محتويات المقال
كل أم وهي بتتسوق للبيبي الجديد، بتكون عاوزه تجيب السوق كله، وكل المنتجات والاختراعات والكماليات قبل الأساسيات، بس اللي بيحصل إن بعد ما تشتري ده كله، اكتر من نص الحاجات مش بيستخدم، أو مش بيطلع عملي، فالنهارده أمهات راحة بالي هيقولوا لك: أهم 10 منتجات للبيبي في أول سنة، جربوها وكانت مفيدة وعملية:
-
أسماء درويش قالت: كرسي استحمام للبيبي
كرسي استحمام للبيبي
وميزته إن الأم في الأول، بتكون خايفة جدًا على البيبي أثناء الاستحمام، وخايفة يتخبط في الحوض أو في البانيو، ولو مفيش حد بيساعدها، بتكون ماسكاه بإيد واحدة وبتحميه بالإيد التانية، علشان كده الكرسي ده مفيد جدًا، لإنه مثبت راس البيبي وحاميها من أي خبطات، وفي نفس الوقت بتحميه براحتك لإن كرسي الاستحمام فيه فتحات بتنزل منه المياه، ونعيمًا يا بيبي.
وتقدري تشوفي بالفيديو : استحمام الطفل حديث الولادة
-
وأنا منار بقول: التتينة (اللهاية)
التتينة للبيبي
لو بإيدي أدّي حد براءة اختراع أو جايزة، هديها للي اخترع التتينة، مع إن في أمهات بتحب تكون مثالية، وتقول مش هديها لطفلي من أول يوم، ومش هعوده عليها، علشان أضرارها، وعشان تعب الفطام منها، لكن أنا شخصيًا حسيت إنها نعمة من ربنا، وبتساعد في إن الأم تفصل شوية، وده بيساعدها على الهدوء وأكيد ده بينعكس على البيبي، وعن تجربتي إديتها لبنتي من أول يوم.
-
يمنى مهنى قالت: مخدة الارتجاع للرضع
مخدة الارتجاع للرضع
ودي الأمهات اللي أطفالهم بيعانوا من مشكلة الارتجاع، شكروا فيها جدًا، بس يستحسن ترجعي لطبيب الأطفال تسأليه إذا مناسبة لطفلك ولا لا.
-
ليلى سامي قالت: Stroller
Stroller للبيبي
في منتجات كده بحسها للأم مش للبيبي، منها الـ Stroller وده مفيد للأم جدًا في الخروج، لإنه بيخليها عارفة تخرج وتستمتع براحتها، وفي نفس الوقت البيبي مش منزعج، ومتعود على مكانه، ولو عاوز ينام هينام، ولو الجو مشمس، فهو في الأمان، وبكده الأم مش محتاجة تاخد الكارسيت معاها في أي مكان هتقعد فيه.
-
سلوى محمد قالت: معقم الببرونات
معقم الببرونات
والمنتج ده مفيد جدًا، للأطفال اللي معتمدين على الرضاعة الصناعية، لإن لازم الببرونات تكون نضيفة ومتعقمة طول الوقت، وخصوصًا في وقت النوم، علشان الأم تعمل له الرضعة ويكمل نومه وينتظم فيه، وهو طبعًا فعّال أكتر من الطرق التقليدية زي غليّ الببرونات على البوتاجاز.
-
رشا مصطفى قالت: باونسر
باونسر
الباونسر مفيد عن تجربة، لإن البيبي في سن اللي قبل الزحف والحركة، بيجي له وقت ويزهق جدًا، وخصوصًا لو قاعد مع مامته لوحدهم في البيت وقت طويل، وهو مش عارف يتحرك ولا يتكلم ولا يعمل أي أنشطة تسليه في الوقت الطويل ده، فالباونسر لطيف جدًا، بيتحرك وفيه ألعاب تشغل، وبيعمل موسيقى، وبيفرق فعلا مع الطفل.
-
منة رأفت قالت: طقم العناية الشخصية
طقم العناية الشخصية بالبيبي
وده مش رفاهية، لازم البيبي يكون له أدواته الخاصة، زي القصافة والفرشاة الناعمة والترمومتر، وتقدري تجيبي الحاجات دي طقم، أو تجيبيها أدوات متفرقة، وما تنسيش تنضفيها وتعقميها بعد الاستخدام.
-
سمر سعيد قالت: كولونيا الأطفال
كولونيا للأطفال
مع إنه يبان إنه منتج للرفاهية، والبيبهات أصلًا ريحتهم حلوة، بس هو مفيد في حالات كتير، زي إن الطفل يقشط مثلا على هدومه وإنتي برا البيت ومش عارفة تغيري له، فتقدري تمسحي مكان القشط كويس بوايبس، وبعدين تحطي كولونيا علشان تغير ريحة الهدوم، كمان مفيدة لو الطفل زهقان أو حران وانتي مش متاح ليكي تحميه، فتمسحي وشه وورا ودانه ورقبته بالمياه، وتلبسيه لبس نضيف وتحطي له كولونيا، هيحس بالانتعاش وهيفوق.
-
نهى حامد قالت: سدادت الكهرباء
سدادت فيشة الكهرباء
ودي مهمة جدًا جدًا، في الفترة اللي طفل بيبدأ يزحف فيها ويمشي، لإنه بيكون عنده طاقة اكتشاف مش طبيعية، بعد قعده في مكانه لشهور، بيقوم يشوف بقى بنفسه وبكل حواسه البيت اللي كان بيتفرج عليه ده، فطبعًا أول حاجة في مستوى طوله هي فيش الكهرباء، فممكن يحط إيده وهي مبلولة من بقه، أو يجرب يحط أي حاجة في الفيشة، فعلشان تكون مطمنة لازم تحطي سدادت لفيش الكهرباء، واتأكدي إنها محكمة وإن طفلك مش هيعرف يشيلها من مكانها.
-
رنا فتحي قالت: مشمع تغيير الحفاضات
مشمع تغيير الحفاضات
مفيش أم ماحصلش فيها المقلب بتاع إن البيبي يعمل تاني والأم بتغير له الحفاض، بصرف النظر بقى هو على سرير ولا على كنبة ولا في العربية، فعشان تتجنبي الموقف الفظيع ده، خلي معاكي دايمًا مشمع لتغيير الحفاض، علشان مهما حصل تكوني في الأمان يا ست الكل.
ودلوقتي قولي لنا تجربتك، إيه أكتر منتج كان مفيد بالنسبة لك وطفلك من عمر 0 لسنة؟
وتقدري تشوفي هنا تطور الطفل في العام الأول شهر بشهر
التعليق باستخدام حساب فيس بوك