لستة تحضير شنطة الولادة في فصل الشتاء

فرحة كبيرة ورهبة على شوية لخبطة هي مشاعر كل أم قبل لقاء مولودها الجديد. التجهيزات للولادة بتبقى كلها سعادة بس في نفس الوقت ممكن تتوتري وتنسي حاجات مهمة أثناء تحضير شنطة الولادة للمستشفى، عشان كده هنساعدك بقايمة محتويات شنطة الولادة في الشتاء .. ما تنسيش تخلي المقال ده قدامك وانتي بتحضري شنطة المستشفى لو هتولدي في شتاء 2021.

أساسيات شنطة البيبي في المستشفى في الشتاء

فصل الشتاء من الشهور اللي بيكون فيها الجو شديد التقلب وممكن تحصل عواصف برياح شديدة أو أمطار، لازم تعملي حساب النقطة دي وتخلي بالك من لبس المولود وتراعي إنه يكون من قماش تقيل ناعم على بشرة الطفل، ودي أهم الحاجات اللي تقدري تاخديها معاكي لشنطة البيبي في الشتاء:

1. شايات (فانلات داخلية).
2. فانلات داخلية بكم.
3. بامبرز حديثي الولادة.
4. عدد 3 سالوبت بكم ورجلين خامة شتوية تقيلة
5. عدد 2 جاكت.
6. كوفرتة قطن.
7. 2 بطانية شتوي تقيلة.
8. فوط ناعمة للبيبي.
9. جوانتي وطاقية قطنية للبيبي.
10. شرابات.
11. شامبو للبيبي.
12. كريم حفاض للبيبي.
13. فوطة قطن للقشط.
14. وايبس مناسب للرضع.
15. القماط أو Swaddle صيفي لو حابة تستخدميه مع مولودك.
16. ببرونة.
17. حلق طبي لو بنت.

تفتكري إيه هي الساعة الذهبية للولادة؟ اضغطي على اللينك عشان تعرفي

أساسيات تحضير شنطة الولادة للأم في الشتاء

1. عدد 2 بيجاما أو قميص نوم شتوي مناسب للرضاعة.
2. جاكت أو روب تقيل.
3. عدد 3 شراب.
4. ملابس داخلية قطنية مريحة.
5. حمالات صدر مناسبة للرضاعة.
6. ملابس للخروج.
7. طرحة أو إسدال للمحجبات.
8. سليبر.
9. فوطة وجه وبشكير خاص بيكي.
10. غطاء cover للرضاعة.
11. فرشاة للشعر وتوك.
12. فوط النفاس.
13. فرشة ومعجون أسنان.
14. مكياج.
15. مزيل عرق.
16. شامبو وشاور جيل.
17. شاحن موبايل.
18. كاميرا.
19. كحول.
20. كمامات.

هنا ممكن تشوفي 5 أدعية لتسهيل الولادة

مستلزمات أخرى غير شنطة الولادة للمستشفى

• بورت شتوي تقيل عشان تحطي بنتك/ ابنك فيه عشان تحميه من البرد الشديد.
• كارسيت مناسب للمواليد من عمر يوم عشان تقدري تحطي البيبي فيه في العربية.
• كاريكوت عشان تقدري تشيلي البيبي فيه، وهو بيبقى زي سرير صغير وليه ايدين تقدري تشيليه منها وكمان بيبقى ليه غطا للحماية من الرياح أو العواصف.

مهم جداً بالنسبة لك تعرفي طرق لتسهيل الولادة الطبيعية

بنفكرك تحضري الشنطة قبل الولادة بمدة كافية وبنتمنى ليكي ولادة سهلة ودوام الصحة والسلامة 🙂