من تجربتي: إزاي تستفيدي بوقتك لو سبتي شغلك؟

في وقت ما من حياتك، هتلاقي نفسك قعدتي فجأة في البيت بعد سنين شغل كتير، سواء ده حصل بإرادتك أو بدون رغبتك. فلازم تكوني عارفة شوية حاجات بخصوص القعدة في البيت بعد سنين الشغل الطويلة. خاصةً لو انتي من النوع اللي نفسيته بتتعب لما يقضي يوم على بعضه في البيت بدون ما ينزل. باتكلم في المقال ده من واقع تجربتي: بعد 13 سنة شغل متواصل، اضطريت لظروف ولادة بنتي التانية إني أقعد في البيت. الكلام دا حصل من سنة، وعلمني دروس كتير جدًا حبيت اختصرها في المقال ده. أتمنى إنه يساعدكم في رسم صورة مختلفة للي جاي.

إيه اللي بيحصل لما بتقعدي في البيت؟

لما بتقعدي في البيت، فيه شوية حاجات بتفقد قيمتها بالنسبة لك، زي الوقت، النظام، الترتيب، الـ تو دو ليست. بتلاقي نفسك اتسحبتي، شغل البيت مش بيخلص ولا طلبات الأولاد. ومع وجود جائحة فيروس كورونا المستجد، الخروج بقى حلم.

اليوم بيبدأ وبسرعة بينتهي، بتبدأي تقلقي وتحاولي تخرجي بره الدايرة الجهنمية، تفكري في حاجة مختلفة ممكن تتعمل تشيل عنك الشعور بالضيق وعدم الإنجاز. وتبدأي ترسمي سيناريوهات، تكتشفي إنك بتأجليها يوم ورا التاني. لحد لما يعدي وقت كبير، وتبدأي تحسي إنك مش قادرة تلتزمي بأي حاجة بتقرريها أكتر من شغل البيت وخدمة الولاد. بعد فترة، بتفقدي الثقة في نفسك وممكن تدخلي في طريق الاكتئاب، لو ما لحقتيش تلاقي طريقة تنقذي بيها نفسك.

قعدة البيت أحسن ولا الشغل؟

الكلام اللي فوق ده ممكن يخلي البعض يتصور إن قعدة البيت أسوء من الشغل، وإن الحلم اللي بيراود بنات وستات كتير إنهم يخلصوا من الروتين اليومي للوظيفة اللي مضايقاهم هيوديهم لطريق أسوء.

خليني أقول لك من واقع تجربتي إن لا قعدة البيت أحسن شيء، ولا الشغل أحسن شيء. الاتنين لهم سلبياتهم وإيجابياتهم، والاتنين ما فيهمش واحد مجهوده أقل. لما بتقعدي في البيت، المهام بتطلع لك من تحت الأرض، والطلبات بتزيد فوق راسك. ولما تشتغلي، بتكوني طول الوقت حاسة بالتقصير وإنك مش قد الشيلة التقيلة اللي على كتفك. مهما قدمتي طول الوقت بتنهجي ومش ملاحقة.

مفيش اختيار صح واختيار غلط، فيه إدارة صح للموقف وإدارة غلط. وفي الحالتين، انتي المسؤولة عن النتيجة النهائية اللي لازم تكون مرضية ليكي في المقام الأول عشان ما توصليش لمشاعر مش ظريفة.

إيه الحل؟

الحياة مش كلها الأولاد والزوج وشغل البيت وباقي الحاجات اللي بتقطم ضهرك. انتي موجودة، واهتمامك بنفسك مش بس جسدي، كمان لازم يكون معنوي، لازم توصلي لنفسك رسالة طول الوقت إنك موجودة وشاطرة وبتعرفي تعملي وتتعلمي حاجات أكتر، حاجات تسعدك لما تعمليها وتلاقي نفسك بتقولي لروحك “والله برافو عليا”.

خطوات الحل

1. أول خطوة في الحل إنك تمسكي ورقة وقلم وتحلمي بدون أي قيود. اكتبي كل وأي حاجة تخطر في بالك نفسك تعمليها، سواء حاجة جديدة نفسك تتعلميها أو مكان نفسك تروحيه، أو حتى فيلم نفسك تشوفيه، اكتبي كل الحاجات اللي بتحلمي بيها ونفسك من زمان تعمليها، وخلي الورقة دي معاكي في الشنطة. كل لما تفتكري حاجة، زوديها، لحد ما تحسي إنك كتبتي كل حاجة. على المستوى الشخصي، كتبت في القائمة الخاصة بيّ أحلام كتير كان منها إني عاوزة أتعلم سواقة، ونفسي أعمل قناة على يوتيوب، وكمان نفسي أتعلم أعمل أكل حلو.
2. اختاري من القايمة الطويلة تلات حاجات فقط كمرحلة أولى. علمي عليهم بلون أحمر باعتبارهم أهداف عاجلة، وابتدي رتبي وقتك على أساس إن الحاجات دي أساسية. وافتكري دايمًا إن الحجة الشهيرة بتاعة “مفيش وقت” مش حقيقية. مهما كان الوقت ضيق والمهام كتير جدًا، لو انتي واخدة حياتك على محمل الجد، هتلاقي وقت وهتعرفي تخصصي جزء من اليوم عشان تحققي حلمك، حتى لو دقيقة واحدة تفتكري فيها إنك عاوزة “كذا”.
   * طول ما “كذا” في بالك هيحصل هيحصل. المهم تكوني مركزة وعارفة إنتي عاوزة إيه، لأن أحيانًا لما الوقت بيكون متاح بننسى إحنا كنا المفروض نعمل إيه في الوقت دا، ونتفاجئ إنه ضاع بدون ما نحقق فيه أي حاجة مهمة ونرجع نندم.
3. حطي جدول زمني للتنفيذ: يعني ما تسيبيش الدنيا مفتوحة، بس المهم يكون جدول واقعي. على سبيل المثال، لو هتتعلمي خياطة، ممكن تخصصي ساعة واحدة يوميًا للهدف دا، تكوني فيها بكامل تركيزك واهتمامك، حتى لو الساعة دي تضمنت إنك تروحي عند أقرب محل متخصص تشتري منه الخيوط والقماش. أو إنك تقضي وقت كويس على مواقع البيع أونلاين تتعرفي أكتر على ماكينات الخياطة وأنواعها. كل دي خطوات ناحية حلمك، وما دام عدى عليكي ولو دقيقة واحدة بتعملي حاجة تخصك خلال اليوم، يبقى انتي كدا ماشية صح.
4. وثقي كل خطوة بتعمليها، بصورة حلوة، أو بمذكرات تكتبي فيها وصلتي لفين ونفسك تعملي إيه تاني، كلمي نفسك على الورق عن أحلامك، طموحاتك، الحاجات اللي مضايقاكي، نجحتي في إيه وفشلتي في إيه، والتزمتي بنسبة قد ايه بجدولك وهل انتي راضية عن نفسك ولا لأ.
5. آخر خطوة: انتي مديرة نفسك. يعني لازم تكوني رقيبة شاطرة وأمينة على وقتك ونفسك وأحلامك، لما هترتبي يومك وتحققي إنجازات مهما كانت بسيطة وصغيرة تخصك انتي مش حد تاني. هتحسي إنك لسه موجودة، وإنك قادرة تعملي حاجات كتير حلوة وهتنتظري من نفسك حاجات أحلى ونجاحات أكبر تسعدك بجد. الأهم إنك هتكوني سعيدة ومش هتحسي إنك بتفني نفسك عشان غيرك بس. انتي كمان ليكي نصيب من نفسك.

اعرفي ليه:   بلاش تبقي سوبر وومان