محتويات المقال
أكتر حاجة بتسحب وقت في رمضان هو المطبخ، طبخ وغسيل مواعين وتنظيف، وهكذا، سواء كنتي ربة بيت أو أم عاملة رمضان السنة دي قررت إني أخفف المعاناة دي وأستفيد أكتر من الشهر الكريم. خاصةً وإن منظر الحوض مع أطنان المعالق والأطباق بعد الفطار تسد نفس أي إنسان، خاصةً لو الكلام ده حصل بعد عزومة مثلًا. في المقال ده، هاحكي تجربتي واللي ساعدتني في تقليل مواعين عزومة رمضان، ونتيجتها كانت عظيمة في رمضان 2022.
طرق تقليل مواعين عزومة رمضان
استعيني بالبوفيه
عارفة البوفيه اللي بتفتحيه كل سنة مرة؟ جمّعي كل المعالق والشوك والأطباق الزيادة وعلى البوفيه على طول، كل واحدة فينا بتكون عارفة هي بتحتاج كام معلقة وطبق وشوكة وهكذا، عندي مثلًا عددنا 5 فخليت من كل حاجة 5 مع سكينتين واحدة للخضار وواحدة للحوم، ده خلاني طول الوقت مفيش مواعين في الحوض، لأن أي حاجة باحتاجها، باغسلها على طول. نفس الشيء مع الأطباق سواءً شوربة أو غرف أو أطباق عادية للرز، باغسلهم أول بأول.
رجل البلاستيك صديقي
وشي بقى مألوف بالنسبة للراجل بتاع البلاستيكات اللي في منطقتي، أوقات كتير بالجأ له عشان أشتري أطباق فوم ومعالق بلاستيك خاصةَ لو باخد حاجة لحد وأنا رايحة أزوره، أو لو هنفطر في مكان مفتوح، أو لو هابعت صينية لحد. باختار أشتريها ستانلس من بتاع البلاستيك بحيث ما يبقاش في حاجة هترجع، وده كمان وفر معايا كتير جدًا.
شغلي غسالة الأطباق
غسالة الأطباق واحدة من الاختيارات المنسية، أنا واحدة من الناس عندي غسالة الأطباق من وقت جوازي، لكن مش بالجأ لها غير في الظروف الطارئة، ما اعرفش إيه السر. قررت أخيرًا استخدمها وده كمان سهل عليا كتير في التخفيف عني.
استخدمي الميكروويف
لما تيجي تسخني الأكل البايت، فيه طريقتين. إما إنك تستخدمي حاجة أصغر تسخني فيها عشان ما تسخنيش الأكل كله، وده هياخد منك مواعين أكتر، أو إنك تغرفي الطبق مباشرة وهو ساقع من التلاجة، وتدخليه المايكروويف مباشرة بحيث ما توسخيش حاجة في النص، دي كمان طريقة بتقلل المواعين كتير جدًا.
أولادك يساعدوكي في غسيل المواعين
لو أولادك في سن مناسب أكبر من 8 سنين مثلًا، هيكون مناسب لو علّمتيهم إن كل طفل منهم، يشيل الحاجات اللي أكل فيها على طول ويمسح مكان ما أكل. وكمان يغسل طبقه وشوكته ومعلقته بعد لما يخلص. ده هيخف من عليكي كتير وهيحسسك براحة وبراح أكبر وبرضه هيقلل من كمية المواعين اللي مش نضيفة.
الأعمال المنزلية للأطفال حسب كل سن
قولي لجوزك يشارك معاكي مش عيب
في أوروبا والدول المتقدمة، الرجالة بتساعد الستات عادي. وزي ما احنا عارفين، ابنك على ما تربيه وجوزك على ما تعوديه. حاول تعودي جوزك كده باللطف، إنه يشيل مطرحه زي الولاد، وإنه كمان كوباية الشاي اللطيفة اللي بيحبها من إيدك هيكون لطيف إنه يغسلها وبدل ما يحطها في الحوض، يحطها في المطبقية نضيفة على طول، ده هيخلي الامور ألطف كتير.
التعليق باستخدام حساب فيس بوك