محتويات المقال
سفر الأزواج دلوقتي مش رفاهية، لإنه مابقاش بسبب تحسين الحالة المادية بس، لكن بقى له أسباب مختلفة كتير عن زمان، وظهرت احتياجات جديدة للعصر ده، زي اكتساب جنسية أجنبية، أو دراسة تخصص معين نادر، وغيرها من الأسباب اللي بتتطلب مدة سفر طويلة، ومش في كل الأحوال بيقدر الزوج ياخد أسرته معاه، وفي بعض الحالات بيحتاج وقت طويل على ما يقدر يزبط أوضاعه وأوراقه ويستقدم زوجته وأولاده، وهنا بتنشأ مشكلة كبيرة، وهي بعد الزوج عن زوجته، سواء كان عندهم أولاد أو لأ، وتأثير البعد على الحياة الزوجية.
وفي المقال ده هحكيلكم تجربتي مع سفر جوزي:
الواحدة فينا بتجوز من الأساس علشان تعيش مع شريك حياة، وتحس معه بالمشاركة والأمان والحب، فلما بيسافر الشريك ده بترجع الزوجة لحالة ما قبل الزواج، بس بعد ما تكون جربت كل حاجة حلوة مع جوزها، فشعور الافتقاد بيكون مؤلم جدًا، ده بالإضافة للمسؤوليات الجديدة اللي هتتحملها بعد سفر الزوج.
وهنا بييجي الدور المهم جدًا للتواصل العاطفي، لإن دي الحاجة الوحيد اللي هتهون الوقت عليهم هما الاتنين، صحيح التواصل العادي مهم، بس ده ممكن الزوجة تعمله مع صديقاتها أو مامتها وأختها، لكن التواصل العاطفي مش هيحصل غير مع الزوج.
-
إيه هو التواصل العاطفي؟
هو الكلام عن المشاعر، والتعبير عن كل إحساس بنمر بيه، وده لازم يحصل كل يوم، ما يتسابش للظروف، ووقتنا الفاضي، لإنه يعتبر تعويض عن الحاجات اللي كنا بنعملها مع بعض كل يوم بس وقفت بسبب الغياب، صحيح إن في الحياة الطبيعية مش دايمًا بيحصل إن الأزواج يقولوا لبعض كل يوم كلمة “بحبك” ولا كل يوم بنجيب هدايا لبعض، بس بتحصل حاجات تانية، زي لمسة إيد حنونة، أو حضن آخر اليوم، أكلة حلوة يتشاركوا فيها، موقف بيعبر عن الحب واللهفة، فلازم ده كله يتعوض بالكلام العاطفي.
-
هنعمل إيه في العلاقة الحميمة؟
هل هي حاجة سهلة إن الزوجين يفضلوا وقت طويل ما يمارسوش الجنس مع بعض؟ طبعًا لا، بس ليها بعض الحلول المؤقتة لحد ما تتقابلوا وتمارسوا العلاقة الزوجية بشكل طبيعي، زي تبادل الصور عبر تطبيقات تثقوا في خصوصيتها، أو الكلام عن الجنس اللي كنتم بتمارسوه مع بعض، أو تخيل حاجات عاوزين تعملوها مع بعض لما تتقابلوا، بس أهم حاجة تمسحوا كل الصور والمحادثات من على أجهزتكم بعدها، تجنبًا لأي مواقف أو مشاكل.. ومن التطبيقات إللي بتوفر مسح فوري للصور والمحادثات تطبيق تيليجرام. تقدري تظبطي الخصائص وتمسحي كل حاجة بنفسك من على تليفوناتكم انتوا الاتنين.. ولو فيه صور خاصة، جدًا ضروري ما يكونش وشكم باين فيها.
-
التواصل العملي:
اتشاركوا تفاصيل حياتكم مع بعض، لو بتشتروا لبس استشيروا بعض في الألوان والأذواق، ولو التوقيت بين البلاد قريب، تقدروا تتشاركوا في الوجبات، والقهوة.
احكوا لبعض كل واحد يومه كان عامل إزاي، وخففوا عن بعض أي متاعب بتمروا بيها.
-
نصايح عامة ليكم في فترة السفر:
- خلوا قرار السفر قرار مشترك ما بينكم، لإنه مش سهل، فلازم تكونوا إنتو الاتنين مقتنعين بيه ومستعدين تتحملوا مصاعبه مع بعض.
- لو بعد السفر اكتشفتوا إنكم مش قادرين تكملوا في الوضع ده، وفروا على نفسكم الوقت والجهد وارجعوا لحياتكم الطبيعية مع بعض.
- حاولوا متسمعوش للتعليقات السلبية اللي حواليكم، زي إنتي إزاي سايباه يبعد عنك، أو على إيه التعب ده كله.
- انتهزوا أي فرصة لتقضية الأجازات مع بعض.
- اعتبروها فترة خطوبة وهترجعوا لبعض تاني، وعيشوا الحلو اللي فيها.
- فكروا بعض كل شوية بالأسباب اللي أخدتوا عشانها القرار ده.
- افتكروا إنها فترة مؤقتة وهتعدي.
- فكروا بشكل إيجابي، إن الفترة دي لاختبار متانة علاقتكم، وفرصة تشتاقوا لبعض أكتر.
لو معاكم أولاد، شوفي المقال ده: التربية عن بُعد: لمّا الأب يكون مسافر
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك