تجربتي: نصائح مُدرسة في زمن الأون لاين

مع موجة الكورونا التانية فيه أطفال كتير جدًا رجعوا للتعليم الأونلاين، وعلشان أنا مدرسة وبدرّس أون لاين للأطفال، فدي شوية نصائح للأمهات عشان يديروا العملية بشكل أكثر سلاسة وكفاءة كمان.

• افتحي الكاميرا:

بالنسبة للأطفال اللي تحت 10 سنين على الأقل درس من غير كاميرا ده مش درس، ده حد قاعد جنبنا بنسمعه إلا لو في حاجة بتتشارك على الشاشة وساعتها هنكون برضه عايزين الكاميرا تفضل مفتوحة لكن بدرجة أخف.

• خلي المُدرسة تفتح الكاميرا:

لو المدرسة ما عندهاش مانع صحي أو تقني، التواصل البصري هو اللي بيخفف من درجة البعد المكاني اللي حاصلة.. بيبقى فيه اتنين بيبصوا لبعض ويتكلموا ويشوفوا تأثير الكلام والمعلومات الجديدة.

• خليكي موجودة ومش موجودة:

أطفال كتير جدًا ما عندهمش درجة التفاني لأجل العلم اللي تخليهم يقعدوا يتعلموا وأهلهم مش موجودين، أغلب الأطفال والله بتبقى لحظة المرح غالبة وأحيانا النوم.
وأطفال تانيين لو ماما موجودة بيبقى يختيييييي عالدلع عليا وعلى ماما وعلى الكوكب بأكمله.
خلي الدرس في مكان مفتوح تقدري تشوفيه فيه وتتابعيه بس مش قاعده جنبه مهم انه يكون عارف إنك متابعه الموقف.

• سجلي الدرس لو المُدرسة ما عندهاش مانع:

تسجيل الدروس حاجة مفيدة جدًا أنا جربتها في الفترة الأخيرة وبتنفع لو الطالب بينسى بسرعة أو مش بيركز أو بس عايز يستعيد الدروس، ودي حاجة الأونلاين بيتفوق فيها على الدرس العادي.

• لازم يبقى في حاجة ملموسة مستخدمة في الدرس:

الإنسان بيتعلم بحواسه والدرس لازم يكون فيه كتابة حقيقية من الطالب أو رسم أو قراءة من حاجة شايلها بين إيديه، الوايت بورد وحدها لا تكفي.

5 قنوات يوتيوب تعليمية هتساعدك تأسسي ولادك في البيت

نصائح عامة:

• تاني، افتحي الكاميرا، بس اتأكدي إن التابلت أو اللابتوب أو الجهاز المستخدم ما يتحركش من مكانه، ويحضرني في هذا المقام ذكرى مدام فريال وهي أم أمريكية عاملة مطحونة كبقية أمهات العالم، التابلت راح لها وهي في الحمام، وهي بترضع، وهي بتغير لطفلها الصغير، لغاية ما توسلت لبنتها إن أرجوك يا بنتي كفاية لحد كده، أكدي على ابنك أو بنتك إن مهما حصل مش هنحرك الجهاز من مكانه عشان كمان عامل التشتيت.
• الدرس ما يكونش بدري أوي أو متأخر أوي أو في وقت القيلولة لأن في أطفال بتقيل سبحان الله :3 استغلي أوقات تركيزهم ونشاطهم.
• حاولي تضبطي سرعة الانترنت وجودته وتطلبي نفس الحاجة من المدرسة لأن دي حاجة بتفرق جدا في ثبات الدرس وفعاليته .
• احرصي على الاحترام المتبادل، ابنك ما ينفعش لأي سبب يتطاول على المدرسة أو ما ينفذش تعليمات الدرس والمدرسة ما ينفعش تتطاول عليه، الاحترام أولا.

ومعلش والله لأي أم هتقرأ المقال ده، إنتي ست جميلة وجدعة ومعلش، انتي عارفة بقول معلش ليه، قلوب كتير يا جميل.

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.