من المهام الأساسية في رعاية أفراد الأسرة تجهيز البيت حسب كل موسم، والشتاء واحد من المواسم دي ومهم ليكي والأطفال. طيب تجهيز البيت للشتاء بيكون ازاي؟ .. الفكرة إنك محتاجة تعرفي شقتك ملامحها إيه بالضبط، يعني شقتك بحري ولا قبلي، بتشوف شمس ولا لأ، حجم التهوية في الشقة قد إيه، الحالة الصحية لأفراد أسرتك، يعني مثلًا هل حد بيعاني من حساسية موسمية؟ أو أي عارض مرتبط بتغير الفصول خلال السنة، كلها اعتبارات هتحتاجي تحطيها في حساباتك في تجهيز البيت للشتاء.
النهارده، هاقول لك على شوية إجراءات أنا بعملها مع بداية دخول الشتاء بتفرق معايا كتير، وبتخلي الفترة دي تعدي بسلاسة من غير إحساس بتقل المهمة دي على قلبي، فتعالي أقول لك باعمل إيه.
طرق تجهيز البيت للشتاء
- عملية التنظيف.
- تغيير الملابس والمفروشات.
- طرق لجعل منزلك أكثر دفئًا في الشتاء.
- الحفاظ على البيت من أمراض وميكروبات فصل الشتاء.
عملية تنظيف وترتيب المنزل
- في البداية، لمعي الأثاث الخشبي، التحف، الشبابيك والأبواب، واستخدمي مطهر في مياه التنظيف، ولو عايزة تستخدمي حاجة مطهرة طبيعية، فالخل يعتبر بديل ممتاز وفي نفس الوقت مالوش تأثير سلبي على الأثاث.
- نظفي المراوح كويس وغلفيها بالتغليف الخاص بيها اللي أصبح منتشر وتقدري تشتريه من محلات الخردوات، علشان تحافظي عليها نظيفة لحد الصيف اللي جي.
- نفضي الأماكن المتغطية بالأتربة تحت سقف الغرف زي مثلًا فوق الدولاب والأماكن الضيقة اللي بتحب العناكب والحشرات القاعدة فيها.
- نظفي المطبخ كويس جدًا من الدواليب، طهريها وارمي أي بقوليات أو توابل تشكي إنها فيها سوس حتى لو كانت كتيرة. وعلشان تعرفي إذا كان حصل عدوى ولا لأ، شوفي في آخر العبوة اللي فيها التوابل أو البقوليات: لو لاقيتي في أخرها زي تراب ناعم، اعرفي إنها مسوسة ولازم تخلصي منها.
- تاني خطوة في المطبخ هي تنظيف السيراميك بالمنظفات وتعقيمه كويس لأن المطبخ من أكثر الأماكن عرضة للجراثيم. مطبخك بؤرة جراثيم
- تنظيف سيراميك وبلاط غرف الشقة بالكامل، مع تهوية السجاد أو حتى ممكن تبعتيه للتنظيف. أنا بانضف البيت في ربع ساعة، اعرفي ازاي هنا.
تغيير الملابس والمفروشات
بعد عملية التنظيف العميقة للبيت، بندخل على الخطوة اللي بعدها لتجهيز بيتك للشتاء بطريقة منظمة وسهلة، وهي عملية تغيير الملابس والمفروشات.
وهاقول لك شوية نصائح علشان تسهل عليكي الخطوة دي.
- أول حاجة، خرِجي الملابس الشتوية من دولاب التخزين أو الشنطة أو أيا كان مخزنها فين ونظفيها أو هويها كويس قبل ما تحطيها في الدواليب علشان تستخدميها بشكل يومي. وبعد كده، رتبي الملابس الصيفية مكانها وحطيها في المكان اللي انتي مخصصاه للتخزين
- خرجي الألحفة والبطاطين وهويها كويس. ولو إنتي مش شايلاها مغسولة، يبقى لازم تبعتيها تتغسل قبل الاستخدام.
أهم طرق لجعل منزلك أكثر دفئًا في الشتاء
- في الأول بصي على شبابيك وأبواب بيتك لو فيهم حاجة محتاجة صيانة بأي شكل، علشان تمنعي من دخول الهواء أو مياه الأمطار في البيت.
- بدلي السجاد الخفيف الصيفي بسجاد ثقيل مخصص لفصل الشتاء زي مثلا السجاد الصوف، وهو على فكرة متوافر في كل محلات السجاد، وله مفعول سحري في تدفئة الغرف لأنه بيحميكي من الرطوبة والسقعة اللي بتطلع من الأرض.
- افرشي البطانيات الخفيفة اللي إحنا بنسميها دفاية على سراير الأطفال لأنها بتساعد على تدفيتهم بسرعة.
- غطي المساحات الفاضية بالمشايات الصغيرة في غرف الأطفال.
- استخدمي الدفاية الكهربائية، شغليها لمدة ساعة علشان تدفي الأوضة وبعد كدة طفيها علشان تتجنبي أي مشاكل صحية ممكن تنتج من الاستخدام الزيادة ليها.
- جهزي وجبات ومشروبات ساخنة ومفيدة لرفع المناعة وتحسين الشعور بالدفء طول فصل الشتاء.
شوفي هنا طرق تدفئة المنزل في الشتاء .. مش هتحتاجي دفاية
الحفاظ على منزلك من أمراض وميكروبات فصل الشتاء
في الآخر فيه شوية عادات بنعملها بهدف الحصول على الدفا، بس الحقيقة العادات دي بتكون من عوامل انتشار الامراض زي مثلا :
- قفل النوافذ باستمرار للشعور بالدفء، ودي أول العادات الخاطئة اللي بنعملها في الشتاء، لأن قفل النوافذ مش بيسمح بدخول الشمس والهوا للبيت، واللي بدوره بيفضل محافظ على الرطوبة جوة البيت على الحوائط والأرضيات. وده بيجيب نتيجة عكسية إنه بيبرد البيت، ده غير إنها من أكتر العادات اللي بتسبب أمراض وانخفاض في المناعة وخصوصا عند الأطفال، علشان كده من المهم جدا فتحها طول النهار على الأقل.
- عدم وجود تهوية في الحمامات بيسبب زيادة الأبخرة في البيت. علشان كده من المهم جدا يكون فيه شفاط كهربائي في الحمام ،وخصوصا لما بعد الاستحمام بمياه سخنة فالبخار ما يفضلش محبوس جوة البيت، لازم يطلع بره.
- التعرض لأشعة الشمس من أهم العوامل والسبل الوقائية لتجنب أمراض الشتاء لأنه بيرفع «فيتامين د» في الجسم، وده اللي بدوره بيخرج طرد الرطوبة الزايدة في الجسم.
دلوقتي بعد النصايح دي إنتي مستعدة لتجهيز بيتك للشتاء، اعملي كل حاجة بالتدريج مش لازم أبدًا كله يتعمل كله مرة واحدة علشان ما تتعبيش، إنتي عايزة تجهزي بيتك للشتاء مش تتعبي لدرجة المرض.
التعليق باستخدام حساب فيس بوك