قبل ما أكتب الموضوع ده، لازم أوضح نقطة: إن المقال ده مقال شخصي بناءً على وجهة نظري الشخصية في موضوع الجواز، وتجربة أنا خضتها بالكامل. ورأيي زي ما العنوان بيقول: محدش يا جماعة يتجوز قبل ما يستقر، أنا واحدة أتجوزت في بداية التلاتينات من عمري، بس قبل اليوم ده، أنا قررت قرار يحفظ لي مبدأ إن دراعي ما تتلويش في أي علاقة أنا هادخلها. وكانت سياستي هي أني لازم أستقر الأول، بمعنى أنا محتاجة أكون مستقرة نفسيًا وعقليًا وماديًا قبل ما أتجوز، كان حلمي إني أتجوز الشخص لذاته مش علشان ما وراء هذا الشخص.
يعني مش هاتجوز علشان يكون لي بيت ولا ألاقي حد يصرف عليا ولا حد يقضي مصالحي ولا أي حاجة. أنا ببساطة أعرف أعمل كده وأكتر كمان وعلى أكمل وجه. وحقيقي دي كانت رحلة طويلة. أنا على فكرة باتكلم على مستوى الناس اللي عناصر حياتهم طبيعية، يعني مش مثلًا حد فقير جدًا أو يتيم وبيمر ظروف اجتماعية، فالزواج بالنسبة لهم طوق نجاة، أنا باتكلم عن اللي حياتهم عادية مفيش فيها إجبار على الاحتياج ده.
نرجع لموضوعنا تاني: اللي أنا بقوله ده فيه ناس بتسميه نضوج، تمام حاجة حلوة جدًا، أنا وصلت لمرحلة النضوج دي لوحدي، وهو ده الطبيعي والمفروض. احنا لازم نتعلم نقطة في غاية الأهمية يا جماعة: احنا بنتولد لوحدنا وبنموت لوحدنا وبنتحاسب لوحدنا. يعني الحساب كله علينا مش هينفع في يوم نقول أصل فلان هو السبب. حقيقي ده مش بيحصل، فلما تيجي تنضجي، ما تفتكريش إن الرحلة دي ينفع تخوضيها بشراكة من غير ما الشراكة دي تتأثر وقد تنهار بسبب تبعيات الرحلة.
النضوج قرار على فكرة، ما تقدريش إنك تنضجي غير لما تقرري إنك تعملي كده فعلًا وهو قرار فردي تمامًا.
لما تتجوزي من غير ما تكوني وصلتي للمرحلة دي، وتخوضي رحلتك مع زوجك، هتلاقي إن تراكمات الرحلة دي على علاقتكم أثرها مش حلو أبدًا. هتلاقي نفسك انتي وهو، كل واحد حدد بالفعل هو محتاج إيه وعايز إيه ويستحق إيه وده ممكن بكل بساطة مش متوفر فيكم مع بعض، وده بيسهل قوي انهيار العلاقة أو على أقل تقدير استمرارها في شكل منهار.
علشان كده، أرجوكي استقري وانضجي علشان تعرفي تدخلي في علاقة عميقة ومعقدة زي الزواج. طالما الموضوع لسه في إيدك وما اتجوزتيش. وفي اللحظة اللي تحسي إنك وصلتي لمرحلة النضوج دي، أرجوكي اختاري الأصيل، الأصيل وبس. انتي مش هتعيشي مع شهادته ولا فلوسه ووظيفته، طبعًا كل ده مهم، بس اللي هيعيش معاكي وهتتعاملي معاه يوميًا هو الأصيل، ما تتنازليش علشان تقدري تعيشي حياتك بالحد الأدنى من المشاكل.
التعليق باستخدام حساب فيس بوك