كل سنة وانتي طيبة، رمضان على الأبواب، وكلنا عارفين فضل العمرة في شهر رمضان. وبعد ما السعودية شالت احترازات كورونا من الحرم والسفر، دلوقتي الباب مفتوح للمصريين يقدموا للعمرة في رمضان الجاي. فلو انتي نويتي العمرة في رمضان 2023، يبقى هتقدمي على الفيزا من دلوقتي، وتبدئي تهيئي نفسك وأسرتك للسفر. وفي المقال ده، هنقول لك على دليل تجهيزات عمرة رمضان لكل ست قبل السفر.
اكتبي قائمة تجهيزات عمرة رمضان
تفاصيل السفر عمومًا كتيرة، فما بالك لما يكون السفر ده عمرة وفي رمضان؟ علشان كده، أهم خطوة تعمليها إنك تكتبي قائمة مهام، علشان تتجنبي أي لخبطة أو نسيان والأمور تمشي تمام كلها وبدون توتر.
رتبي مسؤولياتك
فمثلًا لو هتسيبي أولادك، هتسيبيهم مع مين، وتجهزي لهم حاجات كتير في غيابك علشان تكون فترة سهلة عليهم. لو بتشتغلي، فإنتي محتاجة ترتبي أجازتك من الشغل من بدري، ولو مطلوب منك تسليم حاجات قبل السفر يبقى تنجزيها من بدري.
معجون الأسنان والقيء وغيرهم .. هل من مفسدات الصيام؟
تعلم أحكام العمرة
أحكام العمرة والحج فيها تفاصيل كتير جدًا، مش بنقدر نحفظها في أيامنا العادية كده، فأفضل وقت لها هي معرفتها عملي. علشان كده، لازم تتعلمي عن الأحكام دي واحدة واحدة من دلوقتي. ولو عندك سؤال أو مش فاهمة حاجة معينة، ارجعي لدار الإفتاء، وبرضه خلّي معاكي كتيب صغير عن الأحكام دي. علشان لما تروحي على أرض الواقع هتحتاجي تفتكري وتطبقي.
دواء لتأخير الدورة الشهرية قبل العمرة
لو موعد دورتك الشهرية هييجي وانتي في العمرة، فاسألي طبيب النساء عن دواء لتأخير الدورة الشهرية، وما تقلقيش بيكون آمن وبتستعمليه فترة صغيرة، علشان فيه مناسك في العمرة مش مباح للحائض تعملها، فالأفضل إنها تتأخر علشان تستمتعي بعمرتك.
تجهيز ملابس العمرة
كلمة السر الملابس المريحة، دي هتفرق معاكي فرق انتي مش متخيلاه، لإن مع المجهود والسعي وتعب العمرة، مفيش أي مجال لملابس مش مريحة، أو أحذية متعبة. وده في كل تفاصيل الملابس يعني الداخلية ولبس الخروج، ولبس البيت والأحذية والحجاب، وما تنسيش إن السعودية في الوقت ده بتكون حر، وعمرة رمضان بتكون زحمة جدًا.
ولو جوزك مسافر معاكي، يبقى لازم تجهزي له لبس الإحرام الخاص بيه.
مراهم ومسكنات أثناء العمرة
العمرة أكيد مجهود كبير، وفيه متاعب بتحصل بسبب المجهود ده. فالأفضل إن يكون معاكي مراهم للتسلخات والالتهابات، ومسكنات للصداع والألم. طبعا الأدوية كلها موجودة في السعودية، لكن خليهم جاهزين معاكي علشان لو حبيتي تستخدميهم في أسرع وقت.
لمدمني القهوة .. 7 نصائح لتجنب الصداع في رمضان
النية والدعاء
عمرة رمضان مش عادة اجتماعية، ولا رحلة عادية بتتفسحي فيها، دي أجر كبير ونقطة تحول في الحياة. فمن أول ما تقرري تقدمي على العمرة، إنوي إنك متوجهة لربنا وإن نيتك إن ترجعي من العمرة بحياة جديدة أقرب لربنا وللدين. وجهزي كل الأدعية اللي نفسك فيها، واقرأي عن اليقين في الدعاء، وأي مشكلة في حياتك أو عقبة أو حلم، ابتهلي لربنا في العمرة بيه، وحاولي تركزي جدًا في العبادة هناك، وابعدي عن السوشال ميديا والتصوير، علشان ما تضيعيش وقتك في حاجات مش مهمة.
مع تمنياتنا ليكي بعمرة مقبولة وسفر ميسر.
التعليق باستخدام حساب فيس بوك