محتويات المقال
خطوة الطلاق مش خطوة سهلة لا نفسيًا ولا في الإجراءات، بس بتكون خطوة مهمة في كتير من الزيجات الفاشلة أو العلاقات المسيئة. اتكلمنا قبل كده عن خطوات التعافي بعد الطلاق، والنهارده، محتاجين نتكلم عن خطوات لازم تاخديها ومعلومات لازم تكوني عارفاها قبل الطلاق.
الحضانة
لازم تكوني مذاكرة قانون الأحوال الشخصية عمومًا وبالأخص جزئية الحضانة، اللي حاليًا بتنص على إنك تعتبري حاضنة في حال إن ولادك أصغر من 16 سنة وإن كونك حاضنة بيخلي ليكي الحق في المعيشة في بيت الزوجية طالما ما اتجوزتيش تاني. لو قررتي لأي سبب إن الحضانة تكون مع جوزك، لازم تتفقي معاه على أيام الرؤية (الأيام اللي هتشوفي فيها الولاد).
ولازم تاخدي بالك من حاجة مهمة جدًا: الراجل ده ما بقاش جوزك، فحتى لو الطلاق حصل بشكل ودي، لازم توثقي كل اتفاقاتك معاه بورق عند محامي. فسواءً اتفقتوا على إنك تكوني الحاضنة واتفقتوا أيام الرؤية له إيه أو العكس، لازم تكتبوا وثيقة بالكلام ده عند محامي وتمضوا عليها عشان لو حصل أي تلاعب منه بعد كده، تقدري تروحي المحكمة بورقة تثبت كلامك.
الورق
اعملي نسخة من كل الورق المهم اللي عندك واحتفظي بيها بره بيت الزوجية. ده معناه: بطاقتك، باسبورك، عقد الجواز، عقد الشقة، القايمة. الحاجات دي لازم يكون معاكي منها نسخة محمية بعيد عن يد الطرف التاني.
قايمتك
لو مفيش أولاد، أو الأولاد كبار، حقك تاخدي مع مؤخر الصداق قيمة القايمة.
التروي
مش في الخطوة بس، فكري مرتين في كل حاجة: الشغل، الدخل، مصاريف المدارس، مكان الإقامة، إلخ. وحاجة مهمة جدًا لازم تفكري فيها هي إيه اللي انتي على استعداد للتنازل عنه. معظم الوقت، حتى في حالات الطلاق الودي، بتكوني مضطرة للتفاوض على حاجة، وهنا لازم تكوني انتي مفكرة من قبلها انتي عندك استعداد تضحي بإيه في مقابل إيه.
الولاد
سواء هيفضلوا معاه أو معاكي، ولادك مش هم اللي بيطلقوا، انتي وأبوهم اللي بتتطلقوا. وعشان كده، ما ينفعش يبقوا موضع مساومة ولا طريقة توصيل رسايل، ولا كارت بتلعبوا به. ولادك ده أبوهم وهم ما اختاروش ده، فما ينفعش تعاقبيه من خلالهم، وما ينفعش يحسوا إنهم السبب في الطلاق، حتى لو ده حقيقي، لإنهم بالطريقة دي هيعيشوا بعقدة ذنب.
ما تسمعيش تجارب
ما تسمعيش تجارب ستات تانية مروا بنفس التجربة عشان مهما كانت التشابهات، هيفضل فيه اختلاف بين تجربة كل واحدة فيهم وتجربتك. عشان كده، ما تسمعيش قوي كلام عن تجربة عشان ممكن تحبطك من كتر قسوتها أو بالعكس ممكن تحسسك إنها هينة قوي، وتفاجئي إنها مش كده.
كلمي محامي
حتى لو مش هترفعي قضية طلاق أو خلع، لازم تشوفي محامي وتتكلمي معاه في كل الاحتمالات وأسوأ الظروف عشان تضمني كل حقوقك وانتي مقدمة على خطوة الطلاق.
صفحات تتابعيها
مصادر ساعدتنا في كتابة المقال
بوابة الحكومة المصرية
Divorce Net
التعليق باستخدام حساب فيس بوك