أعز الولد ولد الولد، من كتر ما أهالينا بيحبوا ولادنا وعارفين إن تأثيرهم كبير في حياتهم وحياتنا، فأوقات بيكون في تدخل الأهل في تربية الأطفال وطبعًا التدخل ده أوقات بيكون له مردود إيجابي، وأوقات تانية بيكون بالسلب للأسف. من دلع بقى للعيال أو كسر القواعد اللي احنا متفقين عليها معاهم أو دفاع عنهم أوقات في الغلط من باب إنهم مش مستحملين يشوفوهم زعلانين.
جدة أولادي بتتدخل في تربيتهم وبتفرض طريقتها!
تدخل الأهل في تربية الأطفال
فيه تدخل بقى من نوع آخر وهو التدخل في قراراتنا المهمة في تربية ولادنا من أول دخلناهم مدرسة عاملة ازاي، لحد بننيمهم الساعة كام، وده طبعًا لما بيحصل، بيوتر جدًا الأب والأم اللي بيربوا وبيبقوا مش عارفين يرضوا أهاليهم ولّا يعترضوا على كلامهم ويحتفظوا بحقهم في تربية ولادهم بطريقتهم، ويمكن وقتها أهلهم يزعلوا منهم!
والحقيقة ما أضحكش عليكم، الموضوع مش سهل، وفي نفس الوقت، الزمن اتغير والطريقة اللي اتربينا بيها مختلفة شويتين عن الطريقة اللي بنفكر نربي ولادنا بيها وصعب إننا نرضي جميع الأطراف. عشان كده، محتاجين نبقى أذكيا في النقطة دي ونتصرف باللي فعلًا شايفينه صح لولادنا بس برضه من غير ما نزعّل أهالينا.
نصائح للتعامل مع تدخل الأهل في تربية الأطفال
- نحط قواعد واضحة وصريحة بيننا وبين ولادنا ونتفق دايمًا إيه اللي هيحصل لما القواعد ده تتكسر حتي لو تيتة وجدو هم اللي كسروها، لإن المفتاح هنا في اللي بنوعد ولادنا به هو اللي في إيدينا نتحكم فيه، مش تصرفات غيرنا.
- ما نرجعش في كلامنا قصاد ولادنا لما الجد والجدة يتدخلوا. طبعًا فيه استثناءات في بعض المواقف، بس لازم الطفل يكون شايف إن تيتة وجدو مش بيشكلوا ضغط علينا فيستغل ده بعد كده.
- ارفضي بلطف التدخل من غير ما تدخلي في مناقشات أو تحتدي أو تحاولي تدافعي عن وجهة نظرك.
- اطلبي من مامتك أو باباكي اللي بيتدّخلوا إنهم ما يحرجوكيش قصاد الولاد. ولو حابين يلفتوا نظرك لحاجة، يبقى بينك وبينهم واتكلمي معاهم في التأثير السلبي لاختلاف وجهات النظر في التربية قدام الأطفال.
- والأهم من ده كله: هو إنك تقدّري رغبة الأهل في التدخل وتفكري نفسك في السبب ورا السلوك ده، وإنهم مش بيتدخلوا عشان يضايقوكي أو عشان شايفينك ما تنفعيش تربي مثلًا. لا هم بيتدخلوا من واقع خبرتهم وفكرة إنهم نجحوا مع ولادهم وجربوا وعدوا بكل ده قبل كده، فيقدروا يساعدوا كمان في أحفادهم.
وما تنسيش إننا ما نقدرش نتحكم في أفعال اللي حوالينا على قد ما نقدر نتحكم في ردود أفعالنا احنا وتأثير الأفعال دي علينا.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك