيرة اللي مالهاش لازمة في البيت، زي الحدايد والعفش القديم المتهالك قوي، لكن بنيجي عند الملابس ومستلزمات الأطفال واللعب ومش بنعرف نعمل فيها إيه، وفي نفس الوقت بنكون مستخسرين حاجتنا ومش عاوزين نرميها أو نتصرف فيها، والنهارده هقولك تجربتي في بيع الملابس والأغراض المستعملة، واللي فرقت معايا كتير جدًا في توفير الميزانية وترتيب البيت:
لما اتجوزت طبعًا مكانش عندي أي كراكيب، وكان نفسي أحافظ على البيت مرتب ومنظم من جوا قبل من برا، بس مكانش في بالي طريقة معينة أمشي عليها، لحد ما اكتشفت الكنز اللي اسمه بيع المستعمل:
-
إزاي بدأت؟
قبل ولادة بنتي، كنت محتاجة مستلزمات كتير جدًا لها، مش بس ملابس بيبي، لكن سرير وكاريكوت وسترولر وكارسيت، وكل قائمة مستلزمات البيبي اللي كل الأمهات عارفاها دي، وكل بند واحد من دول بمبلغ وقدره، واكتشفت إن في حاجات هتستخدم شهور بسيطة جدًا وتتركن، زي الكاريكوت مثلًا.
وفي يوم وأنا ماسكة الموبايل لقيت واحدة بتبيع كاريكوت حالته زي الجديد بالزبط، بنص السعر اللي أنا شايفاه في المحلات، وطبعًا جت في بالي كل الشكوك بتاعت: إيش عرفني إن حالته زي الصورة، والخوف من الأمراض، أو سوء التخزين، بس قلت أجرب مش هخسر حاجة ولو ماعجبنيش أرجعه تاني لصاحبته، وفعلًا جبته وعجبني ولقيت حالته أحسن من الصورة كمان، ووديته يتغسل في دراي كلين علشان أعقمه قبل الولادة، وزي ما توقعت استخدمته شهرين بس، وبدل ما أشيله تحت السرير، عرضته للبيع تاني وواحدة حامل اشترته مني للبيبي المنتظر.
-
إيه فوايد شراء وبيع المستعمل؟
- أول وأحسن فايدة هي توفير كبير جدًا في الميزانية، لإن بتشتري الحاجة بنص السعر تقريبًا، ولما بتبيعيها بترجعلك فلوس تاني تقدري تستفيدي بيها في شرا حاجات تانية جديدة.
- بيتك طول الوقت بيكون فاضي من الكراكيب ومرتب.
- بتعرفي إيه الحاجات اللي ناقصاكي ومحتاجاها وإيه اللي فايض عن احتياجاتك، بسبب إنك بتفرزي بيتك طول الوقت.
- بتقدري تقتني حاجات فخمة وبجودة عالية بسعر معقول، وممكن لو لقيتيها جديدة ما تقدريش على سعرها.
- بيكون عندك حاجات جديدة في البيت، بس مالهاش استعمال عندك، ولا في حد حواليكي ممكن يستفيد بيها، فالبيع بيكون الحل الأمثل لها.
إزاي تظبطي لبس الشتاء بأقل ميزانية ؟
-
أماكن بيع وشراء المستعمل
- في الدول العربية في مكان اسمه “الحراج” وده مجمع لبيع وشارء المستعمل، وعلى حد علمي ده مش متوفر منه في مصر، وفي الدول الأوروبية فيه محلات مخصصة لبيع المستعمل وبيرجع إيرادها للجمعيات الخيرية.
- لكن في مصر أكتر حاجة مناسبة ومتوفرة هي جروبات بيع وشراء المستعمل على الفيسبوك، وموقع OLX .
- الماركت بليس على الفيسبوك.
-
ازاي تبيعي المستعمل؟
- تغسلي القطعة اللي هتبيعها وتنضفيها، ولو مكرمشة قوي إكويها.
- صوريها بجودة مناسبة في مكان نضيف عندك في البيت وفي إضاءة كويسة.
- حددي مقاسها وسعرها.
- ارفعيها على جروب بيع المستعمل واكتبي كل البيانات الخاصة بالقطعة، وطريقة التواصل والتوصيل.
- راعي عوامل الأمان ليكي زي إنك متقابليش حد في بيته أو في مكان بعيد عنك ولا حد يطلع بيتك وانتي لوحدك، وهكذا.
-
ازاي تشتري مستعمل؟
- في شره لشراء المستعمل زي شره التسوق العادي، وده تحت تأثير إن القطعة لُقطة، فلازم تحددي كويس احتياجاتك قبل ما تشتري.
- اتأكدي من المقاس والخامة قبل ما تشتري.
- اتفقي مع البايع، إن لو القطعة ماعجبتكيش هترجعيها في نفس الوقت.
- راعي عوامل الأمان.
8 نصائح للتوفير في المصاريف عند استقبال مولود جديد
-
مشاكل بيع وشراء المستعمل
- زي كل حاجة لها ميزات وعيوب، ولحسن الحظ عيوب بيع المستعمل قليلة بس هنقولك عليها:
- بتاخد وقت في التواصل مع المشترين.
- هتقابلي ناس تزهقك في ترتيب المواعيد أو حتى الفصال.
- بتشتري حاجات مختلفة عن المعروضة في الصور، وصاحبها بيرفض ترجعيها له.
- ممكن تتعرضي لمضايقات لو حطيتي رقم التواصل بتاعك.
- في ناس ممكن تشهر بيكي لو اشتروا منك حاجة وماعجبتهمش، وكانوا عاوزين يرجعوها بعد وقت من شراها منك، بس تقدري تتجنبي ده بإنك تكوني واضحة جدًا مع المشتري.
- هتقابلي تعليقات زي: لو مش محتاجة الحاجات دي وزعيها للغلابة، إي ده إنتي هتشتري مستعمل؟ هو انتي محتاجة فلوس؟، خلي حاجات البيبي هتنفعك لما تجيبي كمان طفل.
5 أفكار لـ توفير مصروف البيت والميزانية
وفي الآخر عاوزه أقولك إنك تجربتي في بيع وشارء المستعمل، فادتني جدًا في ترتيب أولوياتي في الميزانية، وبالعكس ما حرمتنيش من شراء الجديد، بقيت بشتري جديد وأنا عارفة إن فلوسه هستفيد بيها تاني لما أبيعه مستعمل، فلو ليكي تجربة احكيلنا عليها في التعليقات.
التعليق باستخدام حساب فيس بوك