خلينا نعترف يا جماعة إننا كلنا بنحلم بشعر أسطوري، حتى لو الجينات مش مساعدات، بس احنا عايزينه وخلاص. بنصرف كميات فلوس على كميات منتجات ويمكن الفعال منها قليل.
علشان كده، رفعنا شعار كفاية صرف فلوس مش عارفة أكمل الشهر، وندخل ندور في المطبخ لعل وعسى نلاقي حاجة. وقد كان وحصل ولاقيته فعلًا: كيس رز لطيف كيوت محطوط قدامي بيقول لي الحل كله فيا. حقيقي أنا كنت سمعت عن موضوع مياه الرز، كلنا بنتفرج على فيديوهات منتجات شرق آسيا المبهرة في الفيديو اللي لما تيجي مصر بتكون رديئة أصلًا وشعر الستات هناك وكل قناعتنا اللي بنهون بيها على نفسنا إن ربنا خالقهم كده. بس الحقيقة، هم أساسي في حياتهم مياه الرز لشعرهم. عملت سيرشاتي وقررت أجرب وأرجع أقول لكم النتيجة. والحقيقة اللي حصل كان أعلى من توقعاتي. بس قبل ما أقول لك اللي حصل معايا، شوفي المقال ده 5 وصفات للرز غريبة وشهية علشان مش نهتم بشعرنا يا جماعة وننسى نعمل الغدا، ما يصحش كده.
بس أنا شعري عادي!
أولًا أنا من النوع اللي شعري عادي، وبيعاني من فترات جفاف وتقصيف وخصوصًا كل ما نكبر، حقيقي التغيرات في جسمنا بتبان. وبيكون الحصول على شعر مظهره صحي ولامع وتحسي إن كل شعراية في راسك مرتاحة، مش متشبكة في اللي جنبها كإننا نازلين نصطاد بشعرنا، وحاجة آخر إحراج يعني مع شوية هيشان لزوم استكمال الصورة. بس اللي حصل مع مياه الرز كان رائع. استخدمته مرتين في الأسبوع اللي هو معدل غسيل شعر عادي في فترة الشتاء، بس في المرتين إحساسي بشعري كان مختلف، شكله صحي أكتر، لامع أكتر، ومموج بشكل ألطف، الحلو في الوصفة دي إنها سهلة جدًا وعبارة عن:
- نص كوباية رز
- كوباية ونص مياه
بس كده! هتغسلي الرز كويس علشان لو فيه أي شوائب وتنقعيه في المياه من ساعتين لـ24 ساعة، عن نفسي حطيته في برطمان وغطيته وحطيته في التلاجة. بعد كده، صفيته وحطيت المياه دي في بخاخ مياه نضيف.
الفكرة إنك علشان تستفيدي منه، لازم ترشيه على الشعر كله، ولما حاولت أول مرة إني أحطه مباشرة من البرطمان، توزيعه على الشعر ما كانش كافي. فجات في دماغي فكرة بخاخ المياه. كل اللي بتعمليه إنك تغسلي شعرك بشكل اعتيادي، وبعد ما تشطفي شعرك من حمام الكريم، رُشي على شعرك مياه الرز دي وسيبيها لمدة 20 دقيقة، وبعد كده، اشطفيه.
هتلاحظي لما شعرك ينشف إن شكله فارق ومظهره أفضل بكتير,، ومع المداومة بيقولوا إنه بيطول الشعر جدًا. وبصراحة أنا على المستوى الشخصي، باستخدم زيت السمسم العضوي على شعري بعد كده، واللي بيديه رطوبة ولمعان رائعة.
جربي مياه الرز من أول مرة، هتحسي بمظهر مختلف هتحبيه جدًا. ما تنسيش تاخديه معاكي في الحمام قبل غسيل شعرك لإننا لما بننسى ناخده، بنكسل نستخدمه. ولو ليكي تجربة معاه، اكتبيها لنا في الكومنتات وشاركينا تجربتك.
ولو عايزة تعرفي معلومات أكتر عن العناية بالشعر ووصفات طبيعية، ادخلي هنا.
المصادر
التعليق باستخدام حساب فيس بوك