محتويات المقال
“ده أنا هعمل لولولي فرح!” الكلمة دي صديقتي قالتها لي لما سألتها عن إحساسها لو اضطرت تفطم بنتها اللي بترضع بطريقة طبيعية، صديقتي كانت مستاءة جدًا من فكرة الرضاعة ومش حابة تكمل فيها بأي شكل من الأشكال، نفس الفكرة نقلتها لي عاملة في كوافير دخلته واتفتحت سيرة الرضاعة، فقالت بمنتهى الثقة: “أنا العيل عندي بيتم السنة، بفطمه بعدها بشهر أو شهرين بالكتير”. سمعتهم وأنا جوايا سؤال “ازاي؟!”
اقرأي أيضًا: دليلك السريع لفطام طفلك من الرضاعة الطبيعية
أزمتي مع الفطام
في ابني الأول، خضت تجربة الفطام عند سن الـ سنة وخمس شهور، كنت حزينة جدًا وندمانة ونفسيتي تعبت لفترة طويلة بعدها، لإن الفطام مكانش اختياري، ابني كان عنده حساسية طعام متعددة، وكنت مضطرة أمتنع معاه عن كل حاجة ممكن تتعبه، وده خلاني امتنع عن أكل كتير جدًا، وبالتالي صحتي تعبت للدرجة اللي خلتني آخد أجازة بدون مرتب من الشغل، لإني ما بقيتش قادرة أقوم وأنزل الشارع.
حسيت بالذنب لفترة طويلة لإن الشكل الوحيد للحليب بالنسبة لابني كنت أنا مصدره، وبالتالي حرمته من مصدر تغذية رئيسي، لكن في المقابل، هو كان في سن مش بطال، وكمان عشان أقدر أراعيه وأكمّل دوري كأم، كان لازم وحتمًا أفطمه وأبدأ كورس فيتامينات عشان استعيد صحتي اللي راحت ووزني اللي نزل حوالي 10 كيلو مع المنع الصارم للأكلات الي بتسبب له حساسية.
فطمت ابني في العيد، وكنت حاسة بقهرة شديدة، رغم إني فطمته بالتدريج، وهو نفسه ما حسّش بمشكلة تذكر، ولا عانى بأي شكل لإنه كان فطام بسيط ومتدرج وبهدوء ومن غير عصبية أو منع صارم، بمنتهى اللطف والبساطة، بس قلبي كان واجعني، وعمالة اسأل نفسي خلاص كده؟! معقول مش هخده في حضني وأطبطب عليه وأضمه وهو بيرضع بنهم وبيغمض عينه ويسرح من فرط إحساسه بالراحة وينام في النهاية؟ إزاي هستحمل؟ بكيت وحزنت حزن شديد واتحجر اللبن في صدري وعانيت من الألم!
اقرأي أيضًا: أفضل طرق تجفيف لبن الثدي وقت الفطام
فطام مؤقت
لذلك قررت لما خلفت بنتي التانية إني هرضعها لحد لما تكمل السنتين من عمرها، لكن القرار ده كان على وشك إنه ينتهي لما جالي مرض الحزام الناري، والدكتور طلب مني أفطمها عند عمر السنة لإنها ممكن تتعدي مني، وساعتها جالي انهيار من شدة الحزن والصدمة، ازاي؟ ده أنا كنت مقررة أوفّيها حقها وأعوض إحساسي بالذنب .. ازاي وإيه اللي حصل؟
بكيت كتير وحالتي النفسية ساءت، لكن أخدت قراري في النهاية إنه مش هيكون فطام نهائي، هيكون فطام مؤقت بس مدة العلاج، وهرجع بعد ما أخف أرضّعها من تاني، المفارقة الغريبة إن البنت ما حستش بمشكلة، وما فرقش معاها كتير الفطام، والأغرب إني لما حاولت أرجع أرضعها، استغربتني ورفضت ترضع! نفسيتي تعبت وبقيت أحاول معاها كتير لحد لما افتكرت الرضاعة، والغريبة إنها كانت شبه اللي فاقد الذاكرة واستردها، فجأة وبعد ما كانت مستغربة ورافضة، رضعت بنهم شديد، وفي اللحظة دي حسيت بنعمة ربنا عليا وكرمه.
اقرأي أيضا: تجربتي: حكاية ابني مع حساسية الطعام
فطمت بنتي مرتين!
لما بنتي وصلت سن سنة وعشر شهور، كنت خلاص تعبت من الصحيان الكتير والعض والجروح الشديدة من أثر أسنانها، وكمان قلة أكلها، فقررت أفطمها لكن اصطدمت بخوفي القديم، وبدأت تطاردني أسئلة من عينة “هو كده خلاص؟ مش هرضعها تاني؟!” الحقيقة، المرة دي بنتي كانت متمسكة بيّ بشكل غريب، وكانت رافضة أي شكل من أشكال الفطام التدريجي!
فطام تدريجي ولا مرة واحدة؟
السؤال ده أمهات كتير بتسأله والحقيقة إني قلبًا وقالبًا مع الفطام التدريجي مهما حسيتي إنه صعب، وحتى لو مستحيل، حاولي مرة واتنين وعشرة لحد لما تنجحي تقللي ولو رضعة واحدة، وبعدها حاولي تقللي رضعة كمان. الفطام التدريجي حتى لو أخد وقت طويل أثره مش بس بيكون على الطفل اللي ما بيحسش بالغدر ولا الضيق، لكن كمان على الأم. المرة دي ولإن بنتي كانت رافضة الفطام، ورافضة أنقص ولو مرة واحدة من الرضعات، التدريج كان بطيء جدًا جدًا، أخد حوالي شهر وشوية، كتير كنت أنقص فيهم رضعة، ومع الضغط أرجعها تاني وحسيت في لحظة إن الفطام اللي خضته مرتين قبلها مستحيل المرة دي.
نصائح الأصدقاء
كتبت استيتس يائس على فيسبوك لإني كنت فقدت الأمل في الفطام عن أسهل طريقة تجنبني المعاناة خاصةً إن بنتي متعلقة بيّ جدًا، ناس كتير قالت لي سيبيها تفطم نفسها بنفسها مع الوقت، وناس نصحتني أفطم مرة واحدة، وناس أكتر أكدوا لي وجهة نظري إن الفطام التدريجي والصبر الطويل هم مفتاح الفطام الناجح.
بعد مرات إخفاق كتيرة جدًا، نجحت ألهيها، بدأت أنقص رضعة ورا التانية على مدار أيام كتير لحد لما وصلت لليوم النهائي.. مش هانكر إنها عيطت وأنا كمان، لكن اللي ريّح قلبي إنها مش جعانة، هي بتعيط لإنها متعودة على شيء ومش قادرة تمارسه.. مجرد تعوّد، تاني يوم كان غضبها وقت النوم أقل، تالت يوم كان أحسن كتير، وخلال أسبوع كان كل شيء أحسن مما أتخيل، والخبر الجميل إني ما اضطرتش آخد حبوب تنشيف لبن لإن الألم كان محتمل مش زي أول مرة نهائيًا، ودي ميزة الفطام التدريجي.
الخلاصة
الرضاعة فعل عظيم، وشعور رائع للأم قبل الطفل، منظر بنتي وابني لما يغمضوا عينيهم بحالة من الوله والسعادة والراحة الشديدة ويغوصوا في عالم الأحلام وهم بيرضعوا كان بيديني شعور رائع. الرضاعة بتسكتهم، بتغذيهم، بتكبرهم، بتطمنهم، بتوصل لهم حبي وعنايتي بيهم ورزقهم اللي ربنا باعته ليهم من خلالي. الرضاعة الطبيعية هي أفضل هدية ممكن تقدميها كأم لطفلك، والفطام رغم قسوته النفسية قبل البدنية هو أول درس للطفل في الحياة إن مفيش شيء دائم وإنه لازم دايمًا يتكيف ويتعايش ويستمتع بحياته.. الفطام نهاية مرحلة جميلة، وبداية مرحلة أجمل بنشوفهم فيها وهم بيكبروا بفضل ربنا وعنايته واحنا قصادهم بنقول من قلبنا الحمد لله.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك