الحقيقة الثدي بيتعب معانا جدًا من لحظة ما بنعرف بالحمل وتبدأ الآلام فيه كواحدة من علامات الحمل، مرورًا بالرضاعة الطبيعية واللي بتصاحبها مجموعة من الطقوس زي العصر اليدوي للثدي مثلًا، صحيح حجم الثدي عمره ما بيأثر على الرضاعة الطبيعية. لكن بمجرد ما تنتهي رحلة الرضاعة الطبيعية، بتبدأ مشاكل كتير متعلقة بالثدي: أولها احتقان الثدي بعد الفطام، واللي بيكون مؤلم. لكن في النهاية، مؤقت وله علاج بمجرد تجفيف لبن الثدي، بعدها بييجي ليفل الوحش وهو ترهل الثدي بعد الولادة بسبب الرضاعة. ودي مفيش أم تقريبًا بتعدي منها، مهما كان حجم الثدي كبير قبل الولادة والرضاعة كله بيذهب مع الريح وبيبقى الشكل أقرب للفلات مع شعور عارم بالاستغراب اللي هو “مين اللي طفى النور؟” عشان كده هاكلمك عن تجربتي في تكبير الثدي بعد الفطام.
طرق تكبير الثدي بعد الفطام
- حقن الدهون الذاتية
- عملية الرفع والشد
- التمارين الرياضية
حقن الدهون الذاتية
في البداية كانت دي أكتر حاجة ملفتة من وجهة نظري، يوتوبيا، الدهون تتاخد من الأماكن المليانة وتتحقن في الأماكن الفاضية، زي الثدي، كده تبقى المشكلة اتحلت! لكن الموضوع مش بالجمال والبساطة دي، في النهاية هي عملية جراحية لذلك قررت إني أشوف حل تاني.
عملية الرفع والشد
الحقيقة إن فيه عملية جراحية لرفع وشد الثدي، ممكن تقوم بالواجب وترجع الثدي لشكله القديم ويمكن أحسن حسب حالته والمرحلة اللي هو فيها. والحقيقة إن أطباء كتير شرحت عملية شد ورفع الثدي بالتفاصيل المملة، لكن برضه بعد عملية الولادة القيصرية، بقى عندي وعند أمهات كتير فوبيا من فكرة التعرض لعمليات جراحية.
توصيات الأمهات
دخلت على جروب راحة بالي وسألت الأمهات عن رأيهم، والحقيقة إن كان فيه إجماع إن ضروري التدخل وإنها مشكلة عامة، عند كل الأمهات اللي مرت بتجربة الرضاعة الطبيعية ووصلت لمرحلة الفطام، بعض الامهات فضلت السيليكون والحشو، والبعض التاني قرر اللجوء لحقن الدهون الذاتية وفي أمهات اتكلمت عن طرق طبيعية، ودي أكتر حاجة استهوتني في النهاية.
التمارين الرياضية: الحل بيبدأ في الجيم
اكتشفت إن فيه طرق طبيعية لتكبير الثدي وكمان أكلات وتمارين، باختصار الثدي مكون من عضلات زي كل مكان في الجسم، والحقيقة إن المرواح للجيم ومن بين التمارين هناك، بيكون في تمارين بعينها لشد عضلات الصدر. في البداية بيكون في ألم في الثدي، وبعدها بيبدأ شكله يختلف تدريجيًا، لحد ما العضلات تستعيد مظهرها الصحي. وبالتالي الثدي يكون شكله طبيعي مشدود وجميل بدون جراحة أو عمليات.
اكتشفت كمان إن اتباع نظام غذائي صحي مش بس بيخسس لكن كمان بيساعد إن الثدي يستعيد شكله الصحي، خاصةً خطوة استخدام زيوت صحية ومكسرات واستبعاد النشويات، والنقطة الأهم، إن لما الجسم بيخس وتحديدًا منطقة البطن، بتبدأ باقي معالم الجسم تبان وهو ده حرفيًا المطلوب.
التعليق باستخدام حساب فيس بوك