أنا شيماء الجمال.. أم لـ 3 أطفال.. خسيت 40 كيلو من وزني وعملت عملية شد وشفط البطن..
في مقال سابق اتكلمت عن الأسباب الشخصية والنفسية إللي خلتني آخد القرار إني اعمل العملية دي.. في المقال ده هجاوبكم عن أهم الأسئلة إللي ممكن تدور في بالكم عن عملية شد وشفط البطن.. والإجابات هتكون من واقع تجربتي الشخصية ومن طبيبي الخاص د. حسين السيد ومن مواقع أجنبية طبية متخصصة..
إيه هي عملية شد وشفط البطن؟
هي عملية جراحية الدكتور بيشيل فيها الجلد الزائد المترهل وكمية من دهون البطن وبيصلّح جدار عضلات البطن إللي ممكن يكون انقسم نتيجة للولادة أو لزيادة الوزن أو لعوامل السن ولو فيه فتاق في البطن الدكتور كمان بيصلحه.
بعد العملية دي المرضى بيتمتعوا ببطن مشدودة ومنحوتة وعضلات بطن أقوى من الأول بكتير.
مين أنسب سيدة ممكن تنفع معاها عملية شد البطن؟
أنسب سيدة هي إللي عندها ترهل شديد في الجلد تحت منطقة السرة نتيجة الولادات المتكررة أو نتيجة خسارة وزن كبيرة من الوزن أو بعد عمليات التكميم. وبصفة عامة لازم يتعمل فحص شامل للمريضة للتأكد من صحتها وإنها ما عندهاش مانع صحي إنها تعمل عملية زي دي.
كام تكلفة عملية شد وشفط البطن؟
الحقيقة مفيش تكلفة ثابتة أبدًا للعملية دي لإنه فيه عوامل كتير بتتحكم في السعر زي:
- -سعر المستشفى إللي هتتعمل فيها العملية.
- -نوع التخدير إللي هتختاره المريضة.
- -سعر الطبيب الجراح إللي هيعمل العملية.
- -هل هيتعمل شد للجلد فقط ولا شد للجلد وشفط للدهون حوالين الوسط وإصلاح جدار البطان والعضلات ووجود فتاقات.
إيه هي مدة عملية شد وشفط البطن؟
في المعتاد، من ساعتين لـ3 ساعات مع إقامة نص يوم في المستشفى.
هل فيه وسائل لتجنب الألم بعد العملية؟
بالإضافة للمسكنات المعتادة بعد العمليات فيه مجموعة من الوسائل الحديثة إللي بتساعد على تقليل الألم جدًا ومنها:
- -بنج الإبيديورال: وهو نوع من أنواع التخدير النصفي.
- -تخدير الأعصاب الموضعية حول منطقة البطن باستخدام أجهزة السونار.
- -جهاز PCA وهو عبارة عن مضخة صغيرة بتتثبت في إيد المريضة بكانيولا وبتضح مسكنات قوية لمدة 3-5 أيام بعد العملية والمريضة ممكن تخرج بيها من المستشفى.
- -لاصقة الفينتانيل وهي لازقة بتتلزق على جلد المريض وبتخرّج مادة مسكنة.
إيه إللي أتوقعه بعد عملية شد وشفط االبطن؟
في أول يوم بعد العملية:
في أول يوم غالبا مش هتحسي بوجع بسبب تأثير البنج والمسكنات القوية إللي هتتحقني بيها في الكانيولا.. هتحتاجي مساعدة علشان تقومي من السرير وتدخلي الحمام.. لازم تقومي تتمشي كل ما تعرفي وتحركي جسمك ورجلك تجنبًا لأي جلطات لاقدر الله وتحاولي تاكلي وتشربي وتدخلي الحمام.. ودي النصايح بعد أي عملية جراحية. هيكون فيه درنقه في بطنك ودي مفيدة جدًا علشان تساعد جسمك يتخلص من كل الدم والسوايل الفاسدة.
في أول أسبوع بعد العملية:
هيكون فيه إحساس بالألم وده هتتغلبي عليه بالمسكنات ووسائل تسكين الألم الحديثة والراحة.. هتحتاجي مساعدة علشان تقومي من السرير أول يومين تلاتة بس على آخر الأسبوع هتعرفي تقومي لوحدك وغالبا مش هتعرفي تنامي غير على ظهرك بس أول اسبوع.. في الوقت ده الدكتور هيشوفك ويتطمن عليكي وهتشيلي الدرنقة وتغيري عالجرح وهيكون فيه ورم خفيف حوالين بطنك خصوصا لوعملتي شفط لدهون الخصر.
بعد أول شهر:
المفروض يكون جرحك بيتحسن والغرز ابتدت تدوب خلاص لوحدها.. بتعرفي تقومي وتنامي كويس وهتعرفي تشتغلي عادي زي الأول لو شغلك مكتبي، وممكن الدكتور يبدأ يكتب لك كريمات ولاصقات تجميلية.
بعد شهر ونصف:
بعد شهر ونص هيكون الجرح عبارة عن خط أحمر. هتفضلي تدهني الكريمات وممنوع شيل أو زق أي حاجة تقيلة في الوقت ده. ممكن تبدأي تلعبي رياضة خفيفة بأوزان خفيفة وممكن تمارسي العلاقة الحميمة مع جوزك والورم تقريبا خلاص راح وفش تماما.
بعد 3 شهور:
الجرح بتاعك بيتحسن أكتر ولونه بيفتح وبيقلب للوردي وبتبدأي تتمرني في الجيم بأوزان متوسطة ومواظبة على الكريمات.
بعد ست شهور:
كل حاجة تماما والجرح لونه بيفتح أكتر وبيبقى وردي فاتح وبرضه هتكملي في الكريمات وتقدري تتمرني عادي زي الأول بالظبط.
بعد سنة:
دلوقتي نقدر نقول إنك تعافيتي تماما الحمد لله.. جسمك منحوت وبطنك شكلها طبيعي والجرح لونه بقى اقرب ما يكون للشكل النهائي.. دلوقتي ممكن الدكتور يقولك لو محتاجة تعملي ليزر لو فيه أي حاجة في شكل الجرح مش عاجباكي.
إيه الأدوية إللي هاخدها بعد عملية شد وشفط البطن؟
الأدوية إللي هتاخديها هي مسكنات ومضادات للتورم والالتهاب ومضادات حيوية وفيتامينات متعددة ومضاد للجلطات وبعد شهر هتبدأي تحطي كريمات تجميلية من السيلكون لتحسين شكل الجرح.
هل لازم البس كورسيه بعد عملية شد وشد البطن؟
أيوة لازم تلبسيب كورسيه طبي الطبيب هيديهولك أو هيقولك على ماركة معينة وده مهم جدًا علشان بيمنع التورم إللي ممكن يحصل في الجسم ويأثر على نتيجة العملية. عايزة أقولك إنه لبس الكورسيه يعتبر مهم بأهمية العملية نفسها.
إيه هو أفضل نوع مشد للبطن يعد عملية شد وشفط البطن؟
الطبيب إللي هيعمل العملية هيقولك على النوع والمقاس المناسب ليكي وممكن كمان يوفرهولك.. الكورسيه دي بيكون كورسيه طبي عاملاه شركات طبية مش كورسيه تجميلي.
إمتى بتظهر نتائج عملية شد وشفط البطن؟
هتشوفي نتايج من أول يوم ولحد سنة كاملة هتفضلي تشوفي نتايج.. من أول لما تخرجي من العملية هتلاحظي إنه جلدك مشدود وبطنك أصغر.. لكن الضمادات مش هتخليكي تشوفي كويس.. والورم البسيط مش هيخليكي تحكمي على النتيجة.. لكن بعد شهر بيكون الورم فش خالص وهتبدأي تشوفي بطنك مشدودة.. بالنسبة للجرح بيفضل يتحسن بالتدريج شهر ورا شهر وبعد شهور من العناية والاهتمام هتشوفي خط رفيه مكان العملية على شكل حرف C لونه مش بعيد قوي عن لون الجلد.
إيه هي مخاطر عملية شد وشفط البطن؟
مخاطر عملية شد وشفط البطن هي المخاطر الموجودة في أي عملية جراحية.. لكن بيزيد عليها إنه الجرح بيحتاج عناية خاصى جدًا علشان ما يحصلش فيه تلوث ويبقى شكله كمان مقبول وده هيعتمد على طبيعة جسمك ومدى اهتماماك بالجرح وسماعك لنصايح طبيبك.
هل فيه حاجة اسمها عملية شد البطن بالليزر؟
فيه حاجة اسمها شفط الدهون بالليزر لكن مفيش حاجة اسمها شد الجلد بالليزر دي جملة تجارية بتتقال علشان توحي للناس إنه مفيش جراحة.. لكن شد البطن عملية جراحية في المقام الأول.
هل ممكن إجراء عملية شد البطن مع القيصرية؟
أيوة ممكن إجراء عملية شد البطن البطن مع الولادة القيصرية لكن النتيجة هتكون 60 أو 70 في المية أقل من لو عملتيها بعد الولادة بست شهور بسبب إنه الرحم بيكون كبير والبطن أضخم من العادي والوزن أزيد من العادي .. لو عندك أصلا جلد مترهل كتير من قبل الحمل هتحسي بفرق لو شلتيه مع الولادة وده هيوفر عليكي طبعًأ إنك تعملي عملية من أول وجديد بتخدير جديد ومصاريف جديدة وكدة كدة هتكوني متخيطة وهترتاحي أسبوعين.
إيه أنسب وقت لإجراء عملية شد البطن بعد الولادة؟
أنسب وقت هو بعد ست شهور من الولادة علشان يكون الرحم رجع لحجمه الطبيعي وخسرتي وزن الحمل الزائد.
إيه هي أهم النصائح بعد عملية شد البطن؟
- -اسمعي نصائح طبيبك المعالج.
- -ما تقلعيش الكورسيه.. ما تقلعيش الكورسيه.. غير لما الدكتور يقول لك.
- -امتنعي عن التدخين تماما قبل العملية وطوال فترة النقاهة.
- -خدي كل الأدوية والفيتامينات إللي يوصفها لك الدكتور.
- -اهتمي بالجرح جدًا ولو لاحظتي أي حاجة غريبة لازم تكلمي دكتورك.
- -حاوليش تحافظي على وزنك كويس واتمشي كتير ومارسي الرياضة حسب نصائح الطبيب.
- -ما تقارنيش نفسك بحد وخلّي توقعاتك منطقية.
التعليق باستخدام حساب فيس بوك