كل ما ولادنا بيكبروا، بيبدؤوا يتأثروا أكتر بالعالم الخارجي حواليهم ويبدؤوا يحاولوا يكتشفوا شخصيتهم ويظهروها. ممكن فجأة نلاحظ إنهم بدؤوا يردوا علينا كلمة بكلمة أو يتكلموا معانا بطريقة مش مقبولة. الحاجات دي كلها سلوك لازم نقف عنده ونعالجه ونركز معاه ونصلّحه عشان الطفل يتعود على الكلام باحترام، مش بس احترامه لنا، الطفل محتاج يعرف إن الاحترام شرط أولي وأساسي للتواصل مع الناس. ومش صح أبدًا إني أتجاهل السلوك ده أو أعمل نفسي مش واخدة بالي على أساس إن الطفل هينسى لوحده.
طيب نعمل إيه عشان نوقف عادة أو سلوك الرد الوقح:
- أول وأهم خطوة من وجهة نظري هي مراقبة نفسنا وطريقة كلامنا مع ولادنا. لو لاحظتي إنك بتقللي منهم أو بتتفهي من كلامهم أو بتهينيهم بأي طريقة، يبقي توقفي ده فورًا. ولما تكرريه معاهم تعتذري لهم. لإن ولادك هيتعلموا الاحترام منك قبل أي حد تاني. هيتعلموه لما يشوفوه في طريقة تعاملك معاهم ومع الناس.
- خليكي واضحة معاهم في طريقة الكلام المقبولة اللي يقدروا يعبروا بيها. يعني بدل ما تقولي “اتكلم عدل / احترم نفسك ما تتكلمش كده”، قولي لهم انتي متوقعة منهم إيه بالظبط وإدي لهم بدايل زي إنك تقولي لهم “قصدك تقولي كذا؟” أصحح لها اللي قالته واعبر عنه بالطريقة الصح واخليها تقولها تاني.
- ولو كررت طريقة الردود دي تاني، وقفي الكلام فورًا وارفضي إنك تكملي كلام معاها مع توضيح إنك مش هتقبلي الطريقة دي ومش هتقدري تكملي كلام معاها وإنك واثقة إنها تقدر تعبر عن اللي عايزة تقوله بطريقة أحسن من كده.
- لو بنتك اتكلمت أو اتصرفت بعدم احترام في أي مكان وقدام أي حد، لازم تعترضي عشان تعرف إنك مش هتقبلي ده تحت أي ظرف من الظروف.
- لو أصريتي كل مرة وفي كل مكان ووقت إن الكلام بطريقة مؤدبة شرط أساسي لبداية الحوار أصلًا؛ هتلاحظي تغيير واضح في سلوك الطفل وهيتعلم يراقب تصرفاته ويتحكم في مشاعره ويفكر قبل الكلام إن مفيش بديل غير الكلام والتصرف باحترام.
المصادر:
Positive Discipline
Psychology Today
very well family
What’s your Reaction?
التعليق باستخدام حساب فيس بوك