“بطنك شكلها وحش قوي”.. “بطنك شكلها أكنك عندك 70 سنة”.. “أنا عمري ما شفت بطن ست حصل فيها كدة”.. “بطنك شكلها صعب قوي”.. “اعملي عملية تجميل”.. ” ما تجربي عملية شد البطن ” .. “بصراحة بقرف من شكل بطنك”..
الجمل دي عينة بسيطة من إللي كنت بسمعه بعد ما حصلت لي مشكلة في بطني.. ربنا رزقني بتوأم جميل، والحمد لله اتولدوا هما الاتنين بحجم كبير 3 ونص كيلو لكل طفل.. وده خلى بطني تتمدد جدًا وقت الحمل.. وبسبب إدماني على الطعام ومعاناتي مع البوليميا نيرفوزا لسنين طويلة زدت أربعين كيلو عن وزني .. لما كان أولادي عندهم أربع سنين كان وزني وصل لـ108 كيلو.. خليني أقولكم إنه البوليميا هي مرض نفسي متعلق بالأكل وفيه المريض بياكل كمية أكل رهيبة وبعدين يحاول يتقيأ أو ياخد ملينات أو أدوية تخسيس..
بداية حكايتي مع عملية شد البطن Tummy Tuck
في يوم ما وبالظبط في شهر فبراير 2016 وتحديدا في يوم الفلانتين .. قعدت أعيط لوحدي.. ست وحيدة.. معندهاش حبيب يقولها “بحبك” وعلى مشارف الطلاق .. ست بتكره جسمها وفاقدة كل أمل في إنها ترجع تاني زي زمان سعيدة ومنورة .. في اليوم ده تحديدًا قررت إنه روحي محتاجة تسكن جسم تاني.. جسم صحي.. جسم رياضي مشدود.. قررت إني هبدأ معركة في حياتي وهي معركة التعافي من إدمان الطعام والبكاء على أطنان الأكل والحلويات والدهون والنشويات..
وبالفعل بدأت لوحدي.. فضلت اتفرج على عدد مهول من فيديوهات الناس إللي خسوا.. فيديوهات كلها ألم.. ومعاناه لكن رغم كل ده فيها أمل وحلم ببكرة أحسن.. وكنت بشوف الناس بتخس كل يوم وأقول لنفسي أنا مش أقل من حد.. ولازم أبدأ..
أطلقت هاشتاج #من_الكرش_للكيرفي على فيسبوك وإنستجرام وبدأن أنشر عليه صوري كل يوم.. صوري وأنا وزدي زايد.. وأنا بتمرن.. صور أكلي الصح.. كنت بكتب كتير.. بكتب عن كل حاجة بحسها.. وعن معاناتي مع إدمان الأكل.. وبعدين قررت أدرس التغذية علشان أقدر أساعد نفسي.. ودرست دبلومة مدتها 3 شهور بتعلم فيها كل حاجة عن طريقة عمل الجسم مع الأكل وكنت بدوّن إللي بتعلمه وبجربه على نفسي..
من قبل الطلاق عشت فترة لوحدي مع أولادي.. كنت بتمرن كل يوم لوحدي.. نص ساعة وبعدين ساعة وبعدين ساعة ونص.. كنت بعرق مية ومع كل نقطة عرق كنت بحس إنه هيبقى فيه بكرة أحسن..
ونزلت الجيم.. وبقيت أجري كل يوم وأتمرن وآكل وأطبق إللي اتعلمته لحد ما فات شهر ورا شهر ورا شهر.. وبعد سنة ونص وزني بقى 60 كيلو بالظبط..
بقيت انسانة تانية جديدة.. ورجعت أسكن جوة جسمي وأصاحبه من تاني..
لكن للأسف رغم إنه جسمي كله ظبط واتشد وبقى رياضي.. إلا إنه بطني كانت بتزداد سوءا.. مش عارفة أوصفها.. بس هي كانت زي الكيس النايلون الفاضي.. جلد مترهل جدًا.. كنت متألمة منها قوي.. وخصوصا إني سمعت تنمر كتير عليها.. كنت بخاف قوي حد يشوفها..
طبعا في الرحلة الطويلة دي إللي كان فيها معاناة نفسية كتير زرت طبيب نفسي.. وأخدت مضادات قلق واكتئاب وحضرت جلسات كتير.. جلسات علاج فردية وجماعية.. واتعلم إزاي أفرّغ ألمي النفسي في حاجة غير الأكل.. اتعلمت حاجات كتير.. ولإني أصلا كاتبة، اتعلمت إزاي أداوي مشاكلي بالكتابة والتواصل الصريح مع الناس..
اتكلمت كتير عن بطني قدام الناس في الجروب العلاجي.. حاولت كتير أقبلها.. لكنت كانت دايمًا بطني حاجز نفسي كبير..
وساعتها فكرت إني أعمل عملية تجميل.. لأول مرة في حياتي أفكر أعمل حاجة تجميلية.. ودي كانت حاجاة كبيرة عليا.. أنا أصلا شخص طبيعي جدًا محب للفطرة.. بروح للكوافير قليل قوي لما يكون فيه مناسبة.. بعتني بنفسي من غير أي تدخلات وبخاف جدًا آخد أي Risk طبي خصوصا وإنه مامتي دكتورة..
لكن ماكنش قدامي حل تاني.. كل المتخصصين والأطباء أجمعوا إنه بطني مالهاش حل غير الجراحة.. والرياضة والخسسان كان بيزود ترهل الجلد زيادة..
أخدت قرار تنفيذ العملية بكل شجاعة.. بعد 3 سنين من المحاولات الفاشلة لتحسين شكل بطني.. وبعد تردد كبير.. أخدت القرار وأنا عارفة إنه فيه Risk زي أي قرار كبير شجاع أخدته في حياتي..
الألم إللي كان جوايا كان أكبر من خوفي.. الأمل في حياة أحسن كان بيزقني لقدام..
الألم النفسي كان محرّك.. ودايمًأ الألم بيكون محرّك لحاجات كتير..
دخلت المستشفى وأنا جوايا خوف وقلق ممزوج بالأمل.. مخلوط بابتسامة ست عايزة تعيش.. عايزة تجرب.. عايزة فرص تانية في الحياة..
اخترت دكتور اسمه حسين السيد.. شاب صغير لكن شكله شاطر وأمين.. ورحت قابلته في العيادة.. واتكلمت معاه من قلبي أكنه صديق رغم إنها كانت أول مرة أشوفه.. طلبت منه يساعدني.. ووثقت فيه.. وهي دي الحياة.. ساعات لازم وإنت بتقع بتحتاج تمد إيدك لحد يسندك وتجرب تثق في حد.. قولت له إني سمعت كلام كتير عن بطني.. وإني نفسي أرجع أتصالح تاني مع جسمي..
وعملت العملية.. وربنا كرمني جدًا..
كان فيه وجع بعد عملية شد البطن؟ طبعًأ كان فيه وجع.. ويكدب أي جد يقول إنه مفيش وجع.. لكن من رحم الألم والمعاناة الفرحة بتتولد.. بعد أسبوعين.. بكيت.. لأول مرة أشوف بطني زي الناس الطبيعية.. لأول مرة أشوف بطني زي ما كانت طول عمرها.. كل ما كنت بحس بشوية وجع كنت بقول لنفسي إنتي قوية يا شيماء وبطلة وهتقدري تعدي كل حاجة..
النهاردة بعد 4 شهور أنا إنسانة جديدة.. عدت بتجربة نفسية وجسدية خلتها أقوى.. خلتها تعرف إنها لسة قادرة تعافر ولسة قادرة تحارب علشان حياة أحسن..
بعد العملية دي خوفي قل كتير من الدنيا.. أخدت قرارات كتير أصعب متعلقة بحياتي.. العملية دي قوّت قلبي.
أنا عايزة أقول لكل ست إنه لسة الأماني ممكنة.. ولا إنهزام.. ولا إنكسار.. ولا خوف.. ولا.. ولا حلم نابت في الخلا..
التعليق باستخدام حساب فيس بوك