البنات هم فاكهة البيت، وهم اللي بيحلّوا الحياة، وعلى قد حلاوتهم على قد ما تربية البنات صعبة ومحتاجة تركيز في تفاصيل كتير عشان تعرفي تطلعي بنت حنونة واثقة في نفسها ومسؤولة وقوية، قادرة تواجه الدنيا بمطباتها. سألنا المختصين وهنقول لكل أم في المقال ده شوية نصائح وحاجات محتاجة تعلّميها لبنتك عشان تواجه الدنيا وانتي متطمنة عليها.
أهم النصائح لـ تربية البنات
- صاحبيها واحضنيها كتير: عامليها كإنها واحدة صاحبتك بتحكي وتتبسطي وتضحكي معاها. حافظي على الوقت الخاص بينكم أنتم الاتنين وقت يكون كله لعب وأحضان وضحك وزغزغة. خديها في حضنك وفكريها كل يوم إنك بتحبيها، وقولي لها إنك هتكوني دايمًا جنبها حتى لو اختارت طريق مختلف عن اللي بتتمنيه لها.
- اسمعيها كويس وخدي رأيها: قربي منها واحكي لها عن يومك ومشاكلك، واسمعي منها اللي حابة تحكيه وانتي مركزة معاها، ومن غير ما تحكمي عليها. مش شرط يبقى عندك حلول لكل مشاكلها، لكن على الأقل اسمعيها واديها من وقتك، لأن مجرد تفاعلك معاها واهتمامك بيها هيريحها ويحسسها بالأهمية. اشركيها في قرارات البيت وعوديها إن رأيها مسموع وله قيمة.
- احترمي خصوصيتها: حافظي على مساحتها الخاصة من غير انتهاك. من وهي طفلة، خبّطي على باب أوضتها قبل ما تدخلي، استاذنيها قبل ما تاخدي حاجتها، اديها إحساس إنها مصونة ومش مباحة أو متراقبة.
- علميها تعبر عن مشاعرها: واتعاطفي مع إحساسها، وعوّديها إن المشاعر باختلافها حاجة من حقها تحس بيها وتعبر عنها بطريقة صح، ومش من حق حد ينكر مشاعرها عليها.
- قولي لها إنها جميلة زي ما هي، وفي كل حالاتها: وإنها متميزة ومتفردة بشكلها، وإنها ما تسمحش لقوالب المجتمع إنها تهز ثقتها بصورتها. علّميها إن جسمها جميل ومتميز وأن ربنا خلقنا مختلفين، وإن كل الأجسام جميلة.
- علّميها إنها مش سبب في أفعال الناس: لو حد أذاها، أكدي لها إنها مش السبب، لكن السبب إنه إنسان مش كويس، مش عشان هي ضعيفة أو قصرت في حاجة.
- علّميها ازاي تدافع عن نفسها: علميها الفرق بين المقبول وغير المقبول، سواءً من اللمسات أو الكلام من الناس القريبين أو الأغراب. وعلميها كمان ازاي تدافع عن جسمها وامتى تطلب المساعدة.
- علميها أهمية نجاحها وإيمانها بنفسها: وإن مستقبلها وطموحها ونجاحها هيسندها وهيساعدها باقي حياتها. وعلّميها تكون صادقة ومسؤولة عن تصرفاتها وإنها مش مضطرة تكذب أيًا كان الموقف. وإنها تلتزم بوعودها ليكي ولأصحابها وما توعدش بحاجة ما تقدرش توفيها.
- علميها الحياة الصحية: عوّديها تلعب رياضة وتاكل أكل صحي عشان نفسها وجسمها وصحتها. علميها ازاي تحافظ على نظافتها الشخصية وأهمية غسيل سنانها وريحة جسمها وشعرها. وكلميها عن البيريود أول ما تلاحظي علامات تغير على جسمها.
- علميها الاستقلالية: ما تنقذيهاش في كل المواقف، وتساعديها في كل حاجة. سيبيها تتصرف وتحل مشاكلها واتدخلي بس وقت اللزوم. عوّديها على المسؤولية والمشاركة واديها مهام تساعدك بيها في البيت على حسب سنها.
وأخيرًا، بنقول لك إن كل الحاجات دي مالهاش غير طريقة واحدة تعلميها لبنتك بيها، وهي إنك تبدأي بنفسك! تكوني المثل اللي نفسك بنتك تكونه لما تكبر. في النهاية، بنتك مرايتك، كل كلمة وفعل الأم بتعمله هيأثر على بنتها بطريقة أو بأخرى.
التعليق باستخدام حساب فيس بوك