الثوم وصراع تخزين الثوم، ده تقريبا نوع من أنواع الصراعات اللي بتتوارثها الأجيال، بس كل واحد له إستايل صراع الثوم الخاص بيه. سواء تخزين الثوم المفروم أو تفريز الثوم المقشر فصوص أو تخزينه لمدة سنة كاملة. يعني مثلا الصراع اللي كان بين مامتك وجدتك، إن جدتك بتحب الثوم البلدي أبو فصوص رفيعة صغيرة وطعم قوي جدا، وإنه بيتخزن متعلق في البلكونة، وإن مامتك عايزة توم بلدي برضه بس أبو فصوص كبيرة علشان العمر أقصر والحياة أسرع من تقشير فصوص الثوم الصغيرة دي.
حاليا الصراع بينك وبين مامتك إنك عايزة ثوم مقشر، ولو مش الثوم مقشر يا ريت يكون ثوم صيني اللي هو لما تخضيه يقوم متقشر لوحده ده، بجد بقولك صراع أجيال مرير. ودايما موسم تخزين الثوم بيتعرف لوحده، يعني مش محتاجة تستنيه، اللي بيحصل إن كل حاجة في الشوارع ريحتها ثوم، المترو والمواصلات والأسانسير في كل عمارة ريحتها ثوم.
هو صحيح ريحته وهو طازة جميل، بس شعور إن البلد ريحتها مسقعة كدة بيكون أوقات أليم، إنتي أوقات بتحسي إن ريحتك إنتي شخصيا ثوم. مش محتاجة أقولك قد إيه الثوم مفيد على المستوى الصحي جدا، وإن إضافته في الأكل شيء بيعتبر لمسة سحرية، تقدري تنكري جمال طشة الملوخية أو الفتة؟ مستحيل طبعا، دي مسلمات بجانب إنها بتكون أحلى من أي برفان من جيفينشي. عموما تعالي نتكلم في تخزين الثوم بالشكل الصحيح.
شوفي هنا أكلات جاهزة على التسخين تتخزن في الفريزر هتوفر وقتك
تخزين الثوم بالشكل الصحيح
تخزين الثوم بيتم في كذا صورة:
- تخزين ربطة الثوم صحيحة لمدة سنة مثلاً.
- تفريز الثوم فصوص متقشرة.
- حفظ الثوم المفروم في الثلاجة.
- تفريز الثوم مجفف.
كل واحدة من دول ليها طريقتها الخاصة.
تخزين الثوم ربطة صحيحة لمدة سنة
تخزين الثوم ربطة صحيحة لمدة سنة
الطريقة دي بتتم لما تشتري توم طازة بعروشه من الأسواق، أحسن طريقة إنك تحاولي تعملي العروش دي على شكل ضفيرة، وتحطيه في مكان جيد التهوية و الإضاءة، زي البلكونة مثلا أو جنب شباك المطبخ، طريقة تخزين الثوم ربطة صحيحة ممكن تقعد لمدة سنة بتخلي كمية التوم كافية لحد الموسم اللي بعده، هتلاحظي إن وزنه بيقل وده بسبب إنه بيجف، وبتتكون له قشرة منفصلة تغطي الفصوص بتحافظ عليها طازة دايما.
تفريز الثوم فصوص مقشر في الثلاجة
تفريز الثوم فصوص مقشر في الثلاجة
وجهة نظري الشخصية في الطريقة دي إنها تخزين لمدى قصير، التوم لو إتخزن في الفريزر على شكل فصوص هيفقد مع الوقت طعمه خصوصا لو هتستنيه يفط علشان تعرفي تفروميه.
علشان كدة الطريقة دي زي ما قولت لك هي للتخزين قصير المدى، يعني تقشري كام راس توم وتحطيهم في علبة محكمة الإغلاق في التلاجة وتسحبي منه طول الشهر، حاجة للإختصار اليومي مش أكتر.
حفظ الثوم المفروم في الثلاجة
فيه حالتين لتخزين الثوم المفروم ، يا إما هو أتفرم وهو طازة جدا وده معناه إنه إتفرم بقشره وعروشه الخضراء كلها مع بعض، علشان على فكرة والثوم طازة بيكون مالوش قشر ناشف، كل حاجة فيها طازة وطرية يعني كلها صالحة للفرم، وهنا الناس بتحب تضيف ملح وزيت على الثوم وهو بيتفرم كمادة حافظة ليه وكمان علشان الزيت مش هيخلي التوم بتجمد تماما وبالتالي سهل الإستخدام.
أو بتفرم برضه بس بدل ما يتحفظ في برطمان زجاجي، بيتم حفظ الثوم المفروم في أكياس تلاجة محكمة الإغلاق في الفريزر وبيكون مفرود علشان يكون كمان سهل الإستخدام.
تفريز الثوم مجفف في الثلاجة
تفريز الثوم مجفف في الثلاجة
الحصول على توم مجفف أو حتى تخزينه مجفف له طريقتين، واحدة سهلة ، وواحدة صعبة، السهلة إن بكل بساطة قشر التوم الأخضر الطازة بيتاخد وبيتم تجفيفه في الفرن على نار هادية ، وتفضلي تقلبي لحد ما يكون جاف تماما وبعد كدة تطحنيه في الكبة، أو تسبيه يجف في الشمس وبرضه تطحنيه في الكبة وهتلاقي عندك أكتر توم مجفف طازة ورائع وأحلى من اللي بيتجاب من أي عطار، بس ده لازم يتحفظ في الفريزر، لأنه زي بودرة البصل بيمتصوا الرطوبة بسرعة وبيحجروا في البرطمان، لكن لو إتحطوا في الفريزر هيفضلوا طاوة لحد أخر شوية.
الطريقة الصعبة في حفظ الثوم مجفف هو إنه يتقطع شاريح ويتجفف في الفرن، ويتحفظ على شكل شرائح أو ممكن بودرة لو تحبي.
حد من بعيد يجي يسألني طيب إنتي بتحفظي الثوم إزاي، هقول بصراحة أنا ربطة الثوم الصيني مقصرتش معايا في حاجة.
التعليق باستخدام حساب فيس بوك